سۋ تاسقىنىنا دايىندىق پىسىقتالدى

جاقىندا وبلىس اكىمى ارحيمەد مۇحامبەتوۆتىڭ توراعالىعىمەن وتكەن توتەنشە جاعدايلاردىڭ الدىن الۋ جانە جويۋ جونىندەگى وبلىستىق كوميسسيانىڭ كەزەكتى وتىرىسىندا سۋ تاسقىنىنا قارسى شارالار جانە وعان دايىندىق تۋرالى كەڭىنەن اڭگىمە بولدى. وبلىستىق توتەنشە جاعدايلار دەپارتامەنتىنىڭ باسشىسى باۋىرجان سىزدىقوۆتىڭ حابارلاۋىنشا, كوكتەمگى سۋ تاسقىنىن وتكىزۋگە قاجەتتى كەشەندى دايىندىق جۇمىستارى قازىردىڭ وزىندە قولعا الىنعان. وبلىستىق, قالالىق جانە اۋداندىق سۋ تاسقىنىنا قارسى كوميسسيالار جۇمىس ىستەۋدە. وبلىس اۋماعىنداعى 145 سۋ شارۋاشىلىعى نىساندارىنىڭ 8-ءى رەسپۋبليكا­لىق, 118-ءى كوممۋنالدىق, 18-ءى جەكە­مەنشىك باعىنىسقا جاتادى. ءوت­كەن جىلداردىڭ تاجىريبەلەرىن تالداۋ قورىتىندىلارى بويىن­شا وبلىس اۋماعىنىڭ سۋ باسۋ قاۋپى بار ورىندارىنىڭ تولقۇجاتى جا­سالىپ, بەكىتىلگەن. الدىن الا الىنعان اقپاراتتارعا قارا­عاندا, قازىرگى ۋاقىتتا ەلدى مەكەن­دەرگە جاقىن ورنالاسقان سۋ شارۋاشىلىعى نىساندارىنىڭ جاي-كۇيى قاناعاتتانارلىق, ەلدى مەكەندەرگە ءتونىپ تۇرعان ۇلكەن قاۋىپ جوق. الايدا, جەرگىلىكتى بيلىك جانە سۋ شارۋاشىلىعى مەكەمەلەرى تاراپىنان اقتوبە, قارعالى جانە سازدى سۋ قويمالارىنا باسا نازار اۋدارىلۋدا. قازىر اقتوبە سۋ قويماسىندا 142 ميلليون تەكشە مەتر سۋ بار, بۇل – جوبالىق كولەمنىڭ 58 پايىزىنا تەڭ. قارعالى سۋ قويماسىندا 152 ميلليون تەكشە مەتر ۇستالۋدا نەمەسە جوبالىق كولەمنىڭ 54 پايىزى. سازدى سۋ قويماسىندا 2,2 ميلليون تەكشە مەتر سۋ بار, ول جوبالىق كولەمنىڭ 32 پايىزىن قۇرايدى. وڭىردە سۋ تاسقىنىن بولدىرماۋ ماقساتىندا 84 توننا جاعار-جانارماي, 6860 توننا ينەرتتىك ماتەريالدار, 8490 قاپتار, 10 توننا جارىلعىش زاتتار قورى جاسالعان. سۋ تاسقىنىن قالىپتى وتكىزۋگە جانە اتالعان شارالاردى اتقارۋعا 90 ميلليون تەڭگەدەن استام قاراجات بولىنگەن. بۇگىنگى كۇنگە اقتوبە قالاسىنىڭ اۋماعىنان جانە وبلىستىڭ ەلدى مەكەندەرىنەن 98 مىڭ توننادان استام قار شىعارىلدى. ءتيىستى ءدارى-دارمەك جاعى قاراستىرىلىپ, سانيتارلىق شارالار ويلاستىرىلدى. اپاتتاردىڭ الدىن الۋ مەديتسينالىق ورتالىعىنىڭ جەدەل ارەكەت ەتۋ جانە العاشقى كومەك كورسەتۋ بريگادالارى ۇيىمداستىرىلدى. «قازسۋشار» رەسپۋبليكالىق مەملەكەتتىك كاسىپورنىنىڭ اقتوبە فيليالىنىڭ ديرەكتورى بەكزات نامەتوۆتىڭ ايتۋىنشا, وبلىسقا بىلتىر رەسپۋبليكالىق بيۋدجەتتەن 113 ميلليون تەڭگە قارجى ءبولىنىپ, قارعالى سۋ قويماسى قايتا جاڭعىرتىلعان. بيىل سازدى سۋ قويماسىنا دا قارجى قارالعانىن, بىراق قازىرگى ەكونوميكالىق جاعدايعا بايلانىستى ءىس توقتاتىلعانىن تىلگە تيەك ەتە كەلىپ, ماسەلە جالعاسىن تاپسا دەگەن تىلەگىن جەتكىزدى. ول بيىل قوستاناي وبلىسىنان كەلەتىن ىرعىز جانە تورعاي وزەندەرىنىڭ سۋى جوعارى بولادى دەگەن بولجامدى العا تارتىپ, جەرگىلىكتى ماماندار مۇنى ەسكەرىپ, سوعان وراي ءتيىستى شارالار الۋ قاجەتتىگىن ەسكە سالدى. ءتيىستى مەكەمەلەردىڭ باسشىلارىنىڭ حابارلامالارىن تىڭداعاننان كەيىن وبلىس باسشىسى اقتوبە قالاسى جانە اۋدانداردىڭ اكىمدەرىنە سۋ تاسقىنىنا قارسى شارالار الۋ جونىندە بىرقاتار ناقتى تاپسىرمالار بەردى. ساتىبالدى ءساۋىرباي, «ەگەمەن قازاقستان». اقتوبە وبلىسى.