مۇندا ۇلكەن جانە كىشى ءماجىلىس زالدارى, تەرگەۋ-كريميناليستىك ادىستەمەلىك بولمەلەر, كومپيۋتەرلىك تەستىلەۋ كۋرستارىنا ارنالعان بولمە, مۇراجاي جاساقتالعان. باستى ەرەكشەلىك, بەينەماجىلىس, سونداي-اق, سەلەكتورلىق بايلانىس جۇيەسى ورناتىلعان. جاڭا عيماراتتىڭ اشىلۋ سالتاناتىنا باس پروكۋرور قايرات ءمامي قاتىستى. – وبلىستىق پروكۋراتۋرا قىزمەتكەرلەرىنىڭ جاڭا عيماراتتا الاڭسىز جۇمىس جاساۋىنا بارلىق جاعداي جاسالعان. ەندى ەل زاڭدىلىقتارىنىڭ قاتاڭ قاداعالانۋىنا تولىق نەگىز بار, – دەگەن باس پروكۋرور وبلىستىق پروكۋراتۋرا ۇجىمىنا 40 كومپيۋتەردى سىيعا تارتتى. سونىمەن بىرگە, جاڭا عيمارات قۇرىلىسىنىڭ مەرزىمىندە اياقتالۋىنا قولداۋ بىلدىرگەنى ءۇشىن وبلىس اكىمى ب.رىسقاليەۆكە باس پروكۋراتۋرانىڭ قۇرمەت گراموتاسىن تاپسىردى.
جولداسبەك شوپەعۇل, اتىراۋ وبلىسى.
ورالحان وقۋلارى ەكىنشى مارتە ءوتتى. كاتونقاراعاي اۋىلىندا كوركەمسوزدىڭ كەربۇعىسى, جازۋشى ورالحان بوكەي اتىنداعى كوركەمسوز وقۋ شەبەرلەرىنىڭ بايقاۋى قاتارىنان ەكىنشى جىل كىندىك قانى تامعان ولكەسىندە بولىپ ءوتتى. وعان بيىل قالالار مەن اۋدانداردان ىرىكتەۋ سايىسىندا توپ جارعان 15 ۇمىتكەر كەلدى. ولار پروزا, دراما, پوەزيالىق شىعارمالاردان ۇزىندىلەر وقىپ, وزدەرىنىڭ شەبەرلىكتەرىن قازىلار القاسىنىڭ تەزىنە سالدى. وبلىستىق تىلدەردى دامىتۋ باسقارماسىنىڭ باستىعى ماناربەك مۇحامەتجانوۆ وسى قىزمەتتىڭ تىزگىنىن ۇستاعالى كەندى التايدا كوپ ىستەر اتقارىلىپ جاتىر. ەل مەن جەر وزدەرىنىڭ تاريحي اتاۋلارىنا يە بولۋدا. مەملەكەتتىك قىزمەتتەگىلەر اراسىنداعى ءتىل سايىستارى دا قىزىقتى ءارى تارتىستى وتۋدە. باس جۇلدەگە كۋرچاتوۆ قالاسىنان كەلگەن ورىس قىزى ينگا پۋتينتسەۆا يە بولدى. جۇلدەگەرلەرگە باعالى سىيلىقتار تابىس ەتىلدى.
وڭداسىن ەلۋباي, شىعىس قازاقستان وبلىسى, كاتونقاراعاي اۋدانى.
ونەركاسىپ كورمەسى ءورىسىن كەڭەيتتى. اقتوبە قالاسىنداعى “الاتاۋ” كەشەنىندە ءوتىپ جاتقان “ەۋروپا-ازيا. شەكاراسىز ىنتىماقتاستىق” اتتى ءىح قازاقستان-رەسەي ونەركاسىپ كورمەسىنە ەلىمىزدىڭ بارلىق ايماقتارىنان جانە رەسەيدىڭ بىرقاتار وبلىستارىنان 150-گە جۋىق كاسىپورىن, شاعىن جانە ورتا بيزنەس سۋبەكتىلەرى قاتىسۋدا. جىل سايىن كورمەنىڭ اياسى كەڭەيىپ, وعان قاتىسۋشىلار قاتارى ارتىپ كەلەدى. بيىل توعىزىنشى رەت وتكىزىلىپ وتىرعان كورمەنى ۇيىمداستىرۋشىلار – اقتوبە وبلىسىنىڭ اكىمدىگى, ورىنبور وبلىسىنىڭ ۇكىمەتى, ورىنبور قالاسىنىڭ اكىمشىلىگى, كورشىلەس ەكى وبلىستىڭ ساۋدا-ونەركاسىپ پالاتالارى, اقتوبە وبلىستىق كاسىپكەرلەر مەن جۇمىس بەرۋشىلەر وداعى, “ۋرالەكسپو” قوعامى. كورمەگە ءبىرىنشى رەت بەلورۋسسيانىڭ “قۋزليتماش” كومپانياسى ءوز ونىمدەرىن اكەلىپتى. ونەركاسىپ كورمەسىنە قاتىسۋشىلار ءوزارا ءتيىمدى كەلىسىم-شارتتار جاساستى.ونى وبلىس اكىمى ەلەۋسىن ساعىندىقوۆ پەن ورىنبور وبلىسىنىڭ گۋبەرناتورى يۋري بەرگ باستاعان دەلەگاتسيالار ارالاپ كوردى.
ساتىبالدى ءساۋىرباي, اقتوبە وبلىسى.
دەميرەل اتىنداعى جاڭا ۋنيۆەرسيتەت. جەتىسۋ جەرىندە جوعارى وقۋ ورىندارىنىڭ قاتارى جاڭاسىمەن تولىقپاق. ىرگەلى وقۋ ورنى قاسكەلەڭ قالاسىنىڭ كىرەبەرىسىنە ورىن تەبەتىن بولادى. وعان تاپسىرىس بەرۋشى دە, نىساندى سالىپ جاتقان دا تۇرىك اعايىندار. بولاشاقتا سۇلەيمەن دەميرەل اتىنداعى ۋنيۆەرسيتەت قالاشىعىنا اينالاتىن وقۋ ورنىنداعى سەگىز فاكۋلتەتتە 7000 ستۋدەنت ءدارىس الماقشى. قازىرگى كەزدە ۋنيۆەرسيتەت قۇرىلىسىنىڭ ءبىرشاما جۇمىسى يگەرىلگەن. 2500 ستۋدەنتكە جاتاقحانا بەرىلسە, 120 وقىتۋشى 5 قاباتتى تۇرعىن ۇيدەگى پاتەرلەرمەن قامتاماسىز ەتىلەدى. دەمەك, جاڭا ۋنيۆەرسيتەت كەلەر جىلى شاكىرتتەرگە ەسىگىن ايقارا اشاتىن بولادى.
كۇمىسجان بايجان, الماتى وبلىسى.
مال سويۋ تسەحى ىسكە قوسىلدى. زەلەنوۆ اۋدانى ترەكين اۋىلىندا جاڭا مال سويۋ تسەحى سالىنىپ, ىسكە قوسىلدى. ونىڭ بازاسىندا اۋىل شارۋاشىلىعى تاۋارلارىن وندىرۋشىلەر مەن ماماندار باس قوسىپ, سەمينار-كەڭەس ۇيىمداستىردى. وندا وبلىستىق اۋىل شارۋاشىلىعى باسقارماسىنىڭ باستىعى مارات وڭعاربەكوۆتىڭ اتاپ وتكەنىندەي, ازىق-ت ۇلىك قاۋىپسىزدىگىن قامتاماسىز ەتۋ ماقساتىندا مۇنداي نىسانداردى وبلىستىڭ وزگە دە اۋىلدارىندا تەزدەتىپ اشۋدىڭ ماڭىزى زور. لابوراتوريالىق-سانيتارلىق ساراپتاما جۇرگىزۋگە ليتسەنزيا العان, قازىرگى زامانعى مالدارىگەرلىك قاداعالاۋ تالاپتارىنا تولىق ساي كەلەتىن اتالمىش تسەح اۋىسىمىنا 30-50 باس مال سويا الادى. ونى ىسكە قوسقان “جاردەم” شارۋا قوجالىعىنىڭ باسشىسى سەرىكقالي اجيەۆتىڭ ايتۋىنشا, نىسان قۇنى 18 ميلليون تەڭگەنى قۇراعان.
تەمىر قۇسايىن, باتىس قازاقستان وبلىسى.
جول اپاتىنان ساقتاندىرادى. سولتۇستىك قازاقستان وبلىستىق جول پوليتسياسى جول قوزعالىسىنىڭ قاۋىپسىزدىگى ماقساتىندا ارنايى اكتسيالاردى جۇيەلى وتكىزىپ كەلەدى. سولاردىڭ ءبىرى وبلىس ورتالىعىن قامتىدى. شارا بارىسىندا اپاتقا ۇشىراعان كولىكتەر ەۆاكۋاتورلارعا تيەلىپ, كولوننا قۇراعان كۇيى ورتالىق كوشەلەرمەن ءجۇرىپ ءوتتى. جۇرگىزۋشىلەر مەن جاياۋ جۇرگىنشىلەرگە ۇنپاراقتار تاراتىلىپ, اباي بولۋدىڭ جاي-جاپسارى ءتۇسىندىرىلدى. بيىلعى 6 ايدا 112 جول اپاتى بولىپ, 23 ادام كوز جۇمعان. 130 ادام دەنە جاراقاتتارىن العان. ولاردىڭ 12-ءسى – بالالار. ماي قىزمەتكەرلەرىنىڭ ايتۋلارىنشا, جول ءجۇرۋ ەرەجەسىنىڭ بۇزىلۋىنا الدىمەن جاياۋ جۇرگىنشىلەر كىنالى. جۇرگىزۋشىلەر اراسىندا جىلدامدىقتى اسىرۋ, قارسى بەتكە شىعىپ كەتۋ فاكتىلەرى ءجيى كەزدەسەدى.
ءومىر ەسقالي, سولتۇستىك قازاقستان وبلىسى.
