زاڭ جوبالارى ماعىنالى بولعاندا ۇتىمدى

كەشە پارلامەنت ءماجىلىسىنىڭ توراعاسى قابيبوللا جاقىپوۆتىڭ توراعالىعىمەن جالپى وتىرىس ءوتىپ, وندا بىرنەشە جاڭا زاڭ جوباسى قارالىپ, تۇتاستاي ماقۇلداندى. كۇن تارتىبىنە سايكەس ءماجىلىس الدىمەن مارات سارسەمباەۆ پەن ۆلاديمير فووستى ورتالىق سايلاۋ كوميسسياسىنىڭ مۇشەسى قىزمەتىنە تاعايىندادى. «سايلاۋ تۋرالى» زاڭعا سايكەس, ورتالىق سايلاۋ كوميسسياسىنىڭ ەكى مۇشەسىن ءماجىلىس تاعايىندايدى. وسى ماسەلە بويىنشا بايانداما جاساعان زاڭناما جانە سوت-قۇقىقتىق رەفورما كوميتەتىنىڭ توراعاسى راحمەت مۇقاشەۆ ەكى ۇمىتكەردىڭ ءومىربايانى مەن ەڭبەك جولى تۋرالى ايتىپ بەردى. ۇلكەن ەڭبەك جولىنان وتكەن ەكەۋى دە قازىر ورتالىق سايلاۋ كوميسسياسىندا جۇمىس ىستەيدى. دەپۋتاتتار ەكەۋىنىڭ دە كانديداتۋرالارىنا قارسىلىق بىلدىرمەي, ولاردى وسك مۇشەسى قىزمەتىنە ءبىراۋىزدان تاعايىندادى. سونداي-اق, جالپى وتىرىس­تا «ءبىلىم بەرۋ سالاسىنداعى كەمسىتۋشىلىككە قارسى كۇرەس تۋرالى كونۆەنتسيا تۋرالى» زاڭ جوباسىمەن جۇمىستى جالعاستىرۋ قولداۋ تاۋىپ, قازاقستان رەس­پۋب­ليكاسى مەن بەلارۋس رەسپۋب­ليكاسى ۇكىمەتتەرىنىڭ اراسىن­داعى رەادميسسيا تۋرالى, قازاق­ستان رەسپۋبليكاسى ۇكىمەتى مەن ۆەت­نام سوتسياليستىك رەسپۋبلي­كاسىنىڭ ۇكىمەتى اراسىنداعى تا­بىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋ­دان جالتارۋعا جول بەرمەۋ تۋرا­لى كەلىسىمدەردى راتيفيكاتسيالاۋ تۋرالى زاڭ جوبالارى تالقى­لانىپ, ماقۇلداندى. قازاقستان رەسپۋبليكاسى مەن ماجارستان اراسىنداعى ۇستاپ بەرۋ تۋرالى شارتتى راتيفيكاتسيالاۋ تۋرالى زاڭ جوباسى تۋرالى باس پروكۋروردىڭ ءبىرىنشى ورىنباسارى يوگان مەركەل بايانداپ, بۇل زاڭ جوباسى دا ەشقانداي كەدەرگىسىز ماقۇلدانۋعا ءتيىستى ەدى. الايدا, وسى جەردە دەپۋتات ومارحان وكسىكباەۆ ورىندى سۇراق قويىپ, بايانداۋشىنى دا, باسقالاردى دا ءبىرشاما توسىلدىرىپ تاستادى. ماسەلە زاڭ جوباسىنىڭ قازاق تىلىندەگى اتاۋىنىڭ ورىس ءتى­لىندەگى تۇپنۇسقادان ءدال اۋدا­رىل­ماعاندىعىنان تۋىنداعان ەدى. ورىس تىلىندەگى «و راتيفيكاتسي دوگوۆورا مەجدۋ رەسپۋبليكوي كازاحستان ي ۆەنگريەي و ۆىداچە» دەگەن تاقىرىپ قازاقشاعا «قازاقستان رەسپۋبليكاسى مەن ما­جارستان اراسىنداعى ۇستاپ بەرۋ تۋرالى شارتتى راتيفيكاتسيالاۋ» بولىپ اۋدارىلعان. دەمەك, ورىس تىلىندەگى ماعى­نا­سىنا قاراعاندا ۇستالعان قازاق­ستان­دىق قىلمىسكەرلەردى بەرۋ دە­گەندى بىلدىرەتىن زاڭ جوباسى قا­زاقشاسىندا ماجارستان تاراپىنا «ۇستاپ بەر» دەپ, ياعني جۇمىس جۇكتەيتىن ماعىناعا اۋىسىپ كەتكەن. دەپۋتات وسى سايكەسسىزدىككە وتە دۇرىس نازار اۋداردى. ارينە, اۋدارمامەن اينالىسقاندار «و ۆىداچە» دەگەن ءسوزدى تەك «بەرۋ تۋرالى» دەپ اۋدارسا ەشقانداي كول­دەنەڭ پىكىر تۋماس ەدى, الاي­دا, ولار زاڭ جوباسىنىڭ ماعى­ناسىن اشۋ ءۇشىن وسىنداي قا­دامعا بارعانى كورىنىپ تۇردى. سول جەردە وتىرعان اۋدارما جا­سا­عان­داردىڭ وكىلى دە وسىنى ايتتى جانە ول «ۆىداچا» دەگەن ءسوزدىڭ «ۇستاپ بەرۋ» دەپ اۋدارىلاتىنى سوزدىكتە بەكىتىلگەنىن جەتكىزدى. ءبى­راق وسى جەردە زاڭ جوباسى «...ۇس­تاپ بەرۋ تۋرالى شارتتى...» ەمەس «ۇستالعانداردى بەرۋ تۋرا­لى شارتتى...» دەپ اۋدارىلسا ما­عىناسى دا اشىلىپ, سۇراق تا تۋدىر­ماس ەدى دەپ ويلادىق. جال­­پى, زاڭ جوبالارىن ورىسشا داي­ىن­دا­عان­دار دا «و ۆىداچە» دەپ تىم قىس­­قا قايىرماي, ماعىناسىن حا­­لىققا تۇسىنىكتىرەك ەتكەنى ءجون ەدى. ودان كەيىنگى «قازاقستان مەن ماجارستان اراسىنداعى سوت­تال­عان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭ جوباسى ماعىناسى دا, اۋدارماسى دا تۇسىنىكتى بولعاندىقتان, ەشقانداي سۇراق تۋدىرماي, تولىعىمەن ماقۇلداندى. ءسويتىپ, كۇن تارتىبىندەگى ماسەلەلەر تولىق قارالىپ, دەپۋتاتتار وزدەرىنىڭ ساۋالدارىن جاريالاۋعا كوشتى. جاقسىباي سامرات, «ەگەمەن قازاقستان».