شىعىس قازاقستاندا 56 جولاۋشى قار قۇرساۋىنان قۇتقارىلدى

استانا. 31 ناۋرىز. شىعىس قازاقستان وبلىسى تارباعاتاي اۋدانىندا تاڭ الدىندا 2 اۆتوبۋس قار قۇرساۋىنان قۇتقارىلدى. بۇل تۋرالى «24kz» حابارلادى. حابارلامادا كورسەتىلگەندەي, «قاراعاندى-اياگوز-بوعاس» تاسجولىنىڭ 800-شاقىرىمىندا اۋدان ورتالىعى – اقسۋات اۋىلىنان 150 شاقىرىم قاشىقتىقتاعى قىزىلكەسىك اۋىلدىق وكرۋگىنە قاراستى جىڭىشكە ەلدى مەكەنى تۇسىندا قالىڭ جاۋعان قار مەن قاتتى بوران سالدارىنان جولدا تۇرىپ قالعان جولاۋشىلار اۆتوبۋسىنان 56 ادام قاۋىپسىز جەرگە كوشىرىلگەن. ولاردىڭ ارسىندا 9 بالا بار. اۆتوبۋستار توقتاپ قالعان جەردە ۇيالى بايلانىس تا بولماعان. قۋانىشقا قاراي, جولاۋشىلاردىڭ اۋىلداعى تۋىستارى قۇتقارۋ قىزمەتىنە اتالمىش جاعدايدى حابارلاعان. بوراندا قالعان ادامدارعا كومەككە وبلىستىق توتەنشە جاعدايلار دەپارتامەنتىنىڭ قۇتقارۋشىلارى مەن ءورت ءسوندىرۋ قىزمەتى قاتىستى. ولار توتەنشە وقيعا ورنىنا جول تالعامايتىن كولىكتەرمەن جەتكەن. قازىرگى تاڭدا بارلىق جولاۋشىلار قىزىلكەسىك اۋىلىنا جىلىنىپ, تاماقتانىپ الۋ ءۇشىن جەتكىزىلگەن. بۇدان كەيىن ولار ساپارلارىن تاڭ اتا باسقا اۆتوبۋستارمەن جالعاستىردى. كومەك دەر كەزىندە جەتكەندىكتەن, زارداپ شەككەندەر جوق. جولدىباي بازار. دەرەك: «24kz». سۋرەت: «حابار» تەلەارناسى.