ارداگەرلەر – الاكولدە

شىعىس ءوڭىرى مارجاندارىنىڭ ءبىرى – الاكول. شيپالى سۋ شارا­پا­تىنىڭ داڭقى جىل ساناپ ارتىپ كەلەدى. سايكەسىنشە, كول جاعالاۋىنداعى ينفراقۇرىلىم دا جاقسارعانىنا كۋا بولىپ ءجۇرمىز. جاقىندا ءۇرجار اۋدانىنىڭ 75 ارداگەرى الاكول جاعالاۋىنداعى «ءۇرجارايىم» دەمالىس لاگەرىندە تەگىن دەمالدى. بىلتىر اتالعان دەمالىس ۇيىندە 50 قاريا دەمالعان بولاتىن. كەلەر جىلى دەمالۋشى قارتتار قاتارىن بيىلعىدان دا كوبەيتۋ كوزدەلىپ وتىر. «ۇلكەنگە – قۇرمەت, كىشىگە – ىزەت» اتتى ارداگەرلەردىڭ باسقوسۋى مەن دەمالىسىنا ءۇرجار اۋدانىنىڭ اكىمى سەرىك زاينۋلدين ۇيىتقى بولدى. اۋدان باسشىسى اتالعان شارانىڭ اشىلۋىندا ارداگەرلەرگە مەملەكەت تاراپىنان زور كوڭىل بولىنەتىنىن, الاكول جاعالاۋىنداعى دەمالىس سونىڭ ءبىر ايعاعى ەكەنىن اتاپ ءوتتى. اۋداننىڭ 27 اۋىلدىق وكرۋگىنەن كەلگەن ارداگەرلەر قاتارىندا ۇزاق جىلدار بويى تۋعان ەلى مەن جەرىنىڭ دامۋىنا ۇلەس قوسقان قارتتار, سوعىس جانە ەڭبەك ارداگەرلەرى, «التىن القا» مەن «كۇمىس القا» يەگەرلەرى بار. ءبىر اپتاعا سوزىلعان دەمالىس ماۋسىمىندا جىلجىمالى مەديتسينالىق كەشەن قىزمەت كورسەتىپ, ارداگەرلەر دارىگەرلىك تەگىن تەكسەرۋدەن ءوتتى. سونداي-اق, اۋىل كىتاپحانالارىنىڭ قىز­مەتكەرلەرى قاريالاردى ادەبي كىتاپتارمەن قامتاماسىز ەتسە, اۋداندىق سپورت ءبولىمى ارداگەرلەر اراسىندا شاحمات, دويبى جانە باسقا دا سپورت تۇرلەرىنەن جارىس­تار ۇيىمداستىردى. ال اۋدان ونەرپازدارى كۇندەلىكتى مەرەكەلىك كونتسەرت ۇسىندى. اتالعان شارادا وبلىستىق ارداگەرلەر كەڭەسىنىڭ توراعاسى ۆاسيلي احاەۆ ۇلى وتان سوعىسىنان كەيىنگى ەل ەكونوميكاسىن وڭالتۋعا ايتارلىقتاي ۇلەس قوسقان تىل جانە ەڭبەك ارداگەرلەرىنىڭ قوعامداعى ورنى زور ەكەنىن, بۇگىندە ارداگەرلەرگە مەملەكەت تاراپىنان الەۋمەتتىك جەڭىلدىكتەر, ءتۇرلى شيپاجايلارعا دەنساۋلىقتارىن تۇزەتۋگە جولدامالار بەرىلىپ جاتقانىن جەتكىزدى. – بۇل – وسكەلەڭ ۇرپاق ءۇشىن تاعىلىمى مول شارا. ءوڭىرىمىزدىڭ ارداگەرلەرى باس قوسىپ, جىگەرلى جاستىق شاقتارىن ەسكە الىسىپ, ارقا-جارقا بولىپ جاتىر. تاياۋدا استانادا وتكەن سەمينار-كەڭەسكە قاتىستىم. جيىندا جەرگىلىكتى اتقارۋشى ورگاندار مەن ارداگەرلەر ۇيىمدارىنىڭ ءوزارا ءىس-قيمىلىن ورىستەتۋ جونىندە ناقتى تاپسىرمالار جۇكتەلدى. بۇگىن وسى شارانىڭ ءىس جۇزىنە اسىرىلعانىنا كۋا بولىپ وتىرمىز, – دەدى ۆاسيلي يۆانوۆيچ. «ءۇرجارايىم» دەمالىس كە­شەنىندە ءبىر-بىرىمەن قاۋ­قىل­داسىپ, ازىلدەسىپ, ارقا-جارقا وتىرعان قاريالاردى سوزگە تارت­تىق. اۋداندىق ارداگەرلەر كەڭەسىنىڭ توراعاسى نۇرلانبەك ساندىباەۆ, اقشوقى اۋىلدىق اقساقالدار كەڭەسىنىڭ توراعاسى نيازحان ءجۇمادىلوۆ بۇگىندە ءۇرجاردىڭ ءۇر مەكەنگە اينالىپ, گۇلدەنىپ, كوركەيىپ كەلە جاتقانىن اتاپ وتسە, قارابۇلاق اۋىلىنىڭ اقساقالدارى ماحادي راحيموۆ, ءابىلحاميت ىسقاقوۆ ۇزاق جىلعى ەڭبەكتى ەسكەرىپ, اقىسىز-پۇلسىز دەمالىس ۇيىمداستىرعان اۋدان باسشىلىعىنا العىستارى شەكسىز ەكەنىن جەتكىزدى. ناۋالى اۋىلىنىڭ تۇرعىنى تىلەۋحان ورازيمانوۆا 10 بالا ءوسىرىپ, تاربيەلەگەن «ارداقتى انا», «التىن القا» يەگەرى ەكەن. ەلۋ جىل بويى مال شارۋاشىلىعىندا ەڭبەك ەتكەن اجە 25 نەمەرە-شوبەرە ءسۇيىپ وتىرعانىن, ەل امان, جۇرت تىنىش بولسا, جانعا باراقات تا بولاتىنىن ايتتى. دۋمان اناش, «ەگەمەن قازاقستان». شىعىس قازاقستان وبلىسى, ءۇرجار اۋدانى.