قازىرگى جاستار يسلامدى جەتە تۇسىنە مە؟

قازاقستاننىڭ تاريحى مەن مادەنيەتى كوپ عاسىرلار بويى يسلام دىنىمەن بايلانىسا دامىپ كەلەدى. يسلام ءدىنى قازاق حالقىنىڭ وزىندىك رۋحانياتى مەن مادەنيەتىنىڭ قالىپتاسۋىنداعى نەگىزگى قاينارلاردىڭ ءبىرى. قا­زاق حالقىنىڭ ارعى تەگى بولىپ ەسەپتەلەتىن كونە تۇركىلەر يسلام­نىڭ قالىپتاسۋى مەن كوپتەگەن جەتىستىكتەرىنە ءوز ۇلەستەرىن قوس­تى. قازاق حالقى ءوز تاريحىندا ءدىني اعىمدارعا بولىنبەگەن ءجا­نە وزگە ءدىن وكىلدەرىنە قاتىستى تولەرانتتىلىقتى ۇستانعان. سو­نىڭ ناتيجەسىندە, بۇگىندە قا­زاقستان كوپتەگەن ۇلتتار مەن ۇلىستاردىڭ جانە دىندەردىڭ ىنتىماعى ورناعان مەكەنگە اينالىپ وتىر. الايدا, وسىناۋ ىنتىماق-بىرلىككە قىزعانا قارايتىن كوزدەر دە بارشىلىق. كەيبىر جاستارىمىز راديكالدى كوزقاراستاعى, پاتريوتتىق سەزىمنەن جۇرداي بولعان ءارتۇرلى اعىمداردىڭ قول شوقپارىنا اينالۋدا. وسىناۋ تاريحتى قايتا جاڭعىرتۋ, وسكەلەڭ ۇرپاقتى وتكەنىنە كوز شالدىرىپ, ساباق الدىرتىپ, ەرتەڭىن ويلايتىن, ەلدىگىن ساقتايتىن پاتريوتتىق قاسيەتتەرگە باۋلۋ ماقساتىندا تارازدا «قازاقستان تاريحىنداعى يسلام ءدىنىنىڭ ءرولى» اتتى عىلىمي-تاجىريبەلىك كونفەرەنتسيا بولىپ ءوتتى. «قازاق حاندىعىنىڭ قۇرىلۋى, ونىڭ قۇرىلىمى, مادەنيەتى, ءدىنى, ءدىلى, رەسمي ءتىلى, ەكونوميكالىق جاعدايى, ساياسي قالىپتاسۋى, كورشى جانە شەت مەملەكەتتەرمەن بايلانىسى تۋرالى ءالى دە بولسا دەرەكتەر جەتكىلىكسىز. مىنە, وسى ءىس-شارا بابالارىمىزدىڭ مادە­نيەتىن, ءداستۇرلى بولىپ سانالعان ءدىني ۇستانىمىمەن تانىسۋعا باعىتتالىپ وتىر. وسى سەبەپتەردى نەگىزگە الا وتىرىپ, بۇل كونفەرەنتسيادا ەلىمىزگە تانىمال تاريحشى عالىمدار ءوز ەڭبەكتەرىن ۇسىندى», دەيدى وبلىس اكىمىنىڭ ورىنباسارى ەرقانات مانجۋوۆ. شىنىندا, جات دىندەرگە بوي الدىرماي اتا-بابامىزدان ميراس بولىپ كەلگەن ءداستۇرلى ءدىنىمىزدى قۇرمەتتەپ, بابالار اماناتىن كەلەشەك ۇرپاققا جەتكىزۋ ءبىزدىڭ باس­تى مىندەتىمىز. وسى ورايدا, ەڭ الدىمەن, ەلدىڭ بولاشاعىنا نۇقسان كەلتىرەتىن, كۇندەلىكتى ومىرىمىزگە, دەنساۋلىعىمىز بەن ومىرگە دەگەن كوزقاراسىمىزعا زيان كەلتىرەتىن ءدىني ۇيىمداردىڭ جۇمىسىنا قار­سى تۇرۋ ارقىلى ءدىني ەكسترەميزم مەن تەرروريزمنىڭ الدىن الۋ قاجەت. جيىندا جامبىل وبلىستىق ءدىن ىستەرى باسقارماسىنىڭ باس­شىسى ج.وماروۆ, تاريح عىلىم­دارىنىڭ دوكتورى, پروفەسسور ا.ابدۋالى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورلارى م.الپىسبەس, ا.يزبايروۆ, ەلىمىزدىڭ ءدىن ىستەرى كوميتەتىنىڭ ءدىن ماسەلەلەرى ءجونىن­دەگى عىلى­مي زەرتتەۋ جانە تالداۋ ورتالى­عىنىڭ عىلىمي ساراپشىسى, ءدىنتانۋشى, Phd دوكتورى م. يساحان جانە باسقا دا عالىمدار ءوز زەرتتەۋلەرىن ورتاعا سالىپ, جاستارعا ويسالارلىق دۇنيەلەر ايتا ءبىلدى. ورالحان ءداۋىت, «ەگەمەن قازاقستان». تاراز.