جىرعا جانىن بولەگەن اقىن

استانا قالاسىنداعى عافۋ قايىربەكوۆ اتىنداعى №2 مەكتەپ-گيمنازيادا قالا مەكتەپتەرىنىڭ 5-11 سىنىپ وقۋشىلارى اراسىندا «ايدىنى كەڭ ارقالى اقىن» اتتى اقىن ولەڭدەرىن جاتقا وقۋدان جارىس ءوتتى. شارا عافۋ اقىننىڭ 85 جىل­دىعىنا ارنالدى. ولەڭ دوداسىنا 50-گە جۋىق وقۋشى قاتىسىپ, وعان اقىننىڭ ۇلى, شاكەن ايمانوۆ اتىنداعى «قازاقفيلم» كينو­ستۋدياسىنىڭ پرەزيدەنتى باقىت عافۋ ۇلى قاتىسىپ ءسوز سويلەدى. «بۇگىن اكەمنىڭ ارۋاعى ءبىر اۋناپ تۇسكەن شىعار, جاس ۇرپاق­تى ولەڭگە, اكەم سەكىلدى تابيعاتقا, ەل مەن جەرگە عاشىق ەتۋ جولىندا جاساپ جاتقان ەڭبەكتەرىڭىزگە العىسىم شەكسىز», دەي كەلىپ, باقىت قايىربەكوۆ مەكتەپ كىتاپحاناسىنا ءوزىنىڭ ورىس تىلىندە جازىلعان كىتاپتارىن تابىس ەتتى. مەكتەپ ديرەكتورى گاميل ماعاجىر ۇلى قالا دەڭگەيىندە وتكىزىلىپ وتىرعان جيىننىڭ ماڭىزدىلىعىن ايتا كەلىپ, عافۋ اقىننىڭ ەسىمىمەن اتالاتىن ءبىلىم شاڭىراعىندا اقىن ولەڭى مەن ءومىرىن جاس ۇرپاققا ناسيحاتتاۋ ءىسىنىڭ وتە جوعارى دەڭگەيدە قول­عا الىنىپ وتىرعانىن, اقىن مۇراجايى قالالىق دەڭگەيدە وتكەن جارىستاردا جۇلدەلى ورىنداردان كورىنگەنىن تىلگە تيەك ەتتى. اقىن, دراماتۋرگ, عافۋ اقىننىڭ رۋحاني شاكىرتى بايانعالي ءالىمجانوۆ توراعالىق ەتكەن شارادا تىلدەردى دامىتۋ باسقارماسى ونوماستيكا ءبولىمىنىڭ باسشىسى ايجان وراققىزى جانە استانا قالالىق ءبىلىم باسقارماسىنىڭ ادىسكەرى كۇنىمبالا ىزتىلەۋقىزى مەن مەكتەپ ديرەكتورىنىڭ تاربيە ءىسى جونىندەگى مەڭگەرۋشىسى سالتانات كامپيتوۆا جاس ورەندەردىڭ ونە­رىنە باعا بەردى. سونداي-اق, گيم­نازيانىڭ قازاق ءتىلى مەن ادەبيەتى ءپانىنىڭ مۇعالىمدەرى الما نۇرەكەنوۆا, ايگۇل زالە­تاەۆا, ءلاززات تۇرىمتاەۆا, انار ايتاقوۆالار جيىننىڭ جوعارى دەڭگەيدە وتۋىنە اتسالىستى. تورعايدان تۇلەپ ۇشقان عافۋ قايىربەكوۆ قازاق ادەبيەتى مەن مادەنيەتىنە ەرەكشە سارا جول سالعان تۇلعا دەسەك, عافۋ اعانىڭ جۋرناليستيكا, باسپا ءىسى, ءان ونەرى, دراما ونەرى, پوەزيا مەن اۋدارما سالاسىنداعى قىرۋار دۇنيەلەرىنىڭ ارقايسىسى بولەك-بولەك زەرتتەلۋگە تۇراتىن قىمبات مۇرا دەۋ كەرەك. اقىننىڭ «قازاق ادەبيەتى» گازەتى مەن «جۇلدىز» جۋرنالىندا ەڭبەك ەتىپ, جازۋشىلار وداعىنىڭ پوەزيا سەكتسياسىن باسقارۋى سول كەزەڭ ءۇشىن وڭاي شارۋا ەمەس ەدى. «قۇرداستار» جيناعىنان سوڭ «دالا قوڭىراۋى» پوەماسى, «جەر استىنداعى جۇلدىزدار», «قاناتتى جىلدار» ەڭبەگى, «بەلاسار» قوس تومدىعى مەن «جۇلدىزدى تاع­دىرلار» اتتى ولەڭدەر جيناعى وقىرمان جۇرەگىنە جول تاپتى. ءسوي­تە ءجۇرىپ, اۋدارما دەيتىن اۋىر جولدا رۋداكيدىڭ, بايروننىڭ, پۋش­­كيننىڭ, لەرمونتوۆتىڭ, تول­ستويدىڭ تۋىندىلارىن ءتارجىمالادى. مەكتەپ وقۋشىلارى اراسىندا اقىن ولەڭدەرىن كەڭىنەن ناسيحاتتاۋ, ولەڭ-ءسوزدىڭ قۇدىرەتىن ۇعىنۋ, جاس اقىندارعا الەۋمەتتىك-رۋحاني قولداۋ ءبىلدىرۋ – شارا­نىڭ باستى ماقساتى رەتىندە بەلگىلەنسە, وقۋشىلار وقىعان ولەڭ وسى ءۇمىتتى اقتاي الدى. اقىن ولەڭدەرىنەن العاش رەت ءوتىپ وتىرعان بۇل جارىس الداعى ۋاقىتتا توقتاپ قالماي, تاعى دا جالعاسا بەرەتىن بولىپ شەشىلدى. سەبەبى, عافۋ اقىن ولەڭدەرىنىڭ ماقامى جاتتاۋعا وڭاي, كوڭىلگە قونىمدى, تاربيەلىك ءمانى اسا زور. ايتپاقشى, اقىن اعامىز بالالار تاقىرىبىن نازاردان تىس قالدىرىپ قويعان ەمەس. قالامگەردىڭ بۇل ورايدا «بالىقشى يۆان», «بالقۋراي», «كۇن بالاسى», «اق كويلەكتى شال» اتتى كىتاپتارىن وقىعان بالالار كوپ قىزىققا كەنەلەرى ءسوزسىز. ولەڭ دوداسىنا قاتىسۋشىلاردىڭ دەنى عافۋ اقىننىڭ «ءبىزدىڭ ايدار مەكتەپتە», «سىيلاستىققا نە جەتسىن», «عافۋ-عافۋرالار», «دومبىرا», «قازاق قىزىنا», «مەنىڭ ءۇيىم», «الماتىدا اۋىل بار», «كوك بايراق», «ۇستازبەن سىرلاسۋ» ولەڭدەرىن جاتقا وقى­دى. ەكى كەزەڭنەن تۇرعان بايقاۋدىڭ ناتيجەسىندە جۇلدەلى ءى ورىندى ماديار مىسىرعاجى جەڭىپ السا, ءىى ورىن ءدىلناز قۇدايبەرگەنوۆاعا بۇيىردى, ءىىى ورىندى مەرۋەرت ەرتاەۆا, ارايلىم وتەپبەرگەن مەن رابيعا شايحىسلام ءبولىستى. «عافۋ ىزىمەن» ايدارىندا وقۋشىنىڭ ءتول تۋىندىسى تىڭدالدى. جۇلدە ۇلەستىرگەندە ءى ورىندى ادىلەت قانافين قانجىعاسىنا بايلاسا, ءىى ورىندى اياۋلىم قۋانىشەۆا مەن قادىرگۇل الدانازار يە­لەندى, ءىىى ورىندى اياجان ەسقارا, اياجان ءشۇيىنىشباي مەن سىمبات بايبەيسەنوۆا مىسە تۇتتى. پوە­زيانىڭ شىڭىنا ادالدىق پەن ارقالى جىردى تۋ ەتىپ ىلگەن ايدىنى كەڭ ارقالى اقىن جىرىنىڭ شۋاعى قانداي مول ەدى... قۇندىز ەرالى.