سولتۇستىك قازاقستاندا ترەكتىك يپپودرومنان حالىقارالىق جارىس ءوتتى

پەتروپاۆل. 3 ناۋرىز. سولتۇستىك قازاقستان وبلىسى قىزىلجار اۋدانىندا ترەكتىك يپپودرومنان ورال, ءسىبىر جانە قازاقستان كۋبوگىنىڭ التىنشى كەزەڭى جانە ەلىمىزدىڭ اشىق بىرىنشىلىگى ءوتتى. بۇل تۋرالى سولتۇستىك قازاقستان وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى حابارلادى. قىزىلجار اۋدانىنداعى «قۇلاگەر» يپپودرومىندا وتكەن جارىسقا تۇمەن, قورعان, ومبى جانە پەتروپاۆل قالالارىنان 17 ۇمىتكەر قاتىستى. ورال, ءسىبىر جانە قازاقستان اراسىنداعى كۋبوك ءۇشىن جارىس وتكەن جىلعى 23 جەلتوقساندا باستاۋ العان. وسىعان دەيىنگى بەس  كەزەڭ رەسەي قالالارىندا ۇيىمداستىرىلىپ, التىنشى كەزەڭ قىزىلجار وڭىرىندە ءوتتى. «سايىس ەرەجەس بويىنشا قاتىسۋشىلار ۇزىندىعى 1,2 شاقىرىم يپپودرومدى كولىكتەرىمەن 4 رەت اينالىپ اينالىپ ءوتۋى ءتيىس. جەڭىل كولىكتەردىڭ قوزعالتقىش كولەمى 1600 تەكشە سانتيمەتردەن اسپاۋى كەرەك», دەدى تىلشىلەردىڭ ساۋالىنا جاۋاپ بەرگەن اۆتوجارىستىڭ باس تورەشىسى, وبلىستىق اۆتوموتو سپورت فەدەراتسياسىنىڭ ۆيتسە-پرەزيدەنتى ۆلاديمير جۋكوۆەن. يپپودرومنىڭ ايناداي جالتىراعان جولدارىندا ونەر كورسەتۋ, شۇعىل بۇرىلىستاردان شاپشاڭ جىلدامدىقپەن ءوتۋ جان-جاقتى دايىندىقتى, مول تاجىريبەنى قاجەت ەتەرى انىق.  جەكەلەي ەسەپتە قورعان قالاسىنىڭ سپورتشىسى يۋري ماكاروۆ باس جۇلدەنى يەلەندى. سولتۇستىكقازاقستاندىق اۆتوسپورتشى دميتري شاراپاەۆ مارە سىزىعىن ەكىنشى بولىپ كەستى. ال ومبىلىق يگور ۋسوۆ ءۇشىنشى ورىنعا تابان تىرەدى. جالپىكوماندالىق ەسەپتە قورعان قالاسىنىڭ سپورتشىلارى جەڭىستىڭ ءبىرىنشى ساتىسىنا كوتەرىلدى. پەتروپاۆل جانە ومبى قالاسىنىڭ سپورتشىلارى ەكىنشى جانە ءۇشىنشى ورىندارعا يە بولدى. نەگىزگى جارىس اياقتالعاننان كەيىن 6 ۇزدىك سپورتشى كسرو سپورت شەبەرى ۆيكتور اندرۋحانى ەسكە الۋعا ارنالعان سۋپەر جارىسقا قاتىسىپ, ومبىدان كەلگەن يگور ۋسوۆتىڭ باعى جاندى. كۋبوكتىق جارىستىڭ شەشۋشى كەزەڭى ءنوۆوسىبىر قالاسىندا وتەدى. ءومىر ەسقالي. دەرەك: سولتۇستىك قازاقستان وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى. سۋرەت: carakoom.com.