اتىراۋدا 185,7 شاقىرىم بوگەتتى كۇشەيتۋ قاجەت

اتىراۋ. 5 ناۋرىز. اتىراۋ وبلىسى اكىمىنىڭ ورىنباسارى ءسالىمجان ناقپاەۆتىڭ توراعالىعىمەن وتكىزىلگەن ماجىلىستە كوكتەمگى سۋ تاسقىنىنا دايىندىق ماسەلەسى پىسىقتالىپ, 185,7 شاقىرىم قورعانىس بوگەتىنىڭ قۋاتىن كۇشەيتۋ قاجەتتىگى ايتىلدى. بۇل تۋرالى egemen.kz ءتىلشىسى حابارلادى. اتىراۋ وبلىستىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى مارات قۇرمانوۆتىڭ ءمالىم ەتۋىنشە, 1967-1994 جىلدارى ارالىعىندا 500 شاقىرىمنان اساتىن قورعانىس بوگەتتەرى سالىنعان. الايدا, يساتاي اۋدانىندا 1,7 شاقىرىم بوگەت سالۋدىڭ قاجەتتىگى تۋىنداپ وتىر. سونىمەن بىرگە, 185,7 شاقىرىم بوگەتتىڭ تەحنيكالىق احۋالى كوڭىلدەن شىقپايدى. قورعانىس بوگەتتەرىن مەملەكەتتىك كوميسسيامەن قابىلداۋ, ءتىپتى ءتيىستى قۇجاتتارىن جاساقتاۋ جۇمىستارى اتىراۋ قالاسى, قۇرمانعازى, يساتاي, قىزىلقوعا جانە جىلىوي اۋداندارىندا اتقارىلماعان. «كوكتەمگى سۋ تاسقىنىنا دايىندىق جۇمىستارى بارىسىندا 12 توننا جانار-جاعار ماي, 200 توننا قۇم, 187 مىڭنان استام قاپشىق دايىندالعان. سونداي-اق, توتەنشە جاعداي تۋىنداعاندا ءار ءتۇرلى قۇرىلىمداردان 109 ادام, 31 تەحنيكا, 35 ءجۇزۋ قۇرالى جانە «ەۋروكوپتەر» تىكۇشاعى كومەك بەرۋگە ءازىر», دەپ ءمالىم ەتتى اتىراۋ وبلىستىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى مارات قۇرمانوۆ. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.