ەلباسىنىڭ توراعالىعىمەن قاۋىپسىزدىك كەڭەسىنىڭ جەدەل كەڭەسى ءوتتى

استانا. 21 تامىز. مەملەكەت باسشىسىنىڭ توراعالىعىمەن قاۋىپسىزدىك كەڭەسىنىڭ جەدەل كەڭەسى ءوتتى. بۇل تۋرالى egemen.kz ءتىلشىسى حابارلادى. كەڭەسكە قاۋىپسىزدىك كەڭەسىنىڭ تۇراقتى مۇشەلەرى مەن بىرقاتار مەملەكەتتىك ورگانداردىڭ باسشىلارى قاتىستى. وندا ارناۋلى ورگانداردىڭ قىزمەتىن جەتىلدىرۋ, تالداۋ جانە بولجاۋ جۇمىستارىنىڭ ساپاسىن ارتتىرۋ ماسەلەلەرى قارالدى. پرەزيدەنت سىرتقى نارىقتارداعى ۇدەرىستەردى مۇقياتتىلىقپەن مونيتورينگتەۋ, احۋالدىڭ وزگەرۋىن, ىقتيمال تاۋەكەلدەر مەن قاتەرلەردى باعالاۋ, سونداي-اق وقيعالاردىڭ دامۋىن بولجاۋ نەگىزىندە الدىن الۋ شارالارىن ازىرلەۋ قاجەتتىگىن اتاپ ءوتتى. ەلباسى مەملەكەتتىك ورگانداردىڭ الەۋمەتتىك-ەكونوميكالىق دامۋ, سونداي-اق بەس ينستيتۋتسيونالدىق رەفورمانىڭ جانە «نۇرلى جول» باعدارلاماسىنىڭ ستراتەگيالىق مىندەتتەرىن جۇزەگە اسىرۋ جونىندەگى جۇمىستارى ەل ىشىندەگى جانە الەمدەگى جاعدايدى جان-جاقتى تالداۋعا نەگىزدەلۋى ءتيىس ەكەندىگىن ايتتى. كەڭەس قورىتىندىسى بويىنشا مەملەكەتتىك ورگاندارعا ناقتى تاپسىرمالار بەرىلدى. ايدار ورىسباەۆ. دەرەك, سۋرەت: akorda.kz.