باتىس قازاقستاندا يندۋستريالىق ايماققا 1 مىڭ گەكتار جەر ءبولىندى

ورال. 5 ناۋرىز. باتىس قازاقستان وبلىسى اكىمدىگى مەن تۇركيالىق «اككيۋن گرۋپپ» كومپانياسى اراسىندا يندۋستريالىق ايماق قۇرۋ جونىندەگى مەموراندۋمعا قول قويىلدى. بۇل ترالى egemen.kz ءتىلشىسى حابارلادى. اتالعان كومپانيا باسشىسى يۋسۋف اككيۋننىڭ ايتۋىنشا, ولاردىڭ قالاۋلارى ورال وڭىرىنە تەكتەن تەك تۇسپەپتى. «ءبىزدى بىرىنشىدەن باتىس قازاقستاننىڭ لوگيستيكا مەن ينفراقۇرىلىم جاعىنان قولايلىلىعى قىزىقتىردى», دەيدى ول. ەندەشە وبلىستىق اكىمدىك ءۇشىن تۇركيالىقتار نەسىمەن تارتىمدى بولدى دەگەن ساۋالعا دا جاۋاپ بەرە كەتكەنىمىز ءجون. بۇل رەتتە شەتەلدىك كومپانيانىڭ يندۋستريالىق ايماق قۇرۋداعى مول تاجىريبەسى ەسكەرىلگەنىن ايتۋعا ءتيىسپىز. ولار الەمنىڭ كوپتەگەن ەلدەرىندە جۇمىستار جۇرگىزۋدە. يندۋستريالىق ايماقتىڭ قاجەتتىلىگى – شاعىن جانە ورتا كاسىپتى وركەندەتۋگە اسا قولايلى فاكتور تۋعىزاتىندىعىندا. بۇدان ءارى ءوندىرىستىڭ كەز-كەلگەن سالاسىن دامىتۋعا جان-جاقتى مۇمكىندىكتەر اشىلماق. بۇگىنگى كۇنى قازاق-تۇرىك يندۋستريالىق ايماعىن قۇرۋ ءۇشىن سامارا-شىمكەنت تاسجولى بويىنان 1 مىڭ گەكتار جەر تەلىمى بولىنگەن. مۇنداعى قۇرىلىس جۇمىستارى العاشقى كەزەڭدە 300 گەكتار اۋماققا عانا جۇرگىزىلمەك. بۇدان كەيىنگى كەزەكتە قالعان جەر تەلىمى بولىكتەرى كاسىپكەرلەر مەن ينۆەستورلاردىڭ سۇرانىستارىنا ساي ودان ءارى ۇلعايماق. ەڭ باستىسى, بۇگىندە قول قويۋشى تاراپتار جوبانىڭ بارىنشا ءتيىمدى تۇردە, ءارى قىسقا مەرزىمدە ىسكە اسۋىنا مۇددەلى. قازىرگى كۇنى مۇندا يندۋستريالىق ايماقتىڭ تەحنيكالىق-ەكونوميكالىق نەگىزدەمەسى مەن جوبالاۋ-سمەتالىق قۇجاتتارىن جاساۋ ءىسى بەلگىلەنىپ وتىر. تەمىر قۇسايىن. دەرەك, سۋرەت: egemen.kz.