سايلاۋ ۋچاسكەلەرى تاس-ءتۇيىن دايىن بولۋلارى ءتيىس

كەشە م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ ءماجىلىس زالىندا ورتالىق سايلاۋ كوميسسياسىنىڭ حاتشىسى باقىت مەلدەشوۆ وبلىستىق, اۋداندىق جانە قالالىق سايلاۋ كوميسسيالارىنىڭ توراعاسى, حاتشىلارىمەن كەزدەستى. القاقوتان جۇزدەسۋدى وڭتۇستىك قازاقستان وبلىستىق سايلاۋ كوميسسياسىنىڭ توراعاسى الىبەك ومىراليەۆ جۇرگىزىپ وتىردى. باقىت سارسەنباي ۇلى ءوزىنىڭ شاعىن بايانداماسىندا ورتالىق سايلاۋ كو­ميسسياسىنىڭ كەزەكتەن تىس پرە­زي­دەنت­تىك سايلاۋعا بايلانىستى اتقارىپ جاتقان جۇمىستارىمەن تانىستىردى. بۇگىنگە دەيىن پرەزيدەنتتىكتەن ۇمىتكەر رەتىندە بەس ازامات تىركەلگەنىن, ەرتەڭ قاربالاستىققا جول بەرمەۋ ءۇشىن جۇمىستى بۇگىننەن باستاپ قىزۋ جۇرگىزۋ جايىن ايتتى. وبلىستىق, قالالىق, اۋداندىق سايلاۋ ۋچاسكەلەرىندە جۇمىس­قا تىڭعىلىق­تى قاراۋدى, سايلاۋشى­لاردىڭ ءتىزىمىن مۇقيات الۋدى, سايلاۋ وتەتىن 26 ساۋىردە ساپاردا بولاتىندارى ­بولسا, ولاردى ەسەپتەن شىعارىپ, بار­عان اۋماعىندا داۋىس بەرە الاتىنداي كۋالىكپەن قامتاماسىز ەتۋدى تاپ­سىردى. باقىت سارسەنباي ۇلىنىڭ قاداپ ايتقانى, سايلاۋشىلار ءتىزىم بويىنشا تولىق تۇگەندەلىپ, داۋىس بەرۋىنە بارىنشا جاعداي تۋعىزۋ كەرەك. تاعى ءبىر ەسكەرتكەنى, ەقىۇ وكىلدەرى كەلگەندە سايلاۋ ۋچاسكەلەرىنىڭ توراعالارى كوڭىل جىقپاستىققا, كەڭقولتىققا سالىپ, قۇجاتىن سۇراماي, مالىمەت بەرەدى ەكەن. بۇل قاتەلىك كەيىن ەقىۇ وكىلدەرى تاراپىنان سىنعا ۇشىراپ جاتادى. الىبەك ومىراليەۆ وڭتۇستىكتىڭ كەزەكتەن تىس پرەزيدەنتتىك سايلاۋعا سايلاۋ ۋچاسكەلەرىنىڭ تولىق دايىن ەكەندىگىن باياندادى. ورتالىق سايلاۋ كوميسسياسىنىڭ نورماتيۆتىك قۇجاتتارعا, تاعى باسقا ماسەلەلەرگە تولىق كومەك بەرىپ وتىرعانى ءۇشىن راحمەت ايتتى. «ءبىر جاعادان باس, ءبىر جەڭنەن قول شىعارىپ, بىلەك سىبانىپ سايلاۋدى تىڭعىلىقتى وتكىزەمىز», دەپ مالىمدەدى. اۋداندىق, قالالىق سايلاۋ ۋچاسكە­لەرىنىڭ توراعالارى, حاتشىلارى تاراپىنان قويىلعان سۇراقتارعا جاۋاپ بەرگەن باقىت مەلدەشوۆ وڭتۇستىكتىڭ قاشاندا سايلاۋدا بەلسەندىلىك تانىتاتىنىن, ۇيىمشىلدىعىن, بىرلىگىن اتاپ ءوتتى. – مەملەكەت باسشىسىنىڭ كەزەكتەن تىس سايلاۋ وتكىزۋ تۋرالى جارلىعىنان كەيىن ورتالىق سايلاۋ كوميسسياسى ۋاقىتپەن ساناس­پاي جۇمىسقا كىرىسىپ كەتتى, – دەدى باقىت مەلدەشوۆ جۋرناليستەرگە بەرگەن سۇحباتىندا. – وبلىستارعا, ايماقتارعا نەگىزگى قۇجاتتاردى جەتكىزىپ بەرىپ, وبلىستىق, اۋماقتىق سايلاۋ ۋچاسكەلەرىنىڭ توراعا, حاتشىلارىمەن كەزدەسىپ, قاي جۇمىس­تارعا نازار اۋدارىلۋ كەرەكتىگىن ءتۇ­سىن­­­دىرىپ جاتىرمىز. 5 ناۋرىزعا دەيىن بارلىق سايلاۋ ۋچاسكەلەرىنىڭ شەكاراسى ايقىندالىپ, اقپارات قۇرالدارىندا جاريالانادى. سايلاۋشىلاردىڭ ءتىزىمىن تۇگەندەۋگە وبلىستىق اكىمدىك, جەرگىلىكتى ءماسليحاتتار كومەكتەسەدى. ەل پرەزيدەنتىنەن ۇمىتكەرلەر بار. ولارعا قول قويۋلاردى جيناۋعا سايلاۋ پاراعى بەرىلەدى. قىسقاسى, سايلاۋشىلاردىڭ ءتىزىمى تۇگەندەلىپ, جۇمىسقا تاس-ءتۇيىن دايىن وتىرۋ كەرەك. سايلاۋ كوميسسيا­سى ۋچاسكەلەرى مەرەكە كۇندەرى دە كۇنتىزبەلىك كەستە بويىنشا جۇمىس جاسايدى. بۇگىنگى ماقسات – كەزەكتەن تىس پرە­­زيدەنتتىك سايلاۋدى ۇلكەن جاۋاپ­­كەرشىلىكپەن وتكىزۋدى ۇيىمداستىرۋ. وسىلاي دەگەن ورتالىق سايلاۋ كوميسسياسىنىڭ حاتشىسى قاجەت كومەككە, تۇسىنبەگەن سۇراقتارعا ءوزىنىڭ قاي ۋاقىتتا دا جاۋاپ بەرۋگە دايىن ەكەندىگىن جەتكىزدى. باقتيار تايجان, «ەگەمەن قازاقستان». شىمكەنت.