الماتى وبلىسىندا ۇزدىك سپورتشىلار ماراپاتتالدى

تالدىقورعان. 4 ناۋرىز. الماتى وبلىسىنىڭ اكىمى اماندىق باتالوۆ حالىقارالىق جانە رەسپۋبليكالىق جارىستاردا ۇزدىك ناتيجە كورسەتكەن ءوڭىر سپورتشىلارى مەن جاتتىقتىرۋشىلارىن ماراپاتتادى. بۇل تۋرالى zhetysu.gov.kz حابارلادى. كەزدەسۋ بارىسىندا وبلىس اكىمى سپورتتى دامىتۋ ماسەلەلەرىنە كەڭىنەن توقتالىپ, قول جەتكەن جەتىستىكتەردى سارالادى: «پرەزيدەنتىمىز نۇرسۇلتان نازارباەۆ «قازاقستان-2050» ستراتەگياسىندا «دەنە شىنىقتىرۋ مەن سپورت مەملەكەتتىڭ ايرىقشا نازارىندا بولۋى ءتيىس. ناق سول سالاماتتى ءومىر سالتى ۇلت دەنساۋلىعىنىڭ كىلتى بولىپ سانالادى» دەدى. ەلباسىنىڭ تاپسىرماسى اياسىندا بۇگىندە وبلىس سپورتشىلارىنا بارلىق جاعدايلار جاسالۋدا. سول جۇمىستاردىڭ ناتيجەسىندە, 2014 جىلى وبلىس سپورتشىلارى بارلىعى 1167 مەدال ولجالاعان. سونداي-اق, وتكەن جىلى وڭىردەن 2 ەڭبەك سىڭىرگەن سپورت شەبەرى, 24 حالىقارالىق دارەجەدەگى سپورت شەبەرى, 125 سپورت شەبەرلەرى مەن 495 سپورت شەبەرلىگىنە ۇمىتكەرلەر شىقتى. وبلىس اكىمى ءوز بايانداماسىنان كەيىن ءوڭىردىڭ ۇزدىك سپورتشىلارى مەن جاتتىقتىرۋشىلارىن ماراپاتتادى. ۇزدىك 6 سپورتشى مەن 8 جاتتىقتىرۋشىعا وبلىس اكىمىنىڭ ديپلومى تابىستالىپ, 150 مىڭ تەڭگەدەن اقشالاي سىيلىق بەرىلدى. وبلىستىڭ ۇزدىك سپورتشىلارى اتانعان ساڭلاقتار: مارگاريتا ەليسەەۆا, توقتار كاركاتەروۆ, نۇرجان جۇماجان, ەربول دۇكەنباەۆ, الەكساندر گەتالو جانە دميتري سوليانين. سونىمەن قاتار, وبلىس اكىمىنىڭ اتىنان ديپلومدار مەن 500 مىڭ تەڭگەلىك اقشالاي سىيلىق 2014 جىلى ۇزدىك دەپ تانىلعان سپورتتىق مەكەمەلەرگە دە بەرىلدى. ولاردىڭ قاتارىندا تالدىقورعان قالاسىنداعى №1 جاسوسپىرىمدەرگە ارنالعان وليمپيادالىق رەزەرۆ مەكتەبى, «جەتىسۋ» ۆولەيبول كلۋبى جانە قاراساي اۋداندىق سپورت ءبولىمى بار. سپورتتىق جاڭالىقتاردى تۇراقتى تۇردە بۇقارالىق اقپارات قۇرالدارىندا ناسيحاتتاپ جۇرەتىن جۋرناليستەر دە ماراپاتتان قالمادى. كەزدەسۋدە «جەتىسۋ» ايەلدەر ۆولەيبول كومانداسىنىڭ باسشىسى ۆ.شاپران جانە قازاق كۇرەسىنىڭ پالۋانى توحتار كاركاتەروۆ ءسوز سويلەپ, الداعى ۋاقىتتا بۇدان دا جوعارى جەتىستىكتەرگە قول جەتكىزۋگە تالپىناتىندارىن ايتتى. نۇربول الدىباەۆ. دەرەك, سۋرەت: zhetysu.gov.kz.