ۇلتتار ىنتىماعىن پاش ەتكەن فەستيۆال

وڭتۇستىك استاناداعى ۇزدىكسىز ءبىلىم بەرەتىن الماتى ۋنيۆەر­سيتە­تىندە قازاقستان حالقى اسسامبلەياسىنىڭ 20 جىلدىعىنا وراي اتالمىش وقۋ ورنىندا وقيتىن ءارتۇرلى ۇلت وكىلدەرىنىڭ قاتىسۋىمەن «ءبىر­لىگىمىز جاراسقان, ورتاق ءۇيىمىز – قازاقستان!» اتتى فەستيۆال ءوتتى. سونداي-اق, فەستيۆال اياسىندا ۋنيۆەرسيتەتتەگى «نۇر وتان» پارتياسىنىڭ «جاس وتان» جاستار قاناتىنىڭ مۇشەلەرى ستۋ­دەنت­تەردى قازاقستان حالقى اسسامبلەياسى كەڭەسىنىڭ 14 اقپان كۇنگى باستا­ما­سىنىڭ نەگىزىندە وتەتىن پرەزيدەنتتىك سايلاۋعا قاتىسۋعا شاقىردى. مەرەكەلىك ءىس-شارانى اشقان ۋنيۆەرسيتەت رەكتورى باۋىرجان قۇلجاباەۆ ءداستۇرلى جولداۋدىڭ ناقتى ەكونوميكالىق مىندەتتەر قويىپ, ال سول مىندەتتەردىڭ تابىستى ورىندالۋى ماقساتىندا قازاقستان حالقىنا بىرلىكتىڭ اۋاداي قاجەت ەكەنىن ايتا كەلىپ, ەلىمىزدىڭ بەرەكە, ىنتىماعى مەن ساياسي تۇراقتىلىعىنا ەرەكشە ۇلەس قوسىپ وتىرعان قازاقستان حالقى اسسامبلەياسىنىڭ قىزمەتىنە جوعارى باعا بەرە كەتتى. ال ستۋدەنتتەر اتىنان ءسوز العان 1-ءشى كۋرس ستۋدەنتى ءالىم نۇراحمەت ۋنيۆەرسيتەت ستۋدەنتتەرىنىڭ ءوزىن ءوزى باسقارۋ كەڭەسى مەن وقۋ ورنىنداعى «نۇر وتان» پارتياسىنىڭ «جاس وتان» جاستار قاناتىنىڭ مۇشەلەرى جينالىپ, 14 اقپانداعى قازاقستان حالقى اسسامبلەياسى كەڭەسىنىڭ باستاماسىن تالقىلاي كەلە, وندا ءال-فارابي اتىنداعى قازۇۋ-ءدىڭ ستۋدەنتتەرىنە ءۇن قوسقاندارىن, ءسويتىپ, قازاقستاننىڭ ستۋدەنت-جاس­تارىنا ارناپ ءوز ۇندەۋلەرىن جاريا­لاعاندارىن جەتكىزە كەلە, الداعى سايلاۋعا تەك ستۋدەنتتەردى عانا ەمەس, بارشا قازاقستاندىقتاردى ءبىر كىسىدەي قاتىسۋعا شاقىردى. فەستيۆالعا ارنايى قوناق رەتىندە شاقىرىلعان قحا كەڭەسىنىڭ مۇشەسى, «باربانگ» كۇردتەر قاۋىمداستىعىنىڭ پرەزيدەنتى, عىلىم دوكتورى, پروفەسسور كنياز ميرزوەۆ: «بۇگىنگى سىزدەردىڭ بارشا ستۋدەنتتەرگە ۇندەۋ تاستاپ, ءبىزدىڭ باستامامىزعا قولداۋ ءبىلدىرىپ جاتقاندارىڭىز مەنى ەرەكشە قۋانتىپ وتىر. وسىنداي جاستارى بار ەلدىڭ ەرتەڭى ءۇشىن الاڭداماۋعا بولادى», دەپ ريزاشىلىعىن بىلدىرسە, ەل بىرلىگىنىڭ, قازاق ءتىلىنىڭ باياندى بولۋىنا تەر توگىپ جۇرگەن الماتى وبلىستىق ازەربايجان ەتنومادەني بىرلەستىگىنىڭ, «مەملەكەتتىك تىلگە قۇرمەت» بىرلەستىگىنىڭ ءتورايىمى, «دوستىق», «پاراسات» وردەندەرىنىڭ يەگەرى اسىلى وسمان ۋنيۆەرسيتەت ستۋدەنتتەرىنىڭ ونەرىنە ءدان ريزا بولدى. – اينالايىن, قاراقتارىم! بۇگىن بىزدەردى قوناق رەتىندە شاقىرىپ, وسىنداي تاماشا كونتسەرت قويىپ, ەلىمىزدىڭ جاستارىن ەلدىككە, بىرلىككە شاقىراتىن ۇندەۋ قابىلداپ جاتقاندارىڭ مەنى قاتتى تەبىرەنتىپ جىبەردى! ساياساتتى دۇرىس تۇسىنگەندەرىڭ – مىنا سەندەردى وقىتىپ جاتقان ۇستازدارىڭنىڭ ەرەن ەڭبەگى دەپ بىلەمىن», – دەپ تولعانا سويلەدى اسىلى اپايلارى. ەلىمىزدىڭ ەرتەڭى بولارلىق ءارتۇرلى ۇلت وكىلدەرىنەن تۇراتىن ستۋدەنت-جاستاردىڭ كۇشىمەن وتكىزىلگەن مەرەكەلىك فەستيۆال – قازاقستان حالقىنىڭ ىنتىماعىن پاش ەتكەندەي ۇلكەن اسەر قالدىردى. گۇلزەينەپ سادىرقىزى, «ەگەمەن قازاقستان». الماتى.