سولتۇستىك قازاقستاندا ايەلدەردىڭ ءومىر جاسى ۇزاق

پەتروپاۆل. 3 ناۋرىز. سولتۇستىك قازاقستان وبلىستىق ستاتيستيكا دەپارتامەنتى وڭىردەگى ايەلدەرگە قاتىستى بىرقاتار دەرەكتەردى جاريالادى. بۇل تۋرالى egemen.kz ءتىلشىسى حابارلادى. وسى جىلدىڭ 1 قاڭتارىندا وبلىستاعى ايەلدەردىڭ سانى 299,2 مىڭ ادامدى قامتىپ, تۇرعىنداردىڭ 52,3 پايىزىن قۇراعان. ولاردىڭ ىشىندە ەڭبەككە قابىلەتتىلەرى – 176 مىڭ, ەڭبەككە قابىلەتتى جاستان اسقاندارى – 66,4 مىڭ. ايەلدەردىڭ ءومىر ءسۇرۋ ۇزاقتىعى 73,9 جاس. بۇل ەر ادامدارعا قاراعاندا 11 جىلعا ارتىق. 20 جاسقا دەيىنگى ايەلدەردىڭ 9,8, 20-29 جاستاعىلاردىڭ 67, 30-39 جاستاعىلاردىڭ 15, 40-49 جاستاعىلاردىڭ 4,3, 50-59 جاستاعىلاردىڭ 1,9, 60 جاستان اسقانداردىڭ 0,7 پايىزى نەكەگە تۇرعان. بالا تۋعا ەڭ قابىلەتتى كەزەڭ 20-29 جاس ارالىعىنداعى كەلىنشەكتەرگە تيەسىلى. بۇل كورسەتكىش 62,8 پايىز توڭىرەگىندە. وكىنىشتىسى سول, ءبىر وتباسىعا 2 بالادان عانا كەلەدى. سونداي-اق, جىل وتكەن سايىن نەكەسىز تۋاتىن سابيلەردىڭ كوبەيىپ كەلە جاتقانى بايقالادى. ماسەلەن, 2013 جىلى دۇنيە ەسىگىن اشقان بالالاردىڭ بەستەن ءبىرى نەكەسىز تۋىلعان. ولاردىڭ 47,8 پايىزى اتا-انالاردىڭ بىرلەسكەن ءوتىنىشى بويىنشا راسىمدەلگەن. كوشى-قون اينالىمىنداعى ايەلدەردىڭ سانى 17 مىڭعا جەتكەن. وتكەن جىلى وبلىستان تىسقارى جەرلەرگە 5058 ايەل كوشىپ كەتسە 2069 قىز-كەلىنشەك كەلگەنىن ايتا كەتەيىك. ءومىر ەسقالي. دەرەك: egemen.kz. سۋرەت: sko.gov.kz.