ءسۇيىنشى!
ەلىمىزدىڭ ەۋروپاداعى توبەبيلىگى تاماشا تابىسقا جەتكىزدى: ەقىۇ-نىڭ جاڭا مىڭجىلدىقتاعى, ءححى عاسىرداعى العاشقى ءسامميتى قازاقستان توراعالىعى تۇسىندا وتەتىن بولىپ شەشىلدى.
* ەۋروپاداعى قاۋىپسىزدىك جانە ىنتىماقتاستىق ۇيىمىنا مۇشە مەملەكەتتەر سىرتقى ىستەر مينيسترلەرىنىڭ بەيرەسمي كەزدەسۋىنەن ەسكەرتكىش سۋرەتتە الەم ءۇشىن, قاۋىپسىزدىك ءۇشىن ايرىقشا ماڭىزدى شەشىم قابىلداعاندار بەينەلەنگەن.
ۇيىم ءسامميتى بيىل استانادا وتەتىن بولدى
كەشە ەقىۇ-عا مۇشە ەلدەر سىرتقى ىستەر مينيسترلەرىنىڭ بەيرەسمي كەزدەسۋىندە وسىنداي شەشىم قابىلداندى
الماتى وبلىسىنىڭ تالعار اۋدانىنداعى “اقبۇلاق” سپورت-ساۋىقتىرۋ كەشەنى توڭىرەگى ءوزىنىڭ مەرەكەلىك ءسان-سالتاناتىمەن كوز تارتادى. ايماقتاعى ەتنومادەني بىرلەستىكتەر وكىلدەرى مارتەبەلى مەيمانداردى وزدەرىنىڭ ۇلتتىق كيىمدەرىن كيىپ, كەرنەيلەتە قارسى الدى. قازاق حالقىنىڭ سالت-داستۇرىنەن حابار بەرەتىن ات مىنگەن جىگىتتەر دە وسى حالىقارالىق شارا مازمۇنىن ايشىقتاي تۇسكەندەي. بۇل قازاق ەلىنە العاش ات باسىن تىرەگەن كەيبىر شەتەلدىك سىرتقى ساياسات ۆەدومستۆولارى باسشىلارى مەن وكىلدەرى ۇلتتىق ناقىشتى سەزىنسىن دەگەن ىلگەرى ويدان تۋعانى تاعى اقيقات.
كوپ كەشىكپەي قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ءوزى دە كورىندى. مەملەكەت باسشىسىنا دا لايىقتى قوشەمەت كورسەتىلىپ, قارسى الىندى. ەلباسى القالى جيىن وتەتىن ورىنعا جەتكەن سوڭ بەيرەسمي كەزدەسۋگە كەلگەن مەيماندارمەن ەسكەرتكىش سۋرەتكە ءتۇستى.
ال ەقىۇ-عا مۇشە ەلدەر سىرتقى ىستەر مينيسترلەرى بەيرەسمي كەزدەسۋىنىڭ نەگىزگى تاقىرىپتارى ۇيىم جاۋاپكەرشىلىگىنە كىرەتىن اۋماق قاۋىپسىزدىگىنىڭ پروبلەمالارى, ونىڭ ىشىندە قىرعىزستانداعى جاعداي, اعىمداعى پروبلەمالاردى “كورفۋ ۇدەرىسى” ارقىلى شەشۋ جولدارىن ىزدەستىرۋ, سونداي-اق قازاقستاندا ەقىۇ ءسامميتىن وتكىزۋ تۋرالى كەلىسىمگە كەلۋ بولدى.
ۇيىمعا مۇشە بارلىق ەلدەردەن وكىلدەر كەلگەن حالىقارالىق دەڭگەيدەگى القالى جيىندى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ءسوز سويلەپ اشتى. كەلەسى كەزەكتە ەقىۇ-نىڭ ءىس باسىنداعى توراعاسى قانات ساۋداباەۆ, ەقىۇ پارلامەنتتىك اسسامبلەياسىنىڭ پرەزيدەنتى پەتروس ەفتيميۋ جانە ەقىۇ-نىڭ باس حاتشىسى مارك پەررەن دە بريشامبو ءسوز سويلەدى. سونداي-اق بۇۇ باس حاتشىسىنىڭ ورىنباسارى يان كۋبيش بۇۇ باس حاتشىسى پان گي مۋننىڭ سىرتقى ىستەر مينيسترلەرىنىڭ بەيرەسمي كەزدەسۋىنە قاتىسۋشىلارعا جولداۋىن وقىپ بەردى (بۇل سوزدەردىڭ بارلىعى جەكە جاريالانىپ وتىر).
كەزدەسۋ شەڭبەرىندە “قاۋىپسىزدىك ماسەلەلەرى جونىندەگى ۇنقاتىسۋدى ودان ءارى ىلگەرى جىلجىتۋدىڭ جولدارى” دەگەن تاقىرىپتا ءبىرىنشى سەسسيا, “ۇسىنىلىپ وتىرعان ەقىۇ ءسامميتىنىڭ ماقساتتارى” دەگەن تاقىرىپتا ەكىنشى سەسسيا جۇمىس ىستەدى. ولار بويىنشا ءتيىستى شەشىمدەر قابىلداندى. سونىمەن قاتار, تاۋلى قاراباق كيكىلجىڭىن شەشۋ جولدارىن قاراستىراتىن مينسك توبىنىڭ وتىرىسى ۇيىمداستىرىلدى. جانە دە بىرقاتار ەكى جاقتى كەزدەسۋلەر بولىپ ءوتتى.
