ءبىزدىڭ تاڭداۋىمىز – بىرلىك پەن تاتۋلىق
بۇل – وتانىمىزدىڭ تابىستى دامۋىنىڭ باستى كەپىلى
شەرحان مۇرتازا,
قازاقستاننىڭ حالىق جازۋشىسى.
دۇنيە دۇربەلەڭ كۇي كەشىپ تۇر قازىر. الەم ەرتەڭى ءۇشىن الاڭداۋلى. ءتىپتى, الاڭداۋى ابىرجۋعا اينالىپ بارا جاتقان سىڭايلى. سەبەبى, بولاشاقتا نە بولىپ, نە قويارى بەلگىسىز. الماعايىپتاردان قاۋىپ ويلايدى. سول ءۇشىن دە كۇللى جاھان جانتالاسقا تۇسكەن. وسىنداي جاعدايدا قازاعىمنىڭ – حالقىمنىڭ, قازاقستانىمنىڭ – ەلىمنىڭ تاعدىر-تالايى قانداي تالقىعا تۇسەر ەكەن, ماڭدايىندا قانداي جۇلدىز جارقىراپ تۇر ەكەن دەپ اسىرەسە, ءبىز سياقتى قارت قالامگەردىڭ باياعى ابىزدارشا تولعانۋى ءجون-اق.
ال سول اسان قايعىلار, ەل قامىن جەگەن ەدىگەلەر, ارعى-بەرگى ابىزدار نە دەر ەدى؟ «قۇيرىعى جوق, جالى جوق, قۇلان قايتىپ كۇن كورەر؟» دەپ توگە كەلە: «ەلىم قايتىپ كۇن كورەر؟!» دەيتىن شەرلى دە تەبىرەنىستى ساۋالدى العا تارتار ەدى عوي. وسىنداي ابىز ساۋال بۇگىن دە, بۇگىنگى قازاق ەلىنىڭ تاعدىر-تالايى جونىندە دە قويىلىپ وتىر.
قازاقستاننىڭ بولاشاعى ءۇشىن ەل سەنەتىن, سىننان وتكەن ەر كەرەك. ەرتەڭگى بولاتىن سايلاۋدا ماڭدايى جارقىرايتىن ەرىمىز نۇرسۇلتان نازارباەۆ دەپ بىلەمىن. ول ءوز حالقىنىڭ اياعى دا, قولى دا, جالى دا, قاناتى دا بولىپ تا كەلگەن, بولىپ تا ءجۇر, بولا دا الادى.
ەل سەنەتىن ەرىمىز – نۇرسۇلتان. بۇل جاعدايدى ەلباسىمىز دا, ونىڭ سوڭىنان ەرگەن ەلى دە ەسكەرسە كەرەك. مەنىڭ ايتار امانات تىلەگىم وسى.
الماتى.
الاڭسىز ەڭبەك ادامدى وسىرەدى
ەلباسى نۇرسۇلتان نازارباەۆتىڭ قازاقستان حالقىنا ۇندەۋىن مۇقيات كورىپ, تىڭدادىم. حالىقتىڭ كوكەيىندەگى ماسەلەلەردىڭ بارلىعىن دا نۇرسۇلتان ءابىش ۇلىنىڭ سوزىنەن تاپقاندايمىن. ۋاقىت ءبىزدىڭ ۇرپاققا از جۇك سالىپ وتىرعان جوق. دۇنيەجۇزىلىك قارجى-ەكونوميكالىق داعدارىس قاي ەلدىڭ دە بۇيىرىنەن سىعىپ كەلەدى. جاھاندىق گەوساياسي قايشىلىقتار, ياعني ۇلكەن ەلدەردىڭ اراسىنداعى كيكىلجىڭدەر دە بەلەڭ الىپ تۇر. اينالامىزداعى ەلدەردە بەرەكەسىزدىك جايلاعانىن, ادام شىعىنى شىبىنداي بولىپ جاتقانىن كورىپ, ءبىلىپ وتىرمىز. مەن – تازا ەڭبەك ادامىمىن. بۇكىل عۇمىرىم شارۋانىڭ قاسىندا, اۋىلدا ءوتىپ كەلەدى. ەڭبەك ەتكەن ادامعا داعدارىس تىزەسىن اسا باتىرا المايدى. اۋىلداعى ادامداردىڭ استىعى, ۇنى, مالى مەن مالىنىڭ جەم-ءشوبى, وتىن-سۋى بولسا, داعدارىس وعان نە ىستەيدى؟ بۇلاي دەيتىنىم, اۋىلداعى ەڭبەك ادامى وندىرگەن اۋىل شارۋاشىلىعى تاۋارلارىنا ءبارىبىر سۇرانىس بولادى. باسقا بولماسا دا, ازىق-ت ۇلىكسىز قاي ەل دە وتىرا المايدى. اۋىل شارۋاشىلىعىنا مەملەكەت تاراپىنان كوپتەگەن قولداۋ كورسەتىلىپ وتىر. سۋبسيديالار سونىڭ دالەلى. مەملەكەتتىك باعدارلامالار دا اۋىلداعى شارۋانىڭ ەڭبەگىن جەڭىلدەتىپ وتىر. مىنە, وسىنىڭ بارلىعى دا ەلدەگى تىنىشتىقتىڭ ارقاسى. ەلباسى نۇرسۇلتان نازارباەۆقا حات جازعان نينا ميسوچەنكو زامانداسىمىز بەن بايقۋانىش سارسەمبين اقساقالدىڭ ايتقان پىكىرىن, تىلەگىن ءبارىمىز دە ايتىپ وتىرمىز. ۇيدە بەرەكە بولماسا, ەر ازاماتتىڭ سىرتتاعى ءىسى وڭار ما؟ وسى ءتامسىل ءبىر وتباسىنا عانا ەمەس, ءبىر ەلگە دە مىسال بولارلىق ەمەس پە؟ قازىر ادامدار الاڭسىز ەڭبەك ەتكىسى كەلەدى. ەڭبەك بولماي, نان, داستارقان بەرەكەسى بولمايتىنىن قازىر بارلىعى دا تۇسىنگەن. سول ءۇشىن ەلگە تىنىشتىق كەرەك. سايلاۋدىڭ 26 ساۋىردە بولاتىنىن ەستىپ, بىلدىك. ەندى ءبىر تىلەگىم, نۇرسۇلتان ءابىش ۇلى سايلاۋعا ءوزىنىڭ كانديداتۋراسىن ۇسىنۋعا ءتيىستى. بۇگىنگىدەي بەلاسار ىستەردى جارتى جولدا قالدىرماۋ كەرەك قوي. سوندىقتان پرەزيدەنتتىك سايلاۋدى حالقى نۇرسۇلتان نازارباەۆسىز ەلەستەتىپ وتىرعان جوق. سايران بۇقانوۆ, قازاقستاننىڭ ەڭبەك ەرى. قوستاناي وبلىسى, مەڭدىعارا اۋدانى.باقىتىمىز باياندى بولا بەرسىن دەسەك...
مەملەكەت باسشىسىنىڭ قازاقستان حالقىنا ۇندەۋىنىڭ ءار جولىنان مەن نۇرسۇلتان ءابىش ۇلىنىڭ ەلىم, جۇرتىم, حالقىم دەپ سوققان جۇرەگىنىڭ ءلۇپىلىن تانىدىم. ءجۇرەكتەن شىقپاسا, جۇرەككە جەتپەيدى دەپ قازاقستاننىڭ حالىق جازۋشىسى قادىر مىرزا-ءالى ورىندى ايتقانداي, بۇل ۇندەۋ ەلباسىنىڭ شىنايى اق ادال جۇرەگىن جارىپ شىققان سارابدال ءسوز ەكەنىنە بارشا قازاقستاندىق ەشقانداي شەك كەلتىرمەيدى دەپ سەنەمىن. ءبىز ءۇشىن تۋعان ەلدىڭ ءبىر ۋىس توپىراعىنان ارتىق قاسيەتتى جەر جوق. ءبىر ءتۇپ جۋساننان ارتىق جۇپار ءيىس جوق دەپ تەبىرەنەدى ەلباسى. بۇل ەكەۋى دە حالقىمىز ءۇشىن وتە ىستىق, اسا قاستەرلى ۇعىمدار. ءارى ونى ەلباسى جالاڭ, ءۇستىرت ماعىناسىندا ايتىپ وتىرماعانىنا دا سەنىمىمىز كامىل. ويتكەنى, ءبىر ۋىس توپىراق پەن جۋسان ءيىسىنىڭ تەرەڭ نىشاندىق ءمانى دە بار. ونىڭ ارعى جاعىندا تۇتاستاي ەلدىك پەن مەملەكەتتىلىككە ۇندەۋ, ونىڭ باياندى بولۋىنا اركىمنىڭ اتسالىسۋى مەن ءۇن قوسۋى دەگەن تەرەڭ ماعىنا بار دەپ ويلايمىن. مەن مىناۋ جالپاق دۇنيەدە ەلدىككە ءۇن قوسۋدان ارتىق قاسيەتتى دە قاستەرلى مىندەت بار دەپ ويلامايمىن. پرەزيدەنتتىك سايلاۋ سەكىلدى اسا ماڭىزدى ماسەلەگە دە وسى تۇرعىدان كەلۋگە بولادى. رەسپۋبليكا پرەزيدەنتى نۇرسۇلتان نازارباەۆتىڭ قازاقستان حالقىنا ءۇندەۋىنىڭ ءار جولىندا وسىنداي اسقاق مۇراتتار اتويلاپ تۇرعانداي كورىنەدى. پرەزيدەنت ءوز ۇندەۋىندە قازاق ەلىنىڭ نەگىزگى يەسى قازاق حالقىنا ءسوز ارناي وتىرىپ, ونىڭ تاريحي جادى مىقتى, سوڭىنا قاراپ ءتاۋبەسىن ايتقان, جولىنا قاراپ تاۋەكەل ەتكەن حالىق ەكەنىن قالاي ءدال تاۋىپ ايتقانىنا تاعى ءبىر ءتانتى بولىپ وتىرعان جايىمىز بار. بۇل ءارى ۇلكەن سەنىم. مۇنداي ورەسى بيىك حالقى بار ەلدىڭ تۋى قاشاندا بيىك بولا بەرمەك. ال تۋعان ەلى مەن حالقىن شەكسىز سۇيە بىلەتىن ونىڭ قايتالانباس قادىر-قاسيەتىنە باسىن يە الاتىن باسشىسى بار ەل باقىتتى ەل. وسى باقىتىمىز باياندى بولا بەرگەنىنە نە جەتسىن؟! سوندىقتان دا ءبىز, ورالدىق اعا ۇرپاق وكىلدەرى ەلباسىمىز نۇرسۇلتان نازارباەۆتىڭ الداعى پرەزيدەنتتىك سايلاۋعا تۇسۋىنە كەلىسىم بەرۋىن جاقتايمىز. مۇنى باسىمىزدان باق تايماي, مەملەكەتىمىزدىڭ تۇراقتى تۇردە ودان ءارى دامي بەرۋى ءۇشىن قاجەت قادام دەپ تۇسىنەمىز. ساعي الدابەرگەنوۆ, ورال قالالىق ارداگەرلەر كەڭەسىنىڭ توراعاسى. باتىس قازاقستان وبلىسى.ىلكىمدى ىستەر جالعاسىن تابۋى ءتيىس
قازاقستان حالقى اسسامبلەياسىنىڭ پرەزيدەنتتىك سايلاۋدى 2015 جىلى وتكىزۋ تۋرالى ۇسىنىسىن ەلىمىزدىڭ بۇكىل حالقى قولداۋ ۇستىندە ەكەنىن كۇندەلىكتى باق-تاردان كورىپ وتىرمىز. بۇل ۇسىنىستى ەلباسىنىڭ ساياساتىن جۇزەگە اسىرۋشىلار بولىپ تابىلاتىن اكىمدەر دە تولىق قولدايدى. تاۋەلسىزدىك العان 1991 جىلدان باستاپ بۇگىنگى كۇنگە دەيىن تۇڭعىش پرەزيدەنتىمىز ن.نازارباەۆتىڭ دانا باسشىلىعىنىڭ ءناتيجەسىندە ەلىمىزدە ادام سەنگىسىز جۇمىستار اتقارىلدى. ونى الەم ەلدەرى مويىنداپ وتىر. 1997 جىلى ەلباسىنىڭ تىكەلەي ءوزى جاساپ, حالىققا ۇسىنعان «قازاقستان-2030» ستراتەگياسى مەرزىمىنەن بۇرىن ورىندالىپ, دامىعان 50 ەلدىڭ قاتارىنا ەندىك. 2014 جىلى قابىلداعان «قازاقستان-2050» ستراتەگياسىن ورىنداۋ ۇستىندەمىز. الداعى ۋاقىتتاردا الەمدەگى دامىعان 30 ەلدىڭ قاتارىنا ەنۋ مىندەتى تۇر. بۇل مەجەگە جەتۋ ءۇشىن ەلىمىزدە ءبۇگىنگى كۇنى ساقتالىپ تۇرعان تۇراقتىلىق پەن بەيبىتشىلىكتى, الەۋمەتتىك جانە ەكونوميكالىق دامۋدى الداعى ۋاقىتتاردا دا جالعاستىرىپ, نىعايتۋىمىز قاجەت. ول ءۇشىن ەلدى دامىتۋ ماقساتىندا تىنىمسىز ەڭبەك ەتىپ كەلە جاتقان, وسى جولدا وراسان جەتىستىكتەرگە جەتكەن, «قوي ۇستىنە بوزتورعاي جۇمىرتقالاعان» كەزەڭدى قامتاماسىز ەتكەن پرەزيدەنتىمىز ن.نازارباەۆتى كەلەسى كەزەڭگە تاعى دا سايلاپ الۋىمىز كەرەك. پرەزيدەنتتىك سايلاۋدى ەرتەرەك وتكىزۋدىڭ تاعى ءبىر سەبەبى, الەمدىك قارجى-ەكونوميكالىق داعدارىس تا بەلەڭ الا تۇسۋدە. داعدارىستىڭ كۇشەيەتىن كەزى – 2016 جىلعا پرەزيدەنتتىك جانە پارلامەنتتىك سايلاۋلار قاتار كەلىپ تۇر. مۇنىڭ حالىق ءۇشىن پسيحولوگيالىق تۇرعىدان جانە ەكونوميكالىق جاعىنان دا قيىندىعى بار. سوندىقتان حالىق داعدارىستان قينالماي ءوتۋى ءۇشىن جانە الداعى كەزەڭدە ماڭىزدى دا ىلكىمدى ىستەردى جالعاستىرۋ ءۇشىن بۇگىنگى ەل پرەزيدەنتى ن.نازارباەۆتى قايتا سايلاپ الۋ اۋاداي قاجەت. ءبىز ارقاشاندا ەلباسىمەن بىرگەمىز! دىلدابەك ورازباەۆ, تارباعاتاي اۋدانىنىڭ اكىمى. شىعىس قازاقستان وبلىسى.ەلى ەلباسىنا سەندى, سەنە بەرەدى دە
مەن پرەزيدەنت نۇرسۇلتان نازارباەۆتىڭ قازاقستان حالقىنا ۇندەۋىن تەلەديداردان تىڭدادىم. كەيىن «ەگەمەن قازاقستاننان» وقىپ شىقتىم. «سايلاۋ ەلىمىزدى ۇلى ىستەرگە ۇيىستىرىپ, باياندى بولاشاق جولىندا بىرىكتىرە تۇسەرىنە سەنەمىن. قازاقستاندىقتاردى ەل تاريحىنداعى تاعى ءبىر تاعدىرلى وقيعاعا جاۋاپكەرشىلىكپەن قاراپ, بەلسەنە قاتىسۋعا شاقىرامىن», دەگەن ءسوزى اتا جاسىنداعى جازۋشى مەنى عانا ەمەس, بۇكىل ەلدى, ءبۇتىن قاۋىمدى تەبىرەنتكەنىنە سەنىمدىمىن. بۇگىنگىدەي الماعايىپ جاعدايداعى اۋمالى-توكپەلى زاماندا وسى كۇنگە دەيىن ەلدىڭ, حالىقتىڭ, جۇرتتىڭ سەنىمىنەن شىعىپ كەلە جاتقان ەلباسىمىز نۇرسۇلتان نازارباەۆقا سەنبەگەندە, كىمگە سەنەمىز؟ حالقىمىزدى تاتۋ تىرلىككە باستاي بىلگەن نۇرسۇلتان نازارباەۆقا ەلىنىڭ سەنگەنىنە, سەنە ءبىلگەنىنە, سەنە بەرەتىنىنە قارت قالامگەر, ۇلى وتان سوعىسىنىڭ ارداگەرى رەتىندە مەنىڭ دە سەنگىم كەلەدى. مۇزافار الىمباەۆ, قازاقستاننىڭ حالىق جازۋشىسى. الماتى.قارت جاۋىنگەردىڭ اعالىق تاپسىرماسى
مەن ۇلى وتان سوعىسىن باستان-اياق وتكەرگەن جاۋىنگەر سولداتپىن. سوعىستان كەيىن دە گەرمانيانىڭ يلمەناۋ قالاسىندا اسكەري كومەندانت قىزمەتىن اتقاردىم. كورگەنىم دە, بىلگەنىم دە كوپ. سوندىقتان دا ومىرلىك تاجىريبەم مول. قۇدايعا شۇكىر, قازاق ەلىنىڭ تاۋەلسىز مەملەكەت بولعانىنىڭ دا كۋاگەرى بولدىم. 90-عا كەلگەن جاسىم بار, ومىرگە, اللاعا ءدان ريزامىن. سونىڭ ىشىندە, تاۋەلسىزدىك جىلدارىنداعى قول جەتكەن تابىستاردىڭ ءبارى ەلباسىمىز – نۇرسۇلتان نازارباەۆتىڭ ارقاسى ەكەندىگىن دە جاقسى بىلەمىن. بۇرىن قازاقستاندى, قازاق ۇلتىن كىم ءبىلۋشى ەدى؟ گەرمانيادا قىزمەت ەتكەندە مەن ۇلتىمدى ايتسام ولار تۇسىنبەيتىن. ەندى مىنە, قازاقستان, قازاق حالقىن بۇكىل الەم تانيتىن مىقتى مەملەكەتكە, قۋاتتى ەلگە اينالدى. دۇنيەگە ءوزىن مويىنداتتى, ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتتى. قازىرگى قولعا الىپ جاتقان «2050», «نۇرلى جول» ستراتەگيالىق باعدارلامالارى دا ەلىمىزدىڭ تۇرمىس جاعدايىن جاقسارتىپ, كەلەشەككە باعىتتالعان ومىرشەڭ جوبالار. «تاريحتى تۇلعالار جاسايدى» دەگەن شىندىق ءسوز بار. قازاقستاننىڭ قازاقستان بولۋىن جاساعان تۇلعا – نۇرسۇلتان نازارباەۆ. كەيدە «باسقا بىرەۋ باسشى بولسا, نە بولار ەدىك, ەلىمىزدىڭ جاعدايى قانداي بولار ەدى», دەپ تە ويلاپ قويامىن. ەندى مىنە, بۇكىل ەل بولىپ, ۇلى جەڭىستىڭ 70 جىلدىعىن تويلاۋعا قىزۋ دايىندالىپ جاتىر. ەلباسى وسىعان قاتىستى تاپسىرمالار جۇكتەگەنىن دە وقىپ ءجۇرمىن. اماندىق بولسا, دەنساۋلىق بولسا, ول قىزىقتى دا كورەمىن دەگەن ۇمىتتەمىن. سوعىس ارداگەرلەرىنىڭ قاتارى كۇننەن-كۇنگە سيرەپ بارادى. ارداگەرلەرگە دەگەن قامقورلىقتى كۇندەلىكتى كورىپ جاتىرمىز. ەلباسى ارقاشان ارداگەرلەرگە ەرەكشە ىقىلاس پەن قولداۋ كورسەتەدى. سول ءۇشىن دە مەملەكەت باسشىسىنا ريزاشىلىعىمدى بىلدىرەمىن. ال ەندى, الدىمىزدا پرەزيدەنت سايلاۋى كەلە جاتىر. مەن, توقسانداعى اقساقال رەتىندە, جاقسى كورەتىن, قۇرمەت تۇتاتىن اعاسى رەتىندە نۇرسۇلتان ءابىش ۇلىنا پرەزيدەنتتىككە ءتۇسۋ جونىندەگى ەل تىلەگىن قابىل الۋىن سۇراپ قانا قويمايمىن, «قاراعىم, حالقىڭنىڭ بولاشاعى ءۇشىن سايلاۋعا ءتۇس» دەپ تالاپ ەتەمىن. بۇلاي سويلەۋىمدى ەلباسىمىز ايىپقا بۇيىرماس. نە ايتساق تا, قالاي ايتساق تا حالىق ءۇشىن ايتامىز. قالمۇقان يساباەۆ, جازۋشى, ۇلى وتان سوعىسىنىڭ ارداگەرى. الماتى.قازاقستاندىقتار ءۇشىن قاجەت
قازىر ەلىمىزدە زور رۋحاني سەرپىلىس بولىپ جاتىر. كەزەكتەن تىس پرەزيدەنتتىك سايلاۋدى وتكىزۋ تۋرالى شەشىم قابىلداندى. بۇل – اسا جاۋاپتى كەزەڭ. ءبىزدىڭ ارمانىمىز – تاۋەلسىزدىك ەدى. قازاقستان حالقىنىڭ باقىتتى, مەملەكەتىمىزدىڭ داۋلەتتى, ساۋلەتتى ەل بولۋى ەدى. شۇكىرشىلىك, بۇگىندە سوعان جەتىپ وتىرمىز, ءبارىن دە كورىپ وتىرمىز. وسى تاۋەلسىزدىكتىڭ باسى-قاسىندا جارعاق قۇلاعى جاستىققا تيمەي ەڭبەك ەتىپ, ەلىمىزدىڭ ەڭسەسىن كوتەرىپ, نۇرلى بولاشاققا جەتەلەگەن, ەلىمىزدىڭ ەگەمەندىگى ءۇشىن ايانباي قىزمەت ەتكەن ءبىر ادام بار بولسا, ول – نۇرسۇلتان نازارباەۆ. جۋىردا ۇلىتاۋ تورىندە بەرگەن سۇحباتىندا پرەزيدەنت وسى تاۋەلسىزدىگىمىزدى كوزدىڭ قاراشىعىنداي ساقتاپ قالۋىمىز كەرەكتىگىن, ونىڭ قازاق حالقىنا اۋاداي قاجەتتىگىن مىقتاپ ايتقان بولاتىن. قازاق تاريحىندا سان عاسىرلار بويعى بابالارىمىز ارمانداعان وسى تاۋەلسىزدىك جولىندا 300-دەن اسا ازاتتىق كوتەرىلىسى بولىپتى. ەڭدەشە, ءبىزدىڭ بۋىن وسى تاۋەلسىزدىكتى ەل بولىپ, حالىق بولىپ, قاسىق قانىمىز قالعانشا قورعاۋعا ءتيىسپىز. ن.نازارباەۆ – كوپتەگەن الەمدىك, رەسپۋبليكالىق دەڭگەيدەگى باستامالاردىڭ اۆتورى. ول – وتە جاڭاشىل ادام. تاۋەلسىزدىك العاننان باستاپ, ەلىمىزدىڭ ەكونوميكالىق, ساياسي, سونداي-اق, رۋحاني-الەۋمەتتىك جاعىن قامتىعان, بۇرىن-سوڭدى بولماعان ستراتەگيالىق جوسپارلاۋدى ەنگىزدى. ول دامىعان وزگە ەلدەردىڭ دە جاعدايىن زەرتتەي وتىرىپ, ءبىزدىڭ ەلىمىزدىڭ بولاشاق دامۋى ءۇشىن ستراتەگيالىق جوسپارلاردى قابىلدادى. 2030 باعدارلاماسى مەرزىمىنەن بۇرىن ورىندالىپ, 2050 جاڭا ساياسي ستراتەگياسى قابىلداندى. نەگىزگى باسىمدىق – الەمدىك تۇراقسىزدىق جاعدايىندا ءوز قاۋىپسىزدىگىمىزدى قامتاماسىز ەتۋ. قازاق ۇلتىنىڭ ميسسياسى – قوعامدا قالىپتاسقان بىرلىكتى, تاتۋلىقتى ساقتاۋ. قازاقستانداعى ءار الۋان ۇلت پەن ەتنوس وكىلدەرىنىڭ ءبىر وتباسىنداي بولۋى ءۇشىن, ەكونوميكامىزدىڭ العا جىلجۋى ءۇشىن ءاردايىم ىنتىماق-بىرلىكتە بولۋعا ءتيىسپىز. ەل بولۋ ءۇشىن جۇمىلعان جۇدىرىقتاي بىرلىك قاجەت. 26 ساۋىردە پرەزيدەنتتىك سايلاۋ بولماقشى. ەلباسى 24 جىل بويى قازاقستاندى جاقسى باستاپ الىپ كەلە جاتىر. وسى سايلاۋعا نۇرسۇلتان نازارباەۆتىڭ قاتىسۋى ءبىز ءۇشىن – قازاقستاندىقتار ءۇشىن قاجەت. ەندەشە, ءوزى باستاعان اۋقىمدى ىستەرىن العا جىلجىتىپ, ەلىمىزدىڭ اۋقاتتى, داۋلەتتى, الەمگە ايگىلى بولا ءتۇسۋى ءۇشىن نۇرسۇلتان ءابىش ۇلىنىڭ كانديداتۋراسىن پرەزيدەنتتىككە ۇسىنعان تىلەكتەردى ەسكەرۋىن سۇرايمىز. ابدىمالىك نىسانباەۆ, اكادەميك, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى. الماتى.سەنىم سەرپىلىس سىيلايدى
سوڭعى ۋاقىتتا تەلەديدار مەن ءباسپاسوز ارقىلى ەلىمىزدە وتەتىن پرەزيدەنتتىك سايلاۋ بارىسىنان كۇندەلىكتى حاباردار بولىپ وتىرمىن. بۇل – ەلىمىز ءۇشىن ۇلكەن ماڭىزى بار ساياسي وقيعا. ەلباسى جارلىعىمەن سايلاۋدىڭ وتەتىن كۇنى ءۇستىمىزدەگى جىلدىڭ 26 ساۋىرىنە بەلگىلەندى. وسىعان وراي, سايلاۋعا تۇسەتىن كانديداتتار ىشىنەن بارشا قازاقستاندىقتار مەملەكەت باسشىسى نۇرسۇلتان نازارباەۆتى كورگىسى كەلىپ وتىرعانى جاسىرىن ەمەس. ءبىز, سپورت سالاسىندا تەر توگىپ جۇرگەن ازاماتتار, ەلباسىنىڭ وتاندىق سپورتتى دامىتۋعا, قازاقستاندىقتاردى بۇقارالىق سپورت تۇرلەرىمەن قامتۋ ءۇشىن قاجەتتى ينفراقۇرىلىمداردى جاقسارتۋعا ەرەكشە كوڭىل بولەتىنىن, ۇنەمى ءجىتى نازارىندا ۇستايتىنىن جاقسى بىلەمىز. تۇڭعىش پرەزيدەنتىمىز ۇلتتىق سپورت تۇرلەرىنىڭ دە جاڭا دەڭگەيگە كوتەرىلۋىنە وراسان زور ىقپال ەتتى. قازىرگى كەزدە قازاقتىڭ كونەدەن كەلە جاتقان سپورتتىق ويىندارى زامان اعىمىنا ساي ءتۇرلەنىپ, حالىقارالىق سيپات الدى. وتانداستارىمىز بەن شەتەلدىكتەردىڭ قازاق حالقىنىڭ ۇلتتىق سپورتىنا دەگەن قىزىعۋشىلىعى مەن قۇرمەتى وياندى. بۇل ءوز كەزەگىندە جاس ۇرپاقتىڭ رۋحىن كوتەرەتىنى, كەۋدەسىندە ماقتانىش سەزىمىن ۇيالاتاتىنى جاسىرىن ەمەس. قازاقستان رەسپۋبليكاسى پرەزيدەنتىنىڭ كۋبوگى ساراپقا سالىناتىن «قازاقستان بارىسى» ءتۋرنيرى شىن مانىندەگى بەدەلدى جارىستاردىڭ بىرىنە اينالدى. بۇل باسەكەدە باعى جانعان بالۋان ءبىر كۇندە كۇللى جانكۇيەر الدىندا قوشەمەتكە بولەنىپ, تانىمال بولاتىنىنا وتكەن جىلى اتالعان جارىستىڭ جەڭىمپازى اتانعاندا كوز جەتكىزدىم. بۇل – قازاق كۇرەسىنىڭ, قازاقستاندىق سپورتتىڭ قول جەتكىزگەن بيىگى دەپ بىلەمىن. ال بۇل بيىككە مەملەكەت باسشىسىنىڭ سپورتتىڭ دامۋىنا كورسەتكەن قامقورلىعىنىڭ ارقاسىندا قول جەتكىزدىك. بۇگىندە ءبىزدىڭ جاتتىعۋىمىزعا, ءوز-ءوزىمىزدى شىڭداۋىمىزعا مەملەكەت تاراپىنان بارلىق جاعداي جاسالعان. سوندىقتان ەلباسى نۇرسۇلتان نازارباەۆتىڭ كەزەكتەن تىس پرەزيدەنتتىك سايلاۋعا قاتىسقانىن قالايمىز. بۇل – مەملەكەتىمىزدىڭ تۇراقتى دامۋى مەن بەرەكە-بىرلىگىن ساقتاۋدىڭ كەپىلى. كەزەكتەن تىس پرەزيدەنتتىك سايلاۋدا ەلباسىمىزدىڭ بارشا قازاقستاندىقتىڭ قولداۋىنا يە بولاتىنىنا سەنىمىمىز كامىل. مۇحيت تۇرسىنوۆ, «قازاقستان بارىسى-2014» ءتۋرنيرىنىڭ جەڭىمپازى. سەمەي.باردى باعالاي بىلەيىك, اعايىن!
ەلباسىنىڭ قازاقستان حالقىنا ارناعان ۇندەۋىن ەل گازەتى «ەگەمەن قازاقستاننان» وقىپ, وسى جىلدىڭ كوكتەمىندە پرەزيدەنتتىك سايلاۋ وتەتىندىگىنە كوزىمىز انىق جەتىپ, كوكىرەگىمىزدى قۋانىش كەرنەگەنى انىق. ەندىگى تىلەگىمىز جالپىحالىقتىق سۇرانىمدى مەملەكەت باسشىسى قۇپ كورىپ, پرەزيدەنتتىك سايلاۋعا تۇسسە ەكەن دەيمىز. ءناتيجەسىنىڭ جاقسى بولاتىنىنا, ەلىمىزدىڭ دامۋىنا وراي جاسالعان «نۇرلى جول» باعدارلاماسىنا ساي جۇيەلى تۇردە ورلەپ, وركەنيەتتى ەلدەر قاتارىنان ويىپ تۇرىپ ءوز ورنىمىزدى الاتىندىعىمىزعا كامىل سەنىم بار. ولاي دەيتىنىم, بىزدەر, ونەر ادامدارى ساياساتتان دا تىس قالماۋعا تالپىنىپ, ەلىمىزدە ورىن الىپ جاتقان وزگەرىستەردى, ناقتىلاي تۇسسەم, ەلباسىنىڭ باستاماسىمەن ءارى ۇنەمى نازارىنان تىس قالدىرمايتىن ەكونوميكالىق ءوسۋ جولدارىنداعى جەتىستىكتەردى تالقىلاپ تا وتىرامىز. سوندىقتان ءدال وسى ساتتە ۇندەۋگە ءۇن قوسۋدى ءجون كورىپ وتىرمىن. ەلىمىز ەگەمەندىگىن الىپ, مەملەكەتتىك شەكاراسىن بەكىتىپ, سول قۋانىشىن ءتورتكۇل دۇنيەگە پاش ەتكەن ساتىنەن بەرگى جەتىستىكتەردى سارالاساق مەرەيىمىز وسە تۇسەدى. وعان ءبىرىنشى كەزەكتە قازاقستاندىقتارعا بەيبىت زامان مەن تىنىش ءومىر سىيلاعان ەلباسىنىڭ سارابدال ساياساتى نەگىز بولادى. وتانىمىزدا اۋىز تولتىرا ايتاتىن قۋانىشتارىمىز بارشىلىق. قۇدايعا تاۋبە دەي وتىرىپ, بارىمىزدى باعالاي بىلەيىك, اعايىن! پرەزيدەنتتىك سايلاۋدا نۇرسۇلتان نازارباەۆتى قولداپ, داۋىس بەرە بىلسەك, بۇل ءبىزدىڭ ەلدىگىمىزدى تانىتادى. باسقا-باسقا, پرەزيدەنتتىك سايلاۋ – دوسىمىز ءسۇيىنىپ, دۇشپانىمىز كۇيىنەتىن ۇلكەن سىن. تۇتاستاي العاندا, قازاقستاندىقتاردىڭ بۇگىنگى جاقسى ارەكەتىن كورىپ, كوڭىلىم ورنىقتى. ەلىن, جەرىن سۇيەتىن مەملەكەت مۇددەسى ءۇشىن بارىن سالاتىن ونەر ادامدارى داۋىس بەرۋشىلەر كوشىن باتىل باستايدى دەپ بىلەمىن. شىنى كەرەك, بيىلعى جىل جەتىستىكتەرگە تولى ءارى جەمىستى جىل بولارى حاق. وعان تولىق نەگىز بار. قورىتا ايتقاندا, بىزدەر, جەتىسۋلىقتار – ەلباسىنىڭ كىندىك قانى تامعان كيەلى ءوڭىر حالقى قاشاندا الدىڭعى لەكتەن ورىن الىپ جۇرگەنىمىز اقيقات. وسى سايلاۋدا دا جۇدىرىقتاي جۇمىلىپ, بيىك بەلەستەن كورىنەتىندىگىمىزگە سەنىمدىمىن. الماحان كەنجەبەكوۆا, قازاقستاننىڭ حالىق ءارتىسى. تالدىقورعان.
