پرەزيدەنتتىككە ۇمىتكەر مەملەكەتتىك ءتىل سىنىنان «قۇلادى»

استانا. 5 ناۋرىز. قازاقستان پرەزيدەنتتىگىنە ۇمىتكەر اسقار سىرعاباەۆ قازاق ءتىلى بويىنشا الىنعان ەمتيحاننان وتە المادى. بۇل تۋرالى Interfax حابارلادى. «الەمدىك داعدارىس جانە قازاقستان ەكونوميكاسى» دەگەن تاقىرىپتا شىعارما جازعان سىرعاباەۆ 92 قاتە جىبەرگەن. وسىعان وراي لينگۆيستيكالىق كوميسسيا ونى مەملەكەتتىك ءتىلدى بىلمەيدى دەگەن قاۋلى قابىلداعان. «ساۋاتتى وقي ءبىلۋ تالاپ ەتىلەتىن ەكىنشى سۇراقتا دا ول مۇنى مەڭگەنمەگەنىن كورسەتتى. وقىپ تۇرعاندا, وتە كوپ كىدىرەدى, ءسوزدى وقۋ ءۇنى ناشار, كەيبىر سوزدەرى مۇلدەم تۇسىنىكسىز», - دەپ ءتۇسىندىردى كوميسسيا توراعاسى مىرزاتاي جولداسبەكوۆ. ەمتيحاننىڭ ءۇشىنشى كەزەڭىندە سىرعاباەۆ ءوزىنىڭ ويىن دۇرىستاپ جەتكىزىپ بەرە المادى. «كەيبىر ويلارىندا قيسىن بولمادى, ول ءتىپتى مەملەكەتتىلىك دەگەننىڭ نە ەكەنىن دە شاتىستىرىپ الدى, ونىڭ ماعىناسىن تۇسىنبەيدى», - دەپ اتاپ ءوتتى جولداسبەكوۆ. «وعان ەشكىم دە كەدەرگى كەلتىرگەن جوق, قالاعانىنشا دايىندالدى. بىراق ناتيجەسى وتە ناشار بولىپ شىقتى. وكىنىشتى, بىراق ءبىز وسىنداي شەشىم قابىلدادىق», - دەپ قورىتتى توراعا. ساكەن مايلىباي. دەرەك, سۋرەت: Interfax.