قامقورلىق

قىزىلوردا وبلىسىندا ەكى بىردەي سپورت كەشەنى اشىلدى قىزىلوردا وبلىسىنىڭ ەكى بىردەي اۋدانىندا, ياعني, جاڭاقورعان مەن قازالىدا زاماناۋي ۇلگىدەگى سپورتتىق-ساۋىقتىرۋ كەشەنى پايدالانۋعا بەرىلدى. سپورت كەشەندەرى قا­جەتتى قۇرىلعىلاردىڭ بارلىعىمەن جابدىق­تالعان. قۇرىلىسى 2014 جىلدىڭ تامىز ايىندا باستالعان سپورت نىسانىندا ءبىر مەزگىلدە 150-دەن اسا ادامنىڭ جاتتىعۋىنا ءمۇم­كىندىك بار. جاڭاقورعان اۋدانىنداعى جاڭا سپورت كەشەنىنىڭ اشىلۋىنا وبلىستىق ءماس­لي­حاتتىڭ حاتشىسى اقمارال ءالنازاروۆا قاتىستى. – ەلباسىنىڭ سارابدال ساياساتىنىڭ ناتيجەسىندە ەلىمىزدە وسىنداي الەۋمەتتىك نىساندار كوپتەپ بوي كوتەرۋدە. وسكەلەڭ ۇرپاقتىڭ دەنى ساۋ, زامان تالابىنا ساي قابىلەتتى بولىپ وسۋىنە مەملەكەت تاراپىنان بارلىق مۇمكىندىكتەر جاسالۋدا. ەندىگى كەزەكتە جاڭاقورعاننىڭ جاس جەتكىنشەكتەرى وسى كەشەندە جاتتىعىپ, ەل ابىرويىن اسقاق­تاتادى دەگەن سەنىمدەمىز, – دەدى ول. جاڭاقورعاندىقتار مەملەكەت تاراپىنان جاسالىپ جاتقان قامقورلىققا ريزا­شىلىعىن جەتكىزىپ, جاس سپورتشىلارىمىز الداعى ۋاقىتتا ءدۇبىرلى دودالاردا نامىستى قولدان بەرمەي كوك بايراعىمىزدىڭ بيىكتەن جەلبىرەۋىنە اتسالىساتىنىن ايتتى. سونداي-اق, ءدال وسىنداي سپورت نىسانى قازالى اۋدانى, ايتەكە بي كەنتىندە اشىلدى. 160 ورىندىق زاماناۋي ۇلگىدە سالىنعان سپورت كەشەنىنىڭ اشىلۋىمەن وبلىس اكىمىنىڭ ورىنباسارى راۋان كەنجەحان ۇلى قۇتتىقتاپ, مەملەكەت باسشىسىنىڭ جۇرگىزىپ وتىرعان ساياساتىنىڭ باستى باعىتتارىنىڭ ءبىرى – جاستاردىڭ سپورتپەن اينالىسۋىنا بارىنشا جاعداي جاساۋ ەكەندىگىن جەتكىزدى. سونىمەن قاتار, بۇگىنگى اشىلىپ وتىرعان ساۋىقتىرۋ كەشەنىنەن تاربيەلەنەتىن سپورتشىلاردىڭ ەل ابىرويىن اسقاقتاتاتىنىنا سەنىم ءبىلدى­رەتىندىگىن جەتكىزدى. ايتا كەتەيىك, وبلىستا بۇقارالىق سپورتتى دامىتۋعا ۇلكەن كوڭىل ءبولىنىپ,  قىرۋار جۇمىستار اتقارىلىپ جاتىر. بيىل قىزىلوردا قالاسىندا بوكس ورتالىعى مەن يپپودروم پايدالانۋعا بەرىلەدى. بۇدان بولەك يليا يلين اتىنداعى اۋىر اتلەتيكادان سپورت كەشەنى مەن ءۇش مىڭ ورىندىق جابىق فۋتبول مانەجىنىڭ قۇرىلىسى باستالادى. ەرجان بايتىلەس, «ەگەمەن قازاقستان». قىزىلوردا وبلىسى.