سوزاقتىڭ سارى سازانى

قازىر «الما ءپىس, اۋزىما ءتۇس» دەپ وتىراتىن زامان ەمەس. قولى قيمىلداعاننىڭ اۋزى دا قيمىلدايدى. وبلىس اكىمى اسقار مىرزاحمەتوۆ ورتا شارۋالاردىڭ قولىنا مىقتاپ كۇرەك ۇستاتقان. ۇلكەن شارۋاشىلىققا شاماڭ كەلمەيدى ەكەن, ءوز وتباسىڭدى ەركىن اسىرارلىقتاي كاسىپتى مەڭگەر. جەڭىلدەتىلگەن نەسيەمەن ون ساۋىن سيىر ال. بورداقىلاۋعا ون وگىز ال. ۋاقىتپەن جەمىن, ءشوبىن بەر, سۋار. ءسۇتتى قايدا وتكىزەم دەمەيسىڭ, وسى ماقساتقا ارنايى قۇرىلعان سەلولىق تۇتىنۋشى كووپەراتيۆى بار. بورداقىلانعان وگىزدەردى قاي بازارعا شىعارام دەپ باسىڭدى قاتىرما, كووپەراتيۆ ءوزى سويىپ, ءوزى وتكىزىپ, قولىڭا كەلىسىلگەن اقشاڭدى اكەپ بەرەدى. بۇل اۋىل شارۋاشىلىعى ءۇشىن ەڭ ءتيىمدى ءتاسىل بولىپ تۇر. وبلىستىق اۋىل شارۋاشىلىعى باسقارماسى دا قاي قاجەتىڭىزدى اشۋعا دايىن. وسىلايشا ورتا شارۋانىڭ جاعدايى ءبىرشاما جاقسارىپ قالدى. قالايدا اۋىل ەڭبەككەرلەرىن جۇمىسپەن قامتۋدى ويلايتىن وبلىس اكىمى ەندى وبلىستا 2015-2016 جىلدارعا ارنالعان بالىق شارۋاشىلىعىن دامىتۋ باعدارلاماسىن قولعا العان. مۇنداعى ماقسات بالىق شارۋاشىلىعىن دامىتۋ ارقىلى تابىسقا شىعۋ. وڭتۇستىكتە ەرسىلى-قارسىلى اققان اعىن سۋ كوپ بولماعانىمەن «شاردارا» سۋ قويماسى, وعان جالعاس «كوكساراي» سۋ رەتتەگىشى, ءشامشىنىڭ ءانى ارقىلى جالپاق قازاقستانعا ايگىلى ارىس وزەنى, ارىندى كەلەس, اقسۋ, قاراسۋ سياقتى شاعىن وزەندەر, سىردارياداي مول ايدىن بار. ءبولىنىپ قاشقان ساعالارىن ىسكەر جىگىتتەر جالعا الىپ, شاباق جىبەرىپ پايداعا شىعا باستاعان. وتكەندە گازەتىمىزدە وتىراردىڭ بەكىرە تۇقىمداس بالىعى جايلى ايتتىق. وبلىس باسشىسى ايماقتا 27 تاۋارلى بالىق شارۋاشىلىعىن قۇرماق نيەتتە. وسى جوبانى قولداۋ ءۇشىن «ماكسيمۋم» ايماقتىق ينۆەستيتسيالىق ورتالىعى» جشس 400 ملن. تەڭگە جەڭىلدەتىلگەن نەسيە بەرىپ وتىر. وسى بەرەكەلى شارۋاعا ارقا­مەن قويىنداسىپ جاتقان سوزاق اۋدانى دا كىرىسىپ كەتتى. سوزاق­تاعى «باباتا» سۋ قويماسىنا «KazGoldFish» سەرىكتەستىگى 100 مىڭ شا­باق جىبەردى. تاۋدان ەرىگەن قاردان قۇرالعان سۋ قويماسىنىڭ سۋى تۇششى بولعاندىقتان بالى­عى­نىڭ ەتى بال تاتيدى. سەرىكتەستىك وكىلىنىڭ ايتۋى بويىنشا, وسى شاباقتار قوڭىر كۇزدە بۇيىرلەرى سارى التىنداي جارقىراعان كەبەجە باس سازاندارعا اينالادى. ولاردى كۇتىپ باپتايتىن يحتيولوگ ماماندار بار. سوزاق اۋدانىنىڭ اكىمى امانعالي اي­مىر­زاەۆ تا مۇرتىنان كۇلەدى. اكىم­نىڭ كوڭىلدەنەتىنىندەي بار. بالىق شارۋاشىلىعى 15-20 ادام­عا جۇمىس ورنى. ەكىنشىدەن, مالىمەن, جەر استى بايلىعىمەن داڭقى شىققان سوزاقتىقتار شاردارانىڭ سارى سازانىنا ەندى جەرىك بولمايدى. كاسىپورىن الداعى ۋاقىتتا بالىق ونىمدەرىن وڭدەيتىن شاعىن تسەحتار اشىپ, ىشكى نارىق پەن ەكسپورتقا شىقپاق نيەتتە. بۇل بوس قيال ەمەس. ءاربىر ءىس وسىنداي شاعىن باستاۋلاردان قۋات الادى. باياعىدا ارالدىڭ ءبىر قىزى قىرعا ۇزاتىلعاندا «بال تاتىعان بالىقتىڭ ەتىن مەنسىنبەيتىن باسىم قولاڭسا ساسىعان قوي ەتىنە قور بولاتىن بولدىم», دەپ سىڭسىپ بارادى دەيدى. سول ايتقانداي, ءتورت ت ۇلىگىمەن ءماشھۇر سوزاق ەندى الدىڭىزعا بىلەكتەي سازانىن سىيعا تارتادى. باقتيار تايجان, «ەگەمەن قازاقستان». وڭتۇستىك قازاقستان وبلىسى.