سولتۇستىك قازاقستاندا ستۋدەنتتەر كونفەرەنتسياسى ءوتتى

پەتروپاۆل. 5 ناۋرىز. پەتروپاۆلداعى م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە «قر كونستيتۋتسياسى جانە ونىڭ قۇقىقتىق نەگىزدەرى» دەگەن تاقىرىپتا كونفەرەنتسيا ءوتتى. جوعارى وقۋ ورىندارى ستۋدەنتتەرىنىڭ اراسىندا وتكەن شاراعا ەلىمىزدىڭ ءار وڭىرىنەن 30-دان استام ىرگەلى ءبىلىم ورداسى قاتىستى. بۇل تۋرالى ۋنيۆەرسيتەتتىڭ ءباسپاسوز ورتالىعى حابارلادى. كونفەرەنتسيا الدىندا مارتەبەلى قوناقتار عىلىمي جوبالار كورمەسىن تاماشالاپ, ستۋدەنتتەردىڭ وزىق ويلى يدەيالارى جانە زەرتتەۋ جۇمىستارىمەن تانىستى. جيىنعا قاتىسۋشىلاردى وبلىس اكىمىنىڭ ورىنباسارى ەرلان اۋكەنوۆ قۇتتىقتاپ,  قازاقستانداعى دەموكراتيالىق قوعامنىڭ دامۋىندا اتا زاڭنىڭ الاتىن ورنى مەن ماڭىزىن ايتىپ ءوتتى. ەلىمىزدىڭ ءبىلىم جانە عىلىم مينيسترلىگى جاستار ساياساتى دەپارتامەنتى ديرەكتورىنىڭ ورىنباسارى ەركىن ۇيسىنباەۆ, س.امانجولوۆ اتىنداعى شىعىس قازاقستان ۋنيۆەرسيتەتىنىڭ  ستۋدەنتى نازەركە توقتارباەۆا, اقتوبە مەملەكەتتىك ۋنيۆەرسيتەتىنىڭ ستۋدەنتى گۇلسەزىم جاقۇدا, س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ ستۋدەنتى اسحات تىلەۋلەنوۆ جانە تاعى باسقا قاتىسۋشىلار ءسوز الىپ, كونستيتۋتسيانىڭ قۇقىقتىق نەگىزدەرى, جاستاردىڭ ەل وركەندەۋىنە قوسىپ وتىرعان ۇلەسى, الدا تۇرعان ىرگەلى مىندەتتەر, جولداۋ قاعيداتتارىن ورىنداۋدا جۇكتەلەتىن بيىك تالاپتار جايلى اڭگىمەلەدى. سونىمەن قاتار, جيىن بارىسىندا جەرگىلىكتى جەرلەردەگى ماسەلەلەر, ولاردى شەشۋ جولدارى تالقىلاندى. بىرنەشە كۇنگە سوزىلعان كونفەرەنتسيادا 600-گە جۋىق بايانداما تىڭدالىپ, ءارتۇرلى تاقىرىپتى قامتىعان سەكتسيالىق جۇمىستار جۇرگىزىلدى. ءومىر ەسقالي. دەرەك: سولتۇستىك قازاقستان مەملەكەتتىك ۋنيۆەرسيتەتىنىڭ ءباسپاسوز ورتالىعى. سۋرەت: nkzu.kz.