لينگۆيستيكالىق ءتىل اكادەمياسى اشىلدى

بۇعان دەيىن جۇمىس ىستەپ كەلگەن مەملەكەتتىك ءتىلدى وقىتۋ ورتالىعى لينگۆيستيكالىق ءتىل اكادەمياسىنا اينالدىرىلدى. ونىڭ ديرەكتورى جانات مۇحا­مەدجانوۆتىڭ ايتۋىنا قاراعاندا, اكادەميا قىزمەتى «ءۇش تۇعىرلى ءتىل» مادەني جوباسى اياسىندا ۇيىم­داستىرىلىپ, «ءتىل تۋرالى» زاڭ تالاپتارىن جۇزەگە اسىرۋعا باعىتتالادى. – مەملەكەت ءتىلدى مەڭگەرۋگە تىلەك بىلدىرگەن ەكى مىڭعا جۋىق تىڭداۋشىعا ءدارىس تەگىن جۇرگىزىلەدى. ول ءۇشىن تەندەر ارقىلى 32 ميلليون تەڭگە قاراجاتقا يە بولىپ وتىرمىز, – دەيدى «قىزىلجار» قوسىمشا ءبىلىم بەرۋ جانە قىزمەت كورسەتۋ ورتالىعى» جشس-ءنىڭ جەتەكشىسى ج. مۇحامەدجانوۆ. اكادەميادا «الاقاي» اتتى بالالار ءتىل ۇيرەنۋ ۇيىرمەسى جۇمىس ىستەيدى.وندا 5-6 جاستاعى بالدىرعاندار مەن 1-4-سىنىپ وقۋشىلارى ساباقتان تىس ۋاقىتتاردا ءوز بىلىمدەرىن جەتىلدىرە الادى. ەڭ باستى جاڭالىق سول, جۇرتشىلىقتىڭ سۇرانىمدارى ەسكەرىلىپ, اعىلشىن, نەمىس, تۇرىك تىلدەرىن ۇيرەتۋ كۋرستارى دا قۇرىلىپ وتىر. ساباق بەرۋگە جوعارى وقۋ ورىندارى مەن مەكتەپتەردەن 40-قا تارتا بىلىكتى ماماندار تارتىلعان. بولاشاقتا اقش, كانادا, تۇركيا, فران­­­تسيا, انگليا سەكىلدى مەملەكەتتەرگە با­رۋ, ءتا­جىريبە الماسۋ جولدارى دا قاراس­تىرىلعان. ءومىر ەسقالي, «ەگەمەن قازاقستان». سولتۇستىك قازاقستان وبلىسى.