ەرىكتىلەر دە سايلاۋدى بايقايدى

اتىراۋدا پرەزيدەنت سايلاۋىن بايقاۋ جونىندەگى قوعامدىق كوميسسيانىڭ وڭىرلىك فيليالى جۇمىسىن باستادى. قازىر وڭىردەگى فيليالدا ەرىكتىلەردەن بايقاۋشىلار قۇرامىن جاساقتاۋ جۇمىسى جۇرگىزىلىپ جاتىر. وڭىردەگى 232 سايلاۋ ۋچاس­كەسىن بايقاۋشىلارمەن قامتا­ماسىز ەتۋ ماقساتىندا ەرىك­تىلەردى ىرىكتەۋ جالعاسۋدا. قا­زىردىڭ وزىندە 190-عا جۋىق ەرىكتى بايقاۋشى تىركەلىپتى. ولاردىڭ قاتارىندا جوعارى جانە ورتا ارناۋلى وقۋ ورىندارىنىڭ ستۋدەنتتەرى مەن ماگيسترانتتار, مۇعالىمدەر مەن زيالى قاۋىم وكىلدەرى بار. وسى اپتانىڭ سوڭىنا دەيىن ەرىكتىلەردەن بايقاۋشىلار قۇرامىن تولىقتاي جاساقتاۋ اياقتالادى. «ءبىزدىڭ ماقساتىمىز – سايلاۋدىڭ ەركىن جانە ءادىل ءوتۋىن بايقاۋ, سونىمەن بىرگە, سايلاۋ بارىسىندا زاڭدىلىقتىڭ ساقتالۋىن بايقاۋمەن بىرگە, ازاماتتاردىڭ سايلاۋ قۇقىعىن قورعاۋ. جاقىن ارادا جەتى اۋداندا جانە ءوڭىر ورتالىعىندا ەرىكتى بايقاۋشىلار ءۇشىن سايلاۋ تۋرالى زاڭدىلىقتى تۇسىندىرۋگە ارنالعان سەمينار-ترەنينگتەر وتكىزۋدى جوسپارلاپ وتىرمىز. بايقاۋشىلاردى ارنالعان ادىستەمەلىك قۇرالدارمەن تانىستىرامىز», دەپ اتاپ ءوتتى «قازاقستان رەسپۋبليكاسىنداعى پرەزيدەنت سايلاۋىن بايقاۋ جونىندەگى رەسپۋبليكالىق قوعامدىق كوميسسيا» رەسپۋبليكالىق قوعامدىق بىرلەستىگىنىڭ اتىراۋ وبلىسىنداعى فيليال ءتورايىمى شىنارگۇل قايىروۆا. جولداسبەك شوپەعۇل, «ەگەمەن قازاقستان». اتىراۋ وبلىسى. سۋرەتتى تۇسىرگەن راحىم قويلىباەۆ.