باتىس قازاقستاندا ورىنسىز جۇمسالعان قاراجات قايتارىلدى

ورال. 5 ناۋرىز. باتىس قازاقستان وبلىسىندا مەملەكەتتىك ساتىپ الۋ زاڭدىلىقتارىنىڭ بەلدەن باسىلۋ كورىنىستەرى كەزدەسىپ قالىپ ءجۇر. بۇل تۋرالى egemen.kz ءتىلشىسى حابارلادى. وسىنداي جاعداي جاقىندا شالعايداعى قاراتوبە اۋدانىندا تىركەلدى. مۇندا پروكۋراتۋرا ورگاندارى بيۋدجەت قاراجاتىنىڭ نەگىزسىز, شەكتەن تىس ارتىق جۇمسالۋ كورىنىستەرىن انىقتادى. باتىس قازاقستان وبلىستىق پروكۋراتۋراسىنىڭ ءباسپاسوز قىزمەتىنەن تۇسكەن مالىمەت وتكەن جىلدىڭ 15 قىركۇيەگىندە قاراتوبە اۋداندىق ءبىلىم بەرۋ ءبولىمى ەت ونىمدەرىن ءبىلىم وردالارىنا جەتكىزۋ جونىندە «تالاپكەر» شارۋا قوجالىعىمەن كەلىسىمشارت جاساعانىن ايعاقتايدى. بۇل كەزدە ەتتىڭ ءار كيلوسى ءۇشىن 900 تەڭگە باعا بەلگىلەنگەن. ءتيىستى نورماتيۆتەر مەن تالاپتار بويىنشا بيىلعى جىلدىڭ باسىندا اتالعان كەلىسىمشارت ۇزارتىلۋعا ءتيىستى بولاتىن. الايدا, بۇل ءتارتىپ ورىندالماعان. ءدال وسى ارادا مەملەكەتتىك ساتىپ الۋ جونىندەگى زاڭناما بۇزىلىپ, ەندىگى جەردە ەتتىڭ ءار كيلوسىن 1200 تەڭگەدەن جەتكىزۋ جونىندە قوسىمشا كەلىسىمشارت جاسالعان. ءسوز جوق بۇل ناقتى باعادان الدەقايدا جوعارى, نەگىزسىز ءارى كوتەرىڭكى باعا بولاتىن. پروكۋرورلىق ىقپال ەتۋ شارالارىنىڭ ناتيجەسىندە قوسىمشا كەلىسىمشارتتىڭ كۇشى جويىلدى. وسى ۋاقىتتىڭ ىشىندە اۋداندىق ءبىلىم بەرۋ ءبولىمى «تالاپكەرگە» 132 ميلليون 600 تەڭگەنى نەگىزسىز تولەگەن. وسى سومانىڭ ءبارى بيۋدجەتكە كەرى قايتارىلىپ الىندى. بۇعان قوسا 862 ميلليون تەڭگە بيۋدجەتتىك قاراجاتتى ۇنەمدەۋ مۇمكىندىگى تۋدى. تەمىر قۇسايىن. دەرەك: egemen.kz. سۋرەت: news.nur.kz.