«مەكتەپكە جول» اكتسياسى: وقۋلىقتار جەتكىلىكتى, شاكىرتتەر كوڭىلدى

الماتى مەكتەپتەرى جاڭا وقۋ جىلىن  ويداعىداي قارسى الۋعا دايىن – الماتى قالاسىنداعى 202 مەكتەپتىڭ 200-ءى جاڭا 2015-2016 وقۋ جىلىن باستاپ جىبەرۋگە 100 پايىز دايىن. وقۋشىلار وقۋ قۇرالدارىمەن تولىق قامتاماسىز ەتىلدى ءارى مەكتەپتەرگە وقۋلىقتار 100 پايىز تەگىن جەتكىزىلدى,– دەيدى قالالىق ءبىلىم باسقارماسىنىڭ باسشىسى راحات شيماشەۆا. تاياۋدا سەل جۇرگەن ناۋرىزباي اۋدانىندا بولعان الماتى قالاسىنىڭ اكىمى باۋىرجان بايبەك قالىپتاسقان جاعدايعا بايلانىستى اۋدانداعى زارداپ شەككەن مەكتەپتەرگە ەرەكشە توقتالعان. وقۋ جىلى باستالاتىن كۇنگە دەيىن سەلدەن زارداپ شەككەن №187, №188, №192 مەكتەپتەردەگى جوندەۋ جۇمىستارىن اياقتاپ, 1 قىركۇيەكتە ءبىلىم ورداسى بالالاردى ساباققا ەشبىر الاڭسىز قابىلداۋى ءتيىس ەكەندىگىن مىندەتتەگەن. قازىر ءۇش مەكتەپتە دە جاڭا وقۋى جىلىن لايىقتى قارسى الۋ جۇمىستارى تىڭعىلىقتى جۇرگىزىلىپ جاتىر. بىزبەن اڭگىمەسىندە №192 مەكتەپتىڭ ديرەكتورى ساۋلە ادىلبەك­قىزى بىلاي دەدى: – سەلدەن سوڭ مەكتەپ اۋلاسى بالشىق پەن تاسقا تولعان ەدى. بۇگىنگى تاڭدا ولار تازالانىپ ءبىتتى. تامىز ايىنىڭ 25-نە دەيىن قالپىنا كەلتىرۋ جۇمىسىن تولىقتاي اياقتايمىز دەگەن سەنىمدەمىز. ەرتەڭ كەلىپ ەسىك اشاتىن 930 وقۋشىنى ويداعىداي قابىلداۋعا ءازىرمىز. ونىڭ ۇستىنە مەكتەبىمىز جاڭا پارتالارمەن, وقۋلىقتارمەن, سونداي-اق, كومپيۋتەرلەرمەن قامتاماسىز ەتىلدى. تاعى ءبىر اتاپ وتەر جايت, «نۇرلى جول» باعدارلاماسى اياسىندا الاتاۋ اۋدانىنداعى №26 مەكتەپ جانىنان سالىنىپ جاتقان 900 ورىندى قوسالقى نىسان مەن اۋەزوۆ اۋدانىنىڭ قالقامان شاعىن اۋدانىنداعى №157 مەكتەپ جانىنداعى قوسالقى قۇرىلىس وقۋ جىلى اياقتالعانعا دەيىن پايدالانۋعا بەرىلەدى. بيىلعى وقۋ جىلى الماتىنىڭ مەكتەپ وقۋشىلارى مەن اتا-انالارى ءۇشىن وسىنداي ەرەكشە جاڭالىقتارعا تولى. تالعات ءسۇيىنباي, «ەگەمەن قازاقستان». الماتى.