پۋتين رەسەيدى «ماسقارادان قۇتقارۋدى» تالاپ ەتتى

استانا. 5 ناۋرىز. رەسەي پرەزيدەنتى ۆلاديمير پۋتين سارسەنبى, 4 ناۋرىز كۇنى وتكەن ىشكى ىستەر مينيسترلىگىنىڭ القاسىندا سويلەگەن سوزىندە كۇش قۇرىلىمدارىنان «رەسەيدى ماسقارا مەن تراگەديادان قۇتقارۋدى» تالاپ ەتتى. بۇل تۋرالى Interfax حابارلادى. رەسەي ليدەرى مۇنى بوريس نەمتسوۆتىڭ «ارسىزدىقپەن ولتىرىلگەنىنە» بايلانىستىرا ايتتى. «اقىر سوڭىندا رەسەيدى ءبىز جاقىندا عانا باستان كەشكەن جانە كورگەن ماساقارا مەن تراگەديادان قۇتقارۋ كەرەك: مەن مۇندا استانانىڭ قاق ورتاسىندا بوريس نەمتسوۆتىڭ ءولتىرىلۋىن ەسكە الىپ, ايتىپ وتىرمىن», - دەپ مالىمدەدى پۋتين. رەسەي پرەزيدەنتى سونداي-اق ەكسترەميستەردىڭ رەسەيدەگى قيمىل-ارەكەتتەرى «بارعان سايىن ارسىز بولىپ بارا جاتقانىن» اتاپ كورسەتتى. ءپۋتيننىڭ ايتۋىنشا, ولار مۇندا «ءتۇرلى-ءتۇستى تەحنولوگيا دەپ اتالاتىن – كوشەلەردە زاڭسىز اكتسيالار ۇيىمداستىرۋدان باستاپ, الەۋمەتتىك جەلىلەردە اشىقتان-اشىق جاۋلىق پەن جەك كورۋشىلىكتى ناسيحاتتاۋعا دەيىنگى» ارەكەتتەردى پايدالانىپ قالۋعا ۇمتىلادى. ءپۋتيننىڭ پىكىرىنشە, «ولاردىڭ ماقساتتارى ازاماتتىق قاقتىعىستارعا جول اشىپ, ءبىزدىڭ مەملەكەتىمىزدىڭ كونستيتۋتسيالىق نەگىزدەرىنە, ونىڭ ەگەمەندىگىنە سوققى بەرۋ بولىپ تابىلادى». نەمتسوۆتى ءولتىرۋ ۆەرسيالارى اراسىندا «رەسەيدەگى ساياسي احۋالدىڭ تۇراقتىلىعىن بۇزۋ» دا بار. مۇرات ايتقوجا. دەرەك, سۋرەت: Interfax.