دەپۋتات الماس تۇرتاەۆ قىزىلوردا كاسىپكەرلەرىمەن كەزدەستى

استانا. 30 ماۋسىم. قىزىلوردا قالاسىندا پارلامەنت ءماجىلىسىنىڭ دەپۋتاتى الماس تۇرتاەۆ كاسىپكەرلەردىڭ قۇقىعىن قورعاۋ كەڭەسىنىڭ وتىرىسىنا قاتىستى. وندا دەپۋتات ايماقتاعى كاسىپكەرلىك سالاسىنىڭ جاي-كۇيىمەن تانىستى. بۇل تۋرالى وبلىستىق كاسىپكەرلەر پالاتاسىنىڭ ءباسپاسوز قىزمەتى حابارلادى. جىل باسىنان بەرى كاسىپكەرلەردىڭ قۇقىعىن قورعاۋ كەڭەسىنىڭ 6 وتىرىسى وتكىزىلدى. كەڭەس وتىرىسىندا قارالعان 18 ماسەلە بويىنشا 16 كاسىپكەردىڭ قۇقىعى قورعالعان. كەزەكتى كەڭەس وتىرىسىندا كاسىپكەرلەر پالاتاسى ديرەكتورىنىڭ ورىنباسارى دارحان مىرزاليەۆ: «وڭىردەگى قاداعالاۋشى ورگان وكىلدەرى مەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ بىرىگە جۇمىس جاساۋ ناتيجەسى بويىنشا 7 لاۋازىمدى تۇلعا تارتىپتىك شاراعا قولدانىلدى. وسى جەردە ايتا كەتەيىن, كاسىپكەرلەردىڭ ماسەلەسىن قاراستىرۋدا جەرگىلىكتى اتقارۋشى ورگاندارعا سۇرانىس حاتتار جولدانادى. الايدا, بۇل حاتتار قالالىق جەر قاتىناستارى, ساۋلەت جانە قالا قۇرىلىسى بولىمدەرى تاراپىنان ءجيى جاۋاپسىز قالىپ وتىرادى. وسىنىڭ سالدارىنان كاسىپكەرلىك سۋبەكتىلەرىنىڭ وتىنىشتەرىن قاراۋ مەرزىمى ساقتالماي, كاسىپ يەلەرى ءبىراز ابىگەرگە تۇسەدى», – دەدى. بۇل ماسەلەگە قاتىستى كەڭەس توراعاسى الماس تۇرتاەۆ: «كاسىپكەرلەر – ءوزىن عانا ەمەس, باسقا دا ازاماتتاردى جۇمىسپەن قامتي وتىرىپ, ەل قازىناسىنا قارجى قۇيىپ, سول ارقىلى مەملەكەتتىك قىزمەتكەرلەردىڭ جالاقى الۋىنا جاعداي جاساپ وتىرعان قوعامنىڭ بەلسەندى توبى. سوندىقتان كاسىپكەرلىكتىڭ دامۋىنا كەدەرگى كەلتىرەتىن اكىمشىلىك كەدەرگىلەردى بولدىرماۋ ءۇشىن جەرگىلىكتى اتقارۋشى ورگانداردىڭ جۇمىستارىنا ىشكى باقىلاۋدى كۇشەيتۋ قاجەتتىلىگى تۋرالى قالا اكىمدىگىنە ۇسىنىس جولداۋدى تاپسىرام», – دەپ ءسوزىن تۇيىندەدى. ايتا كەتەيىك, الداعى ۋاقىتتا بۇل شارادان دا ناتيجە شىقپاسا, كاسىپكەرلىكتىڭ دامۋىنا كەدەرگى كەلتىرىپ وتىرعان ءتيىستى قىزمەتكەرلەردىڭ اتى اتالىپ, ءتۇسى تۇستەلىپ, قوعام نازارىنا ۇسىنىلاتىن بولادى. تالعات رايىمبەك. دەرەك, سۋرەت: قىزىلوردا وبلىستىق كاسىپكەرلەر پالاتاسىنىڭ ءباسپاسوز قىزمەتى.