ەليزابەت تۇرسىنباەۆا الەم چەمپيوناتىنا قاتىسۋدا

استانا. 5 ناۋرىز. ەستونيادا مانەرلەپ سىرعاناۋدان جاسوسپىرىمدەر اراسىندا الەم چەمپيوناتى وتۋدە. اتالعان دوداعا ەلىمىزدىڭ اتىنان ەليزابەت تۇرسىنباەۆا قاتىسۋدا. بۇل تۋرالى egemen.kz حابارلادى. ەستونيانىڭ استاناسى تالليندە ءوتىپ جاتقان جارىستا ءبىزدىڭ قىز ازىرگە جەتىنشى ورىندا كەلەدى. قىسقا باعدارلاما بويىنشا ەليزابەت 55,95 ۇپاي جينادى. بۇل سىندا رەسەيلىك ەۆگەنيا مەدۆەدەۆا 68,48 ۇپايمەن كوش باستادى. ەكىنشى ورىنعا جەنيانىڭ وتانداسى سەرافيمى ساحانوۆيچ (63,09 ۇپاي) جايعاسسا, ۇزدىك ۇشتىكتى جاپونيا سپورتشىسى ۆاكابا حيگۋچي (61,27 ۇپاي) تۇيىندەپ تۇر. سايىسقا بارلىعى 43 سپورتشى قاتىسىپ, سونىڭ 24-ءى ەركىن باعدارلاما بويىنشا ونەر كورسەتۋگە مۇمكىندىك الدى. اتالعان سايىس 6 ناۋرىز كۇنى وتەدى. تالليندەگى تارتىستا ەل نامىسىن جالعىز ەليزابەت تۇرسىنباەۆا قورعاپ جاتقانىن ايتا كەتەيىك. مانەرلەپ سىرعاناۋشى قىزىمىز بۇعان دەيىن بىرنەشە حالىقارالىق جارىستاردا ولجا سالىپ, ەل نامىسىن ابىرويمەن قورعاپ ءجۇر. ءتىپتى جاسوسپىرىمدەر اراسىنداعى گران-پري جارىسىنىڭ ەكى كەزەڭىندە جۇلدەگە ىلىگىپ, الەمدىك مامانداردان جوعارى باعا الدى. بۇگىندە قازاق قىزى كانادادا بەلگىلى جاتتىقتىرۋشى برايان ورسەردەن ءتالىم الادى. كيم يۋنا (ۆانكۋۆەر-2010) جانە يۋدزۋرۋ حانيۋ (سوچي-2014) سىندى ەكى بىردەي وليمپيادا چەمپيونىن دايىنداعان كانادالىق مامان ءبىزدىڭ قىزدىڭ دا بولاشاعىنا ۇمىتپەن قارايدى. وتكەن اقپان ايىندا 15 جاسقا تولعان تۇرسىنباەۆا وسى جىلدىڭ كۇزىنەن باستاپ ەرەسەكتەر اراسىنداعى جارىستارعا قاتىسۋعا مۇمكىندىك الدى. ەلامان قوڭىر. دەرەك: egemen.kz. سۋرەت: sk-sport.kz.