اتىراۋدا ماس جۇرگىزۋشى پوليتسيا كولىگىنە سوقتىعىستى

اتىراۋ. 4 ناۋرىز. اتىراۋدا 3 ناۋرىزعا قاراعان تاڭعى الاكەۋىمدە ماس جۇرگىزۋشى جول-پاترۋلدىك قىزمەتى ەكيپاجىنىڭ توقتاۋ تۋرالى بۇيرىعىنا باعىنباي, قاشپاق بولعاندا پوليتسيا كولىگىنە سوقتىعىستى. بۇل تۋرالى egemen.kz ءتىلشىسى حابارلادى. وبلىستىق ىشكى ىستەر دەپارتامەنتىنىڭ ءباسپاسوز حاتشىسى گۇلنازيرا مۇحتاروۆانىڭ حابارلاۋىنشا, سول ۋاقىتتا «باتىس» جول-پاترۋلدىك قىزمەتىنىڭ ەكيپاجى اتىراۋ قالاسىنداعى ازاتتىق داڭعىلى مەن اتامباەۆ كوشەسىنىڭ قيىلىسىندا كەزەكشىلىكتە تۇرعان. پوليتسەيلەر «فولكسۆاگەن» كولىگىنىڭ جۇرگىزۋشىسىنىڭ كەنەتتەن تەجەگىشتى باسىپ, قوزعالىس باعىتىن كۇرت وزگەرتكەنىن بايقايدى. كەزەكشى پوليتسەيلەر دىبىس كۇشەيتكىشپەن كولىك جۇرگىزۋشىسىنە توقتاۋدى بۇيىرادى. بىراق جۇرگىزۋشى پوليتسەيلەردىڭ بۇل تالابىن ورىنداماي, باعدارشامنىڭ قىزىل بەلگىسىنە قاراماي سولعا بۇرىلعان. سول كەزدە «فولكسۆاگەن» كولىگى جول-پاترۋلدىك قىزمەتى ەكيپاجىنىڭ كولىگىنە سوقتىعىسقان. وسىلايشا, پوليتسيا قىزمەتكەرلەرىنىڭ تالابىنا باعىنباي, سونىمەن بىرگە, پوليتسەيلەردىڭ قىزمەتتىك كولىگىنە زاقىم كەلتىرگەن جۇرگىزۋشى قاشىپ كەتۋگە ارەكەتتەنەدى. الايدا, ول پوليتسەيلەر قولىنا ءتۇستى. تەكسەرۋ ناتيجەسىندە «فولكسۆاگەن» جۇرگىزۋشىسىنىڭ ماساڭ كۇيدە كولىك جۇرگىزگەن اتىراۋ قالاسىنىڭ 27 جاسار تۇرعىنى ەكەنى بەلگىلى بولدى. قازىر ونىڭ ۇستىنەن اكىمشىلىك قۇقىق بۇزۋشىلىق تۋرالى كودەكستىڭ 608-بابى («كولىك قۇرالىن الكوگولدىك  ماساڭ كۇيدە باسقارۋ») بويىنشا حاتتاما تولتىرىلدى. جولداسبەك شوپەعۇل. دەرەك: egemen.kz. سۋرەت: news.nur.kz.