اقىن ساياباعى

ەلىمىزدەگى ەتەك-جەڭى جيناقى شاعىن شاھارلاردىڭ ىشىندە كەلبەتتى كوركىمەن بىردەن باۋراپ الاتىن قالا بولسا, ول – زايسان. ساۋىر تاۋىنىڭ ەتەگىندە سامالاداي جارقىراپ جاتقان زايسان قالاسىنىڭ كىرە بەرىسىندە اباي ساياباعى ورنالاسپاق.   تاياۋدا اۋدانداعى ساپارى­مىزدىڭ اياسىندا ۇلى اقىننىڭ اتىنداعى ساياباق جوباسىمەن تانىستىق. وعان تاپسىرىس بەرۋشى – زايسان قالاسىنىڭ اكىمدىگى. مەردىگەرى – جەرگىلىكتى «سمۋ شىعىس» جشس. اتالعان جوباعا جەرگىلىكتى بيۋدجەتتەن 64 ملن. تەڭگە قارجى ءبولىندى. وعان ساياباق اۋماعىندا سۋبۇرقاق, گۇلدەر مەن كوگالداردى سۋا­رۋ جەلىلەرى, ەلەكتر شامدارى مەن دەمالىس ورىندارى ورناتىلادى. سونداي-اق, وسى جەردە ەڭ ۇلكەن نىسان – حان شاتىر سالىنادى. ال ساياباقتىڭ الدىنا اقىننىڭ ءمۇسىنى ورنالاسادى. اسىق, بايگە, قىز قۋ سىندى قازاقتىڭ ۇلتتىق قۇندىلىقتارى شاعىن مۇسىندىك كومپوزيتسيالارمەن كورىنىس تاباتىن بولادى. سونىمەن بىرگە, مۇندا جوسپار بويىنشا مۇز ايدىنى, روليك تەبۋگە ارنالعان الاڭ, قازاقتىڭ ۇلتتىق ناقىشتاعى جادىگەرلەرى مەن بۇيىمدارىن ساۋدالاۋعا ارنالعان دۇكەن بوي كوتەرمەك. كوركەمدىك ءۇشىن دەكوراتيۆتى اعاشتار وتىرعىزىلادى. 25 ادامدى جۇمىسپەن قامتىپ وتىرعان قۇرىلىس الاڭىندا قىزۋ جۇمىس ءجۇرىپ جاتىر. جۇمىس كۇزدە اياقتالماق. – قازىرگى كەزدە ساياباقتىڭ ىشىندەگى جولدار مەن الاڭقايلارعا تاس توسەنىشتەر توسەۋ جانە ساياباق اۋماعىن قورشاۋ جۇمىستارى جۇرگىزىلدى. ءبىزدىڭ ماقساتىمىز – اباي ساياباعى ارقىلى تالىمدىك-تاربيەلىك ماڭىزى بار الاڭ قۇرۋ. بۇل قالامىزعا كەلگەن قوناقتار مەن قالا تۇرعىندارىنىڭ سەيىلدەپ, سەرگيتىن تاماشا ورىندارىنىڭ ءبىرى بولادى دەگەن ويدامىز, – دەدى اۋداندىق ساۋلەت-قۇرىلىس, تۇرعىن ءۇي, كوممۋنالدىق شارۋاشىلىق, اۆتوكولىك جولدارى جانە جولاۋشى كولىگى ءبولىمىنىڭ باسشىسى اسحات وتەباەۆ. ايتا كەتكەن ابزال, ءيسى ادامزاتقا ورتاق اباي حاكىمنىڭ ۇرپاقتارىنىڭ ءبىرى – كۇلزيپا يسرايىلقىزى زايسان قالاسىندا تۇرىپ, بىلتىر دۇنيەدەن وتكەن بولاتىن. وسى ورايدا ۇلى اباي­دىڭ 170 جىلدىق مەرەيتويى­نا وراي سالىنىپ جاتقان ساياباق­تىڭ ءبىر بۇرىشىندا اقىننىڭ زاي­ساندىق ۇرپاعىنا دا ءبىر كورنەكى اق­پاراتتىق ورىن بەرۋ جونىندەگى ۇسى­نىسىمىزدى جەتكىزدىك. دۋمان اناش, «ەگەمەن قازاقستان». شىعىس قازاقستان وبلىسى, زايسان اۋدانى.