سولتۇستىك قازاقستاندا زاڭ بۇزعان شەنەۋنىك قىزمەتىنەن الىنادى

پەتروپاۆل. 5 ناۋرىز. پەتروپاۆلدا سولتۇستىك قازاقستان وبلىستىق تارتىپتىك كەڭەس توراعاسى ادىلبەك مۇقاشەۆتىڭ باسشىلىق ەتۋىمەن وتكەن وتىرىستا سىبايلاس جەمقورلىققا قارسى زاڭناما تالاپتارىن ورەسكەل بۇزعان شەنەۋنىك قىزمەتىنەن الىناتىنى ءمالىم بولدى. بۇل تۋرالى وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ ءباسپاسوز قىزمەتى حابارلادى. ايىرتاۋ اۋداندىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ جەتەكشىسى س.دايىروۆقا قاتىستى قارالعان ماسەلە وسىنداي شەشىممەن اياقتالدى. ويتكەنى, شەنەۋنىك مەملەكەتتىك ساتىپ الۋ كونكۋرسىن وتكىزبەستەن-اق «نورد جولدارى» جاۋاپكەرشىلىگى شەكتەۋلى سەرىكتەستىگىنە ءتورت ميلليون تەڭگەنى ۇستاتا سالعان. ءسويتىپ, قىس مەزگىلىندە اۆتوموبيل جولدارىن تازالاۋ جايلى كەلىسىم-شارتتى ءتۇزۋ بارىسىندا زاڭعا قايشى ارەكەتتەرگە بارعان. وسىلايشا سىبايلاس جەمقورلىقپەن كۇرەس تالاپتارىن بەلدەن ءبىر-اق باسقان جاۋاپتى تۇلعا قىزمەتىنەن الىناتىن بولدى. وبلىستىق فيلارمونيانىڭ باسشىسى ب.اقماعامبەتوۆانىڭ قۇقىق بۇزۋشىلىق ءىس-ارەكەتتەرى تۋرالى قالا پروكۋراتۋراسى وكىلىنىڭ ەسەبىنەن كەيىن تارتىپتىك كەڭەس مۇشەلەرىنىڭ  ءىستى وكىلەتتى ورگان قاراۋىنا جولداۋ كەرەك دەگەن ۇسىنىسى قابىلداندى. وعان ب.اقماعامبەتوۆانىڭ قالالىق ءماسليحات دەپتۋتاتى مارتەبەسى بىردەن-ءبىر نەگىز بولدى. ءومىر ەسقالي. دەرەك: سولتۇستىك قازاقستان وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس دەپارتامەنتىنىڭ ءباسپاسوز قىزمەتى. سۋرەت: qazaquni.kz.