گۋمانيتارلىق جاردەم بەرىلەدى

كەشە پرەمەر-ءمينيستردىڭ ءبىرىنشى ورىنباسارى ومىرزاق شوكەەۆتىڭ توراعالىعىمەن قىرعىزستانعا گۋمانيتارلىق كومەك كورسەتۋ ماقساتىندا كەڭەس ءوتتى. وعان قوس مەملەكەتتىڭ بىرقاتار ۇكىمەت مۇشەلەرى مەن ۆەدومستۆولار وكىلدەرى قاتىستى. وتىرىستا ءو.شوكەەۆ قىرعىزستانعا ارنالعان داعدارىستى ەڭسەرۋ جوسپارىن ازىرلەۋ جۇمىستارى 26 شىلدەگە دەيىن اياقتالاتىنىن ايتا كەلە, داعدارىستى ەڭسەرۋ باعدارلاماسىن ازىرلەۋگە جاۋاپتى قىرعىزستان دەلەگاتسياسى كەلىپ وتىرعانىن تىلگە تيەك ەتتى. سونداي-اق ول قازاقستان تاراپىنان بۇگىندە داعدارىسقا قارسى جوسپاردىڭ الدىن الا جوباسى مەن ونى جۇزەگە اسىرۋ ءىس-شارالار جوسپارى ازىرلەنگەنىن دە نازاردان تىس قالدىرمادى. بۇل رەتتە ءبىرىنشى ۆيتسە-پرەمەر قىرعىزستانعا ارنالعان داعدارىسقا قارسى جوسپاردىڭ جوباسىن ءالى دە پىسىقتاۋدى ەكونوميكالىق دامۋ جانە ساۋدا ۆيتسە-ءمينيسترى قۋاندىق بيشىمباەۆقا جۇكتەدى. قىرعىز ەلى ۇكىمەت مۇشەلەرىمەن وتكەن بۇل باسقوسۋدا ءو.شوكەەۆ: “ۇكىمەت باسشىسى قىرعىزستانعا گۋمانيتارلىق كومەك كورسەتۋ ماقساتىندا ەكى قاۋلىعا قول قويدى. ەندى وزگەسى توتەنشە جاعدايلار مينيسترلىگىنە بايلانىستى. اتاپ ايتساق, جەدەل تۇردە قىرعىزستانعا كومىر مەن قۇرىلىس ماتەريالدارى جەتكىزىلۋى ءتيىس”, – دەدى. جيىننان كەيىن ەلىمىزدىڭ توتەنشە جاعدايلار ءمينيسترى ۆلاديمير بوجكو جۋرناليستەرگە بەرگەن سۇحباتىندا قىرعىز تاراپىنىڭ ءوتىنىشى بويىنشا قوس قاۋلى شەڭبەرىندە اتالعان مەملەكەتكە قۇرىلىس ماتەريالدارى جەتكىزىلەتىنىن جانە شۇباركول كومىرىنىڭ قىرعىز ەلەكتر ستانساسىنا جول تارتۋى جوسپارلانىپ وتىرعانىن ايتتى. ءمينيستردىڭ سوزىنە قاراعاندا, وسى اپتانىڭ سوڭىنا قاراي گۋمانيتارلىق كومەكتىڭ العاشقى ۆاگوندارى جونەلتىلمەك. ءابدىراحمان قىدىربەك.