لوگيستيكا ماسەلەسى ءسوز بولدى

م.تىنىشپاەۆ اتىنداعى قازاق كولىك جانە كوممۋنيكاتسيا اكادەمياسىندا ەلىمىزدىڭ مەملەكەتتىك «نۇرلى جول» باعدارلاماسى اياسىندا جۇرگىزىلىپ وتىرعان ترانزيتتىك-كولىك ستراتەگياسىن تالقىلاعان عىلىمي-تاجىريبەلىك كونفەرەنتسيا بولىپ ءوتتى. وتاندىق تاسىمال جانە كولىك ماسەلەسىن تەرەڭىرەك قوزعاعان بۇل جيىنعا تەمىرجول سالاسىنىڭ ارداگەرلەرى, «قازاقستان تەمىر جولى» ۇلتتىق كومپانياسىنىڭ, حالىقارالىق اۆتوموبيل تاسىمالى وداعىنىڭ, «قازجولعزي» اك­تسيونەرلىك قوعامى مەن «قازاۆتوجول» ۇلتتىق كومپانيا­سىنىڭ باسشىلارى مەن ماماندارى قاتىسىپ, ەلىمىزدە سالىنعان اۆتوموبيل جولدارى مەن اۋە جانە تەمىرجول تاسىمالىنىڭ وزەكتى ماسەلەلەرىن ورتاعا سالدى. كونفەرەنتسيا بارىسىندا بەينەۋ – جەزقازعان, ارقالىق – شۇ­باركول تەمىرجول جوبالارى مەن ەلىمىزدىڭ شىعىسى مەن باتىسىن بايلانىستىرعان «باتىس قىتاي – باتىس ەۋروپا» ءاۆتودالىزى جانە قازاقستان – تۇرىكمەنستان – يران باعىتىنداعى قاتىناستى رەتتەيتىن كىرىس-شىعىس قاقپا قىزمەتىن اتقارىپ تۇرعان ماڭىزدى جوبا تۋراسىندا ناقتى دەرەكتەر كەلتىرىلىپ, ەل ەكونوميكاسىن ارتتىراتىن كولىكتىك لوگيستيكا سالاسىن ودان ءارى دامىتۋ ماسەلەسى كوتەرىلدى. ەلىمىزدىڭ كولىكتىك لوگيستيكا ينفراقۇرىلىمىن ىلگەرىلەتۋ ماقساتىندا استانا قالاسىندا اشىلعان نەگىزگى حاب-جۇيەسى ايماقتاردى ءوزارا بايلانىستىرا وتىرىپ, اۆتوماگيسترال, تەمىرجول جانە اۋە قاتىناستارى ارقىلى جەدەل دە جەڭىل تۇردە بايلانىسۋ مۇمكىندىگىنە قول جەتكىزىپ ۇلگەردى. جۇمىسىن جاڭا باستاعان شىعىس ايماعىن باتىس وبلىستارمەن بايلانىستىراتىن لوگيستيكالىق حابتىڭ اياق الىسى مەن تەڭىز جولدارى ارقىلى تاسىمال جاساۋ ينفراقۇرىلىمىن دامىتۋ ماسەلەسىنە مەملەكەت ەرەكشە نازار اۋدارىپ وتىر. كەلەلى كەڭەستە كولىك ءىسىنىڭ ماماندارى مەملەكەتتىك «نۇرلى جول» باعدارلاماسىندا باسا كوڭىل بولىنگەن بۇل سالانى دامىتۋ ارقىلى ەل ەكونوميكاسىن جان­دان­دىرۋمەن قاتار, قازاقستان­دىقتاردى جۇمىسپەن قامتۋ, حالىقتىڭ تۇرمىستىق الەۋەتىن كوتەرۋ سەكىلدى ۇلتتىق ساياساتتى دا ءوز مەرزىمىندە ساۋاتتى جۇرگىزۋگە نەگىز بولادى دەگەن پىكىر ءبىلدىردى. قانات ەسكەندىر, «ەگەمەن قازاقستان». الماتى.