ءبىزدىڭ بازارداعى وتانداستارىمىز ءۇش ايعا دەيىن تولەمنەن بوساتىلادى

قايرات بالابيەۆ, وڭتۇستىك قازاقستان وبلىستىق بازارلار قاۋىمداستىعىنىڭ توراعاسى. ەلباسىنىڭ بيزنەس وكىلدەرى, ءىرى ەكسپورتتاۋشى, «اتامەكەن» ۇلتتىق كاسىپكەرلەر پالاتاسى وكىلدەرىمەن وتكىزگەن كەڭەسىن تىڭدادىق. ورىن العان جاعداي ءبىزدىڭ ەلدە عانا بولىپ جاتقان جوق, الەمدى قامتىعان داعدارىستان قاۋىپتەنبەيمىز دەگەن مەملەكەتتى جانە كورىپ وتىرعان جوقپىز. مەملەكەت باسشىسى مۇناي مەن مەتالل باعاسىنىڭ بەس جىلعا دەيىن تومەندەيتىندىگى ىقتيمال ەكەندىگىن ايتتى. بارلىق مەملەكەتتەردىڭ ۆاليۋتالارى قۇنسىزدانىپ جاتقاندا ءبىزدىڭ دوللارعا قاتىستى باعامدى ۇستاپ تۇرۋعا تىرىسۋىمىز جەل ديىرمەندى توقتاتۋعا ۇمتىلعان دون كيحوتتىڭ ارەكەتىندەي بولىپ قالار ەدى. ءبىر جىلدىڭ وزىندە دوللاردى تەجەۋگە ۇلتتىق قوردان ون ميللياردتاعان قارجى جوعالتتىق. اسىرە بەلسەندىلەردىڭ بايبالامىنا قۇلاق اسىپ, ءارى قاراي وسى ارەكەتتى جاسار بولساق, وندا مەملەكەتىمىز قيىن جاعدايعا تۇسەدى. مۇنى حالىق بولىپ ۇعىپ, ەلباسىنىڭ جاڭا ەكونوميكالىق ساياسات جونىندەگى تاپسىرمالارىن ءبىر كىسىدەي ورىنداۋعا ءتيىسپىز. مەن ءوزىم كەنتاۋلىقپىن. ەلباسى كەڭەستە قازاقستاننىڭ ماقتانىشىنا اينالعان كەنتاۋ ترانسفورماتور زاۋىتىنىڭ بۇگىنگى قيىن احۋالىن مىسالعا كەلتىردى. باسەكەگە قابىلەت تومەندەگەن, 50 جۇمىسشى قىسقارعان, مەملەكەتكە 30 ملن. تەڭگەنىڭ سالىعى تولەنبەگەن. ءبىز باعانى ىرقىنا جىبەرۋ ارقىلى عانا كاسىپورىندارىمىزدى باسەكەگە قابىلەتتى ەتە الامىز. سوندىقتان, ەلباسىنىڭ شەشىمى قازاقستاندىق كاسىپكەرلەردىڭ پايداسىنا جۇمىس جاسايتىندىعى ءسوزسىز. ارينە, دوللار باعامىنىڭ بوساتىلۋى حالىققا اۋىر تيەدى. كورشى مەملەكەتتەن ازىق-ت ۇلىك تاسۋشىلار كىرىس-شىعىستارىن ەسەپتەپ, تاۋارلارىن قايتا باعالاۋدان وتكىزىپ جاتىر. وسىعان بايلانىستى شىمكەنت قالاسىنىڭ اكىمى عابيدۋللا ءابدىراحيموۆ شۇعىل جيىن وتكىزىپ, باعا تۇراقتىلىعىن قامتاماسىز ەتىپ ارنايى شتاب قۇردى. شتاب مۇشەلەرى كۇنىنە ەكى رەت دۇكەن, بازارلارعا شىعىپ, باعانىڭ شارىقتاپ كەتپەۋىن قاداعالايدى. مەن – قازاقستان ازاماتىمىن. بۇگىندە تابىسقا شىققان كاسىپكەر بولسام ول – مەملەكەتىمىزدىڭ بيزنەس وكىلدەرىنە جاساعان قامقورلىعىنىڭ ارقاسى. اقشا بارىمىزگە كەرەك. مەن دە نەسيە الىپ جۇمىس جاساپ جاتقان كاسىپكەرمىن. وسىنداي سىن ساعاتتا ءۇنسىز قالۋىمىز ازاماتتىعىمىزعا سىن. سوندىقتان, وزىمە قاراستى بازارلارداعى ساۋداگەرلەردى ءۇش ايعا دەيىن تولەمنەن بوساتۋعا شەشىم قابىلدادىم. بۇل ازىق-ت ۇلىك باعاسىنىڭ, باسقا دا تاۋارلاردىڭ نەگىزسىز قىمباتتاۋىنا توقتام بولادى. ەلدىڭ ەرتەڭىن ويلاعان ەلباسىمىزدىڭ ساياساتىنا وسىلاي قولداۋ بىلدىرگىم كەلەدى. مۇمكىندىگىنە قاراي بارشا كاسىپكەرلەردى دە وسىنداي يگى ىسكە شاقىرار ەدىم. شىمكەنت.