باتىستىق قۇندىلىقتارعا باس ۇرا بەرمەيىك

قازاقستان رەسپۋبليكاسىنىڭ پرەزيدەنتتىگىنە قازاقستان كوم­مۋنيستىك حالىق پارتياسىنان كانديدات, قكحپ ورتالىق كوميتەتىنىڭ حاتشىسى تۇرعىن سىزدىقوۆ استانا قالاسىندا ەۋرازيا گۋمانيتارلىق ۋنيۆەرسيتەتىنىڭ ءبىر توپ ستۋدەنتىمەن كەزدەستى. «بۇگىن باتىستىق قۇندىلىقتار رۋحاني قۇلدىراۋعا, ادامگەرشىلىك بوسوكپەلىككە, جەڭىل پايدا تابۋ مەن ارسىزدىققا الىپ كەلۋدە. باتىس ەلدەرىندە ءبىرىنشى ورىنعا وزىمشىلدىك شىعىپ وتىر جانە ول قالىپتى ءومىر ۇستانىمىنا اينالعان. وسىنىڭ بارلىعى قايعىلى جاعدايلارعا الىپ كەلۋدە: وسى ەلدەردە جالعىزىلىكتى قارت كىسىلەر سانى ۋاقىت وتكەن سايىن وسە ءتۇسىپ وتىرسا, ءىس جۇزىندە تۋ كورسەتكىشى جىلما-جىل تومەندەۋىمەن ەرەكشەلەنەدى», دەپ اتاپ ءوتتى ءوزىنىڭ سوزىندە تۇرعىن ىس­قاق ۇلى. قازاقستان رەسپۋبليكاسى پرەزي­دەنت­تىگىنە كانديدات ت.سىزدىقوۆ, سونداي-اق, كەزدەسۋگە قاتىسۋشىلار نازارىن, بۇگىندە ءوزىنىڭ پىكىرىنشە, جاساندى مۇراتتاردى ناسيحاتتايتىن باتىستىق بۇقارالىق مادەنيەتتىڭ تەرىس ىقپال ەتەتىن سالدارلارىنا اۋداردى. «باتىستىق كينەماتوگرافتىڭ ءونىم­دەرى ءىس جۇزىندە ءىرىپ-شىرىتەتىن قاعي­داتتاردى الدىڭعى كەزەككە شىعارادى. قۇندىلىقتاردىڭ وسىنداي ورىن الماسۋلارى ەشقانداي جوعارى ءمان-ماعىناسى جوق  بەيمارال ادەمى ومىرگە باس يۋشىلىكتى ناسيحاتتايدى. ال مۇنىڭ شىنايى ومىرگە ءۇش قايناسا سورپاسى قوسىلمايدى», دەدى ءوزىنىڭ سوزىندە قازاقستان كوممۋنيستىك حالىق پارتياسىنان پرەزيدەنتتىك سايلاۋعا ءتۇسىپ جاتقان تۇرعىن ىسقاق ۇلى. پرەزيدەنتتىككە كانديداتتىڭ پىكىرىنشە, گولليۆۋدتىق كينو ونىمدەرى قانداي جولمەن بولسا دا تابىسقا قول جەتكىزۋ ماقساتىندا ەش نارسەدەن تايىنبايتىن كەۋدەمسوقتىق قاعيداتتارىن بارلىق باسقا قۇندىلىقتاردان جوعارى قويادى. ال گولليۆۋد كينولارىنداعى قاتىگەزدىك جوعارى يدەالدار دەڭگەيىنە دەيىن اسپەتتەلسە, ول شىنايى ومىردە ەشقانداي جازا تارتپايدى دەيتىن وتىرىك ءبىر ەلەس قالىپتاستىرادى. ت.سىزدىقوۆ اتاپ وتكەندەي, بارلىق باتىستىق فيلمدەردە ءومىر مەن ادامعا قاتىستى تۇتىنۋشىلىق كوزقاراس ناسيحاتتالادى. بۇل ناسيحاتتىڭ نەگىزگى ماق­ساتى ادامدى قالىپتى ءومىر ءسۇرۋ ءۇشىن وزىنە قاجەتتىدەن مۇمكىندىگىنشە كوبىرەك قارپىپ قالۋعا ماجبۇرلەۋ بولىپ تابىلادى. دەمەك, بۇدان شىعاتىن قورىتىندى, دەيدى پرەزيدەنتتىككە كانديدات, باستى قۇندىلىق رەتىندە رۋحاني ەمەس, ماتەريالدىق بايلىق الدىڭعى كەزەككە شىعادى. ت.سىزدىقوۆ, سونىمەن قاتار, باتىس­تىق تاماقتانۋ مادەنيەتىنىڭ تەرىس ىقپالى ماسەلەلەرىنە توقتالىپ ءوتتى. «ءبىر قاراعاندا فاست-فۋد وتە ىڭعايلى جانە ۇنەمدى تاماق رەتىندە كورىنەدى. بىراق بۇگىندە ونداي تاعامنىڭ ادام اعزاسىنا قانداي زيان تيگىزەتىنىن ويلاناتىن ۋاقىت جەتتى. فاست-فۋد سياقتى تاعام تۇرلەرىن دايىنداۋعا جانە ساتۋعا  قۇرىلعان بيزنەس ونىڭ يەلەرىنە ارزان دا تومەن ساپالى ءونىم ەسەبىنەن جاقسى تابىس اكەلەدى. ونىڭ ۇستىنە, مۇنداي زياندى ازىق كەڭ كولەمدە جارنامالانىپ, تۇتىنۋشىعا تىقپالانادى دەسە دە بولادى», دەپ اتاپ ءوتتى ءوزىنىڭ سوزىندە تۇرعىن ىسقاق ۇلى. ەۋرازيا گۋمانيتارلىق ۋنيۆەر­سيتە­تىنىڭ ءبىر توپ ستۋدەنتىمەن كەزدەسۋ بارى­سىندا, كانديداتتىڭ سايلاۋ­الدى شتا­بىنىڭ جەتەكشىسى ايقىن قوڭى­روۆ تا ءسوز سويلەدى. اتاپ ايتقاندا, ول ت.سىزدىقوۆتىڭ سايلاۋالدى باعدار­لا­ماسىندا كوتەرىلىپ وتىرعان ماسەلەلەر ەگجەي-تەگجەيلى زەرتتەلگەنىن جانە جان-جاقتى ويلاستىرىلعانىن مالىمدەدى. «بۇگىندە ەكى تاراپ ءۇشىن دە وتە جەمىستى كەزدەسۋ بولدى عوي دەپ ويلايمىن. ءبىز تۇرعىن ىسقاق ۇلى باتىستىق ستان­دارتتار مەن قۇندىلىقتاردىڭ تەرىس ىقپالى ماسەلەلەرىن ورىندى كوتەرىپ وتىر دەپ ەسەپتەيمىز. ءبىزدىڭ ءتۇرلى وڭىرلەردە ءالى بىرقاتار كەزدەسۋلەر وتكى­زۋىمىز جوسپارلانعان. سول كەزدەسۋلەردە ءبىز جۇرتشىلىقتىڭ نازارىن, سونى­مەن قاتار, كومپيۋتەرلىك ويىندار مەن الەۋمەتتىك جەلىلەردىڭ زياندى ىقپا­لىنا اۋدارۋدى ويلاستىرىپ وتىرمىز», دەدى ءوزىنىڭ سوزىندە پرەزيدەنتتىككە كانديداتتىڭ سايلاۋالدى شتابىنىڭ جەتەكشىسى ا.قوڭىروۆ. كەزدەسۋ قورىتىندىسىندا قازاقستان رەسپۋبليكاسى پرەزيدەنتتىگىنە كانديدات تۇرعىن سىزدىقوۆ ستۋدەنتتەر تاراپىنان قويىلعان كەيبىر سۇراقتارعا جاۋاپ قايتارىپ, ءوزىنىڭ سايلاۋالدى شتابىنىڭ ءارى قارايعى جۇمىس جوسپارلارى تۋرالى اڭگىمە قوزعادى. جاقسىباي سامرات, «ەگەمەن قازاقستان». استانا.