تۇركىستانداعى ورتالىق بازار قالا سىرتىنا كوشىرىلەدى

شىمكەنت. 5 ناۋرىز. وڭتۇستىك قازاقستان وبلىسىنداعى تۇركىستان قالاسىندا بۇدان بىرەر كۇن بۇرىن وت قۇشاعىنا ورانعان ورتالىق بازار جابىلىپ, ول كونە شاھار سىرتىنداعى جاڭا جەرگە قونىس اۋدارادى. بۇل تۋرالى otyrar.kz حابارلادى. «ەلباسىنىڭ تاپسىرماسى بويىنشا, ءار قالانىڭ ورتاسىنداعى بازارلار سىرتىنا شىعارىلۋى ءتيىس. تۇركىستاندىقتار بەرىلگەن تاپسىرمانى ورىنداۋعا بىردەن كىرىسكەن. شاھار سىرتىنان «بارلىق» دەپ اتالاتىن بازار دا اشقان. الايدا, ساتۋشىلار جاڭا ورىنعا كوشۋگە كەلگەندە بەلسەندىلىك تانىتىپ وتىرعان جوق», - دەلىنگەن حابارلامادا. تەلەارنا وسىعان بايلانىستى قازىر ورتالىق بازارداعى ايەلدەردىڭ كوڭىلى سۋ سەپكەندەي باسىلعانىن جازادى. مۇنى ول «جىلدىڭ باسىندا ساۋدا جۇرمەي, شىعىنعا باتقان شاقتا قالانىڭ سىرتىنداعى جاڭا بازارعا كوشسەك, سالىقتاردى تولەي الماي قينالىپ قالامىز دەپ قورقادى», - دەپ تۇسىندىرەدى. جەرگىلىكتى بيلىك اعىمداعى جىلدىڭ سوڭىنا دەيىن ورتالىقتاعى بازارلاردى قالانىڭ سىرتىنا كوشىرۋى ءتيىس. بوساعان جەردە كورىكتەندىرۋ جۇمىستارى جۇرگىزىلىپ قوعامدىق ورىندار اشىلادى دەپ جوسپارلانىپ وتىر. باقتيار تايجان. دەرەك, سۋرەت: otyrar.kz.