استانا. 30 ماۋسىم. باس پروكۋروردىڭ ورىنباسارى جاقىپ اسانوۆ باستاعان قازاقستان دەلەگاتسياسى تۇركيانىڭ ءادىل سوت اكادەمياسىنىڭ جۇمىسىن ۇيىمداستىرۋ تاجىريبەسىمەن تانىسىپ قايتتى. توپ قۇرامىندا پارلامەنت دەپۋتاتى نۇرلان ءابدىروۆ, پرەزيدەنت اكىمشىلىگى ءبولىم مەڭگەرۋشىسىنىڭ ورىنباسارى الەكسەي كالايچيدي, جوعارعى سوتتىڭ, باس پروكۋراتۋرانىڭ جانە بىرقاتار وبلىستىق پروكۋراتۋرانىڭ وكىلدەرى بولدى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى.
دەلەگاتسيانىڭ ساپارىنا تۇركيا ۇكىمەتى جانىنداعى تۇركيا ىنتىماقتاستىق جانە ۇيلەستىرۋ جونىندەگى اگەنتتىك (TIKA) پەن قازاقستاننىڭ تۇركياداعى ەلشىلىگى قولداۋ كورسەتتى.
قازاقستاننان بارعان مەيماندار اكادەميا باسشىلىعىمەن كەزدەسىپ, وقۋ ورنى قىزمەتىنىڭ نەگىزگى باعىتتارىمەن تانىستى. تۇركيالىق ارىپتەستەر وقۋ مەكەمەسىنىڭ قۇرىلىمى, مۇنداعى وقۋ ءىسىنىڭ ەرەكشەلىكتەرى تۋرالى جانە تىڭداۋشىلاردىڭ ساناتتارىن ارتتىرۋ, عىلىمي-ادىستەمەلىك, سونداي-اق, ماتەريالدىق-تەحنيكالىق بازاسى جايىندا اڭگىمەلەپ بەردى.
ءادىل سوت اكادەمياسى سۋديا نەمەسە پروكۋرور ماماندىعىن تاڭداعان ءاربىر زاڭگەر ءبىلىم الۋعا مىندەتتى, ايرىقشا مارتەبەگە يە ءبىلىم بەرۋ مەكەمەسى بولىپ تابىلادى. مەكەمە الەمنىڭ 80-نەن استام ەلدەرىنىڭ وقۋ ورىندارىمەن جانە قۇقىق قورعاۋ ورگاندارىمەن بەلسەندى ىنتىماقتاستىق ورناتقان. مۇنداعى وقۋ باعدارلاماسى تىڭداۋشىلارعا تەوريالىق ءبىلىمدى پروكۋرورلىق جانە سۋديالىق جۇمىستارمەن ءىس جۇزىندە بايلانىستىرا وتىرىپ سىڭىرەدى. ءدارىس بەرۋ جۇمىستارىن تاجىريبەلى پروكۋرورلار مەن سۋديالار جۇزەگە اسىرادى.
ساپار بارىسىندا قازاقستاننىڭ تۇركياداعى ەلشىسى جانسەيىت تۇيمەباەۆ ءادىل سوت اكادەمياسىنىڭ پرەزيدەنتى يالماز اكچيل مىرزاعا, ونىڭ ەكى ەلدىڭ وكىلەتتى ورگاندارى اراسىنداعى ءوزارا ىقپالداستىقتى دامىتۋعا قوسقان ايرىقشا ۇلەسىن اتاپ كورسەتە وتىرىپ, «قازاقستان مەن تۇركيا اراسىنداعى دوستىق پەن ىنتىماقتاستىقتى دامىتقانى ءۇشىن» ەستەلىك مەدالىن تاپسىردى.
سونىمەن قاتار, ساپار اياسىندا جەكەلەگەن مەملەكەتتىك ورگانداردىڭ ءبىرىنشى باسشىلارىمەن قىزمەتتىك كەزدەسۋلەر ۇيىمداستىرىلدى. اتاپ ايتقاندا پارلامەنتتىڭ باس حاتشىسى يرفان نەزيروگلۋمەن, كونستيتۋتسيالىق سوت توراعاسىنىڭ مىندەتىن اتقارۋشى بۋرحان ۋستۋنمەن, قىلمىستىق جانە ازاماتتىق ىستەر بويىنشا جوعارعى سوت توراعاسى يسمايل رۋشتۋمەن, جوعارعى اسكەري سوت توراعاسى احمەت زيكيليمانمەن, باس پروكۋرور مەحمەت اكاردجامەن, باس اسكەري پروكۋرور الي ۋزۋنمەن, ودان بولەك, ادىلەت مينيسترلىگى جانە جوعارعى سوت وكىلدەرىمەن كەزدەسۋ بارىسىندا قازاقستاندىقتار تۇركيانىڭ زاڭنامالارىمەن جانە قۇقىقتىق جۇيەسىمەن, ورتالىق مەملەكەتتىك ورگانداردىڭ وكىلەتتەرىمەن جەتە تانىستى.
كەزدەسۋ بارىسىندا قابىلداۋشى تاراپتىڭ وكىلدەرى قازاقستاننىڭ قارىشتاپ دامىپ كەلە جاتقاندىعىن جوعارى باعالاپ, ەلباسى نۇرسۇلتان نازارباەۆتىڭ ەكى باۋىرلاس ەل دوستىعىنىڭ نىعايىپ, ىنتىماقتاستىعىنىڭ ارتۋىنا قوسىپ جاتقان ەلەۋلى ەڭبەگىن اتاپ ءوتتى.
تۇركيانىڭ ءادىل سوت اكادەمياسىنىڭ وڭ تاجىريبەسى قازاقستانداعى باس پروكۋراتۋرانىڭ جانىنان قۇرىلىپ جاتقان قۇقىق قورعاۋ ورگاندارى اكادەمياسىنىڭ قىزمەتىندە كەڭىنەن پايدالانىلاتىن بولادى.
ەلامان قوڭىر.
دەرەك, سۋرەت: باس پروكۋراتۋرانىڭ ءباسپاسوز قىزمەتى.
