الەۋمەتتىك تۇرعىن ءۇي كولەمى ارتادى

«بايتەرەك» حولدينگى مەن ۇلتتىق كاسىپكەرلەر پالاتاسى «نۇرلى جول – بولاشاققا باستار جول» جول­داۋىندا ايتىلعان الەۋمەتتىك تۇرعىن ءۇيدى جالعا بەرۋ جانە قۇرىلىستى قارجىلاندارۋ شارتتارىن تال­قىلادى. «بايتەرەك» ۇلتتىق باسقارۋشى حولدينگى مەن ۇلتتىق كاسىپكەرلەر پالاتاسى وكىلدەرى باس قوسقان دوڭگەلەك ۇستەل تاقىرىبى تۇرعىن-ءۇي ينفراقۇرىلىمىن نىعايتۋ باعىتىنداعى «وڭىرلەردى دامىتۋ-2020» باعدارلاماسىن جۇزەگە اسىرۋعا ارنالدى. باعدارلاماعا سايكەس, «بايتەرەك» حولدينگى مەن ونىڭ ەنشىلەس قۇرىلىمى – قازاقستاننىڭ يپوتەكالىق كومپانياسى تۇرعىن ۇيلەردى تەك سالىپ قانا قويماي, نارىقتاعى دايىن تۇرعىن ۇيلەردى ساتىپ الۋ مۇمكىندىگىنە يە بولادى. شاراعا قاتىسۋشىلار الەۋمەتتىك تۇرعىن ءۇيدى جالعا بەرۋ جانە قۇرىلىس تەتىكتەرىن قارجىلاندىرۋ ۇردىستەرى مەن شارتتارىن جان-جاقتى تالقى­لادى. ۇلتتىق كاسىپكەرلەر پالاتاسى باعدارلامانىڭ جاساقتالۋى مەن تالقىلانۋىنا بەلسەنە قاتىسىپ, تۇرعىن ۇيلەردىڭ قولجەتىمدى باعا­مەن ساتىلۋىن, پاتەرلەردى ءبولۋ ءۇردىسىنىڭ اشىق بولۋىن جانە قۇرىلىسقا جەكە قۇرىلىس كوم­پا­نيالارىنىڭ قاتىسۋىن قامتا­ماسىز ەتىلۋى جونىندە دە ناقتى ۇسىنىستارىن ءبىلدىردى. دوڭگەلەك ۇستەلگە جي­نال­عان­داردىڭ سوزىنە قاراعاندا, «ءوڭىر­لەردى دامىتۋ-2020» باعدارلا­ما­سىنىڭ جۇزەگە اسۋى بارىسىندا, 5 جىل ىشىندە ورتاشا ەسەپپەن 29 مىڭ پاتەردى قۇرايتىن 1 483 مىڭ شارشى مەتر­گە تەڭ جالعا بەرىلەتىن تۇرعىن ءۇي سالۋ جوسپارلانعان. جال­عا بەرىلەتىن الەۋمەتتىك تۇرعىن ءۇيدى ءبولۋ بارىسىندا باسىمدىق كوپبالالى وتباسىلارعا, تولىق ەمەس وتباسىلارعا, مۇگەدەك بالالارى بار نەمەسە ولاردى تاربيە­لەپ وتىرعان وتباسىلارىنا, جە­تىم بالالارعا جانە اتا-انالارى­نىڭ قامقورلىعىنسىز قالعان بالا­لارعا, مەملەكەتتىك قىزمەتكەر­لەرگە, بيۋدجەتتىك ۇيىمدار­دىڭ قىزمەتكەرلەرىنە, اسكەري قىزمەت­كەرلەرگە جانە ارنايى مەملەكەتتىك ورگان قىزمەتكەرلەرىنە, ورالمان­دارعا بەرىلەدى. بۇل جەردە, تۇرعىن ۇيلەردىڭ 50 پايىزى 3 جىلدان كەم ەمەس نەكەدە تۇراتىن ءارى بالاسى بار جەرگىلىكتى باسقارۋ ورگاندارىندا كەزەكتە تۇرعاندار بويىنشا بولىنەدى. جۇبايلاردىڭ جاسى 35-كە تولماعان بولۋى شارت. سونىمەن قا­تار, بولىنگەن قارجىنىڭ قايتا­رىلۋىن قامتاماسىز ەتۋ ماقسا­تىندا بارلىق ۇمىتكەرلەردىڭ تولەم­اقى تولەۋ قابىلەتى ەسەپكە الىناتىن بولادى. «بايتەرەك» حولدينگىنىڭ ەن­شىلەس قۇرىلىمى – قازاقستاننىڭ يپوتەكالىق كومپانياسى ارقىلى تۇرعىن ۇيلەردى بەرۋ بارىسىندا كوپشىلىكتى قامتۋعا جانە اي سايىنعى جالدىق اقىنى ازايتۋ ماقساتىندا باسىمدىق كىشى كو­لەم­دى پاتەرلەرگە بەرىلەدى. ماسەلەن, 1 بولمەلى پاتەرلەردىڭ كولەمى – 33 ش/م, 2 بولمەلى پاتەرلەردىڭ كولەمى – 45 ش/م, 3 بولمەلى پاتەرلەردىڭ كولەمى – 62 ش/م كولەمىندە بولماق. تۇرعىن ءۇيدى سالعان جاعدايدا استانا مەن الماتى قالالارىندا تازا نۇسقاسىنداعى پاتەرلەردىڭ 1 شارشى مەترىنىڭ نەگىزگى قۇنى 185 تىڭ تەڭگەنى قۇرايدى, ال باسقا ايماقتاردا 150 مىڭ تەڭگەگە دەيىن بولماق. نارىقتا دايىن تۇرعىن ءۇيدى ساتىپ العان جاعدايدا استانا مەن الماتى قالالارىندا ءاربىر شار­شى مەتر 200 مىڭ تەڭگەگە دەيىن, ال قالعان ايماقتاردا 165 مىڭ تەڭ­گەگە دەيىن بولادى دەپ كۇتىلۋدە. ماسەلەن, استانا مەن الماتى قالالارىندا كولەمى 50 ش/م قۇراي­تىن 2 بولمەلى پاتەردىڭ جالدىق قۇنى 56 مىڭ تەڭگەدەن اسپايتىن بولادى. ال قالعان وڭىرلەردە 47 مىڭ تەڭگەدەن اسپايدى. جالپى, 2015 جىلى باعدارلاماعا سايكەس, 9 740 پاتەر نەمەسە 487 مىڭ شارشى مەتر كولەمىندە جالعا بەرىلەتىن تۇرعىن ءۇيدىڭ قۇرىلىسىن سالۋ جوسپارلانعان. جىلقىباي جاعىپار ۇلى, «ەگەمەن قازاقستان».