باتىستىق مادەنيەت تاعزىمدى بايلايدى

قازاقستان پرەزيدەنتتىگىنە كانديدات, تۇرعىن سىزدىقوۆ استانا قالاسىنىڭ جەس جۇمىسشىلارىمەن كەزدەسۋ وتكىزدى. كەزدەسۋگە, سونداي-اق, سايلاۋالدى شتابىنىڭ جەتەكشىسى ايقىن قونىروۆ قاتىستى. ءوز سوزىندە تۇرعىن سىزدىقوۆ كەزدەسۋگە قاتىسۋشىلاردى سايلاۋالدى تۇعىرناماسىنىڭ نەگىزگى قاعيدالارىمەن تانىستىردى. سونداي-اق, ول ءحىح عاسىرداعى عىلىمي كوممۋنيزمنىڭ نەگىزىن قالاۋشىلار – كارل ماركس پەن فريدريح ەنگەلس تاريحي تاجىريبەگە نەگىزدەلە وتىرىپ, قوعامدىق دامۋدىڭ وبەكتيۆتى زاڭدارىن جاساي كەلە, ادامي قوعامدى جاڭا كوممۋنيستىك فورماتسياعا كوشىرۋ قاجەتتىگىن تەوريالىق نەگىزدە دالەلدەپ بەرگەنىن اتاپ ءوتتى. «ءبىز عىلىمي كوممۋنيزم يدەياسىن جالعاستىرۋعا قاراي ۇلكەن قادام جاسادىق. دامۋدىڭ كوپ كەزەڭدى جولدارىنان وتتىك. پارتيادا پارتيالىق بۇقارانى باقىلاۋ, ونى بيۋروكراتيالاندىرۋعا جول بەرمەۋ, دامۋ ۇردىستەرىن بولجاۋ, اۋىسپالى جاعدايعا دەر كەزىندە ارە­كەت ەتۋدىڭ تۇراقتى تەتىكتەرى جۇمىس ىستەيدى. مۇنىڭ ءبارى ءومىردىڭ تۇرمىس­تىق قاجەتتىلىكتەرىنەن تۋىنداپ, بۇقا­رانىڭ شىنايى شىعارماشى­لىعىنا نەگىزدەلەدى», – دەپ كورسەتىلگەن  ت.سىز­دىقوۆتىڭ سايلاۋالدى تۇعىرناماسىندا. سونىمەن قاتار, كانديداتتىڭ سايلاۋالدى باعدارلاماسىندا باتىستىق مادەنيەت پەن قۇندىلىقتاردىڭ كولەڭكەلى اسەرى جايىندا ماسەلە كوتەرىلگەن. «جاھاندىق كومپيۋتەرلەندىرۋ مەن باتىستىق ەلەكتروندىق باق قوعامنىڭ سانا-سەزىمىن ۋلاپ, ادامداردىڭ اراسىنا ىرىتكى سالۋ ءۇشىن ينديۆيدۋاليزم قاعيداتىن ناسيحاتتاۋدا, بۇل ءوز كەزەگىندە عالامشاردىڭ مادەني تۇتاستىعىنىڭ قۇلدىراۋىنا الىپ كەلۋى مۇمكىن. ەۋروپا ەلدەرىندە تۇتىنۋشىلىق قوعام قۇرىلىمدارىنىڭ قالىپتاسۋىنان تۋىنداعان باتىستىق مادەنيەت داعدارىسى باتىستىق وركەنيەتتىڭ امبەباپ قۇندىلىقتار مەن الەۋمەتتىك تۇرمىس-تىرشىلىك نورمالارىنا دەگەن نارازىلىقتارىنا قاراما-قايشى كەلۋدە. باتىستىڭ كەمشىلىكتەرى,  اسىرەسە, مادەنيەت سالاسىندا انىق بايقالادى.  سەبەبى, تۇتىنۋ, الەۋمەتتىك قۇبىلىس رەتىندە, كوپ جاعدايدا ماتەريالدىق قاجەتتىلىكتى قاناعاتتاندىرۋدى ءومىردىڭ ءمانى دەپ قاراستىراتىن قۇندىلىقتار مەن يدەيالار جۇيەسىنە نەگىزدەلگەن», – دەدى تۇرعىن سىزدىقوۆ. وعان قوسا, كانديدات تۇرعىن سىز­دىقوۆتىڭ سايلاۋالدى باعدارلاماسىندا باتىستىق كينەماتوگرافيا ستان­­دارت­­تارىنىڭ كەرى اسەرى تۋرالى ماسە­لەلەرگە ءمان بەرىلدى. «كينەماتوگرافيانىڭ باتىستىق ستان­دارتتارى زورلىق-زومبىلىققا, از­عىندىققا تاربيەلەيدى. وسىدان بارىپ قاتىگەز كۇشتەردىڭ, جاعىمسىز كەيىپ­كەرلەردىڭ ءوز زاڭدارىن ناسيحاتتاۋىنا جول اشىلدى. باتىستىق كينەماتوگرافيا زورلىق-زومبىلىققا دەگەن قىزىعۋشىلىقتى وياتىپ, ونى ادام­نىڭ سانا-سەزىمىنە جات ەستەتي­كالىق نورماعا اينالدىردى. باتىس­تىق مادەنيەتتىڭ وسىناۋ كۇدىكتى «جەتىستىگى» باتىستىق وركەنيەتتىڭ بار­لىق سالالارىنىڭ دامۋىنا كولەڭكە ءتۇ­سىرىپ وتىر. باتىستىق ادەبيەتتىڭ دە جاعدايى ءماز ەمەس. ول الەمدىك مادەنيەتتەگى ءوزىنىڭ بۇرىنعى الەۋەتىنەن ايىرىلىپ, زورلىق-زومبىلىق پەن بۇقارالىق ادەپسىزدىكتى ناسيحاتتايتىن كينەماتوگرافيانىڭ جەتەگىندە كەتتى», – دەپ كورسەتىلگەن ت.سىزدىقوۆتىڭ سايلاۋالدى تۇعىرناماسىندا. كەزدەسۋ سوڭىندا شتاب جەتەكشىسى ا.قونىروۆ جيىنعا قاتىسۋشىلارعا جۇرگىزىلىپ جاتقان ناسيحات جۇمىستارى جايىندا ايتىپ بەردى. «شتابىمىزدىڭ سەنىمدى تۇلعالارى انىقتالدى. ولار بارلىق اقپاراتتىق جۇمىستاردى جۇرگىزەتىن بولادى. قولىمىزدا جۇمىس جوسپارى بار. بىرقاتار كەزدەسۋلەر مەن ءىس-شارالار جوس­پارلانعان. ءبىزدىڭ شتاب باق وكىل­دەرىمەن تىعىز بايلانىس ورناتتى, ولار ءۇشىن ەسىگىمىز اركەز اشىق. كانديداتىمىزدىڭ قىزمەتى مەن ونىڭ سايلاۋالدى تۇعىرناماسى تۋرالى بار­لىق قاجەتتى اقپاراتتاردى ۇسىنۋعا دايىنبىز», – دەدى ا.قونىروۆ. كەشە سونداي-اق, قىزىلوردا قالاسىندا تۇرعىن سىزدىقوۆتىڭ ايماقتىق سايلاۋالدى شتابىنىڭ تانىستىرىلىمى ءوتتى. قىزىلوردا وبلىسى بويىنشا ايماقتىق شتابتىڭ جەتەكشىسى بولىپ تالعات تەلۋباەۆ تاعايىندالدى. تالعات تەلۋباەۆ پارتيادا 4 جىلدان اسا جۇمىس ىستەپ كەلەدى. ماماندىعى جۋرناليست, ءبىراز ۋاقىت مۇعالىم بولىپ قىزمەت اتقاردى. «ءبىر اي كولەمىندە شتاب ت.سىز­دى­قوۆتىڭ كانديداتۋراسىن قولداۋ اياسىندا بىرنەشە ءىس-شارا وتكىزۋدى جوسپارلاپ وتىر. شتاب قۇرامىندا 5 سەنىم ءبىل­دىرىلگەن ادام جۇمىس ىستەيدى. ناسيحات ماتەريالدارى الىندى, قازىر ولاردى تاراتۋ جۇمىستارىمەن اينالىسىپ جاتىرمىز», – دەدى تانىستىرىلىم بارىسىندا ت.تەلۋباەۆ. ەلميرا ماتىباەۆا, «ەگەمەن قازاقستان».