استانا اۋەجايىنىڭ الەۋەتى ارتادى

كەشە ورتالىق كوممۋنيكاتسيالار قىزمەتىندە «استانا حالىقارالىق اۋەجايى» اق-تىڭ باسقارما توراعاسى قايرات جاۋحانوۆ ءباسپاسوز ءماسليحاتىن وتكىزدى. ول اۋەجايدىڭ قايتا قۇرىلىمدالىپ, جاڭارۋى جونىندە اڭگىمەلەپ, جۋرناليستەردىڭ سۇراقتارىنا جاۋاپ بەردى. مەملەكەت باسشىسى «نۇرلى جول – بولاشاققا باستار جول» اتتى جولداۋىندا وسى جىلى استانا اۋەجايىنىڭ جاڭا تەرمينال قۇرىلىسى مەن جاڭا ۇشۋ-قونۋ جولاعىن سالۋ ءۇشىن ۇلتتىق قوردان قاراجات ءبولۋ قاجەتتىگىن اتاعان بولاتىن. ناتيجەسىندە, اۋەجايدىڭ جولاۋشى قابىلداپ-جونەلتۋ قابىلەتى 2017 جىلعا قاراي 7,5 ملن. ادامعا دەيىن ۇلعايتىلاتىنىن ايتقان ەدى. وسى جونىندە اڭگىمەلەگەن سپيكەر, ەلباسى جولداۋىندا بەرىلگەن تاپسىرمالاردىڭ تولىق ورىندالىپ جاتقانىن ايتا كەلىپ, اۋەجايدىڭ ەندىگى جاڭا اۋماعى 45 مىڭ شارشى مەتردى قۇرايتىنىنا توقتالدى. «بۇگىنگى كۇنى اۋەجاي قولدانىسىنداعى تەرمينال ءوزىنىڭ رەسۋرستارىن تولىعىمەن سارقىپ بولدى. سەبەبى, جولاۋشىلاردى قابىلداۋ اعىنى ءۇش ميلليون ادامعا جەتەدى. سوندىقتان, ەكسپو-عا بايلانىستى سالىناتىن جاڭا جولاۋشىلار تەرمينالىنىڭ كولەمى ارتىپ, ونىڭ اۋماعى 45 مىڭ شارشى مەتردى قۇراماق. ال جولاۋشىلار وتكىزۋ قابىلەتى جىلىنا 7,5 ملن. ادامعا جەتەدى», دەدى ق.جاۋحانوۆ. بۇگىندە ۇلتتىق قوردان حالىقارالىق اۋەجاي تەرمينالىن قايتا جاڭعىرتۋ جۇمىستارىنا 29 ملرد. تەڭگە بولىنگەلى تۇر ەكەن. بۇدان بولەك, قوسىمشا قارجى اكتسيونەرلەر تاراپىنان قۇيىلىپ, زاەمدىق قاراجاتتار دا تارتىلاتىن كورىنەدى. وسىنى ايتقان باسقارما توراعاسى, استانا اۋەجايى قازاقستاندا جولاۋشىلارعا قىزمەت كورسەتۋ بويىنشا ەكىنشى ورىندا تۇرعانىن تىلگە تيەك ەتتى. ونىڭ سوزىنە يلانساق, استانا حالىقارالىق اۋەجايىنىڭ جولاۋشىلار اعىنى  جىل سايىن شامامەن 11-12 پايىزعا ارتىپ كەلەدى ەكەن. مىسالى, 2010 جىلى جولاۋشىلار اعىنى 1 ملن. 600 مىڭ ادامعا جەتكەن بولسا, 2014 جىلى جولاۋشى سانى 3 ملن. مەجەنى ەڭسەرىپتى. جولاۋشىلار سانىنىڭ ارتۋىنا ءبىرىنشى كەزەكتە اۆياكومپانيالاردىڭ جاڭا باعىتتاردى اشۋى سەبەپ بولىپتى. ۇشۋ باعىتتارىنىڭ جيىلىگى دە بۇل كورسەتكىشكە سەرپىن بەرىپتى. نۇرباي ەلمۇراتوۆ, «ەگەمەن قازاقستان».