فرانتسيا سوتى ءابىلازوۆتىڭ ەكستراديتسياسىن راستادى

استانا. 5 ناۋرىز. فرانتسيانىڭ كاسساتسيالىق سوتى قازاقستانداعى «بتا بانك»-ءتىڭ بۇرىنعى باسشىسى مۇحتار ءابىلازوۆ ادۆوكاتتارىنىڭ اپەللياتسياسىن قابىلداماي تاستادى. بۇل تۋرالى «فرانس-پرەسس» حابارلادى. وسىلايشا بانكيردى ەكستراديتسيا جاساۋ جونىندە ليوننىڭ اپەللياتسيالىق سوتى قابىلداعان شەشىم ءوزىنىڭ كۇشىندە قالدى. كەشە قابىلدانعان قاۋلىعا ەندى پرەمەر-مينيستر قول قويۋى كەرەك. اتالمىش قاۋلىنىڭ كۇشىن جويۋ ءۇشىن فرانتسيانىڭ مەملەكەتتىك كەڭەسىنە عانا شاعىم ايتۋعا بولادى. مۇحتار ءابىلازوۆ فرانتسيادا 2013 جىلى قاماۋعا الىنعان بولاتىن. سودان بەرى ونىڭ ەكستراديتسيا جاسالۋىن رەسەي مەن ۋكراينا قايتا-قايتا سۇراپ جاتىر. ال قازاقستان مۇنى جاساي المايدى, سەبەبى, بۇل ەلدىڭ فرانتسيامەن ەكستراديتسيا جاساۋ جونىندە كەلىسىمى جوق. وتكەن جىلعى قازان ايىندا ليونداعى اپەللياتسيالىق سوت بانكيردى ەكستراديتسيا جاساۋ جونىندەگى سۇرانىستى قاراعاتتاندىرۋدى ۇسىنعان ەدى. مۇندا باسىڭقىلىق رەسەيگە بەرىلدى. ال رەسەيدە ءابىلازوۆتى قاماۋعا الۋ جونىندە سانكتسيا شىعارىلىپ قويىلعان. بۇرىنعى بانكير بۇل ەلدە الاياقتىقپەن اينالىستى, جالعان قۇجاتتار جاسادى, قىزمەت بابىن اسىرا پايدالاندى دەگەن ايىپتاۋلار الىپ وتىر. قازاقستان وعان التى ميلليارد دوللاردان ارتىق سومانىڭ قارجىلىق ءتارتىپ بۇزۋىشىلىعىن جاسادى دەگەن كىنا تاعادى. ءابىلازوۆ پەن ونىڭ ادۆوكاتتارى مۇنىڭ استارىنان ساياسي سەبەپتەر ىزدەپ اۋرەگە ءتۇسىپ ءجۇر. مۇرات ايتقوجا. دەرەك, سۋرەت:             فرانس پرەسس.