ماجىلىستە پالاتا توراعاسىنىڭ ورىنباسارى سەرگەي دياچەنكو مەن ۋكراينا جوعارعى راداسىنىڭ ىنتىماقتاستىق جونىندەگى توپ مۇشەلەرى پارلامەنتارالىق ءىس-قيمىل مەن جالپى قازاقستان – ۋكراينا قارىم-قاتىناسىن دامىتۋدىڭ ماڭىزدى ماسەلەلەرىن تالقىلادى, دەپ حابارلادى ءماجىلىستىڭ ءباسپاسوز قىزمەتى.
تاراپتار قازاقستان مەن ۋكراينا اراسىنداعى ەكونوميكالىق, ساياسي جانە مادەني بايلانىستاردى نىعايتۋعا قىزىعۋشىلىق ءبىلدىردى. س.دياچەنكو ۋكرايناداعى قوعامدىق-ساياسي جاعدايدى العا تارتا كەلىپ, اتالعان ەلدە ورىن العان داعدارىستى رەتتەۋ جولىن ىزدەستىرۋدە ءبىزدىڭ ەلىمىزدىڭ كوپتەگەن شارالارعا قاتىسۋىنا توقتالدى. وسى رەتتە ءماجىلىس توراعاسىنىڭ ورىنباسارى ەلباسىنىڭ جانجالدى رەتتەۋگە ىقپال ەتۋ ءۇشىن بارلىق تاراپتارمەن بەلسەندى جۇمىس جۇرگىزىپ كەلە جاتقانىن ايرىقشا اتاپ ءوتتى. س.دياچەنكونىڭ پىكىرىنشە, قازاقستان ەڭ الدىمەن, ەكى ەل باسشىلارىنىڭ ەكونوميكالىق ءوزارا ءىس-قيمىلدى كۇشەيتۋگە باعىتتالعان كەلىسىمدەرىن جۇزەگە اسىرۋعا ەرەكشە ماڭىز بەرەدى.
ءوز كەزەگىندە ىنتىماقتاستىق جونىندەگى توپ جەتەكشىسى, جوعارعى رادانىڭ قارجى ساياساتى جانە بانك قىزمەتى ماسەلەلەرى بويىنشا كوميتەت توراعاسىنىڭ ورىنباسارى رۋسلان دەمچاك قازاقستان مەن ۋكراينا اراسىندا ەكىجاقتى قارىم-قاتىناستى كەڭەيتۋدىڭ, اسىرەسە, ەكونوميكا سالاسىندا ولاردى تابىستى دامىتۋدىڭ, سونداي-اق, ينۆەستيتسيالىق الەۋەتتى ارتتىرۋدىڭ مۇمكىندىگى زور ەكەندىگىنە سەنىم ءبىلدىردى. سونداي-اق, ول قازاقستانعا گۋمانيتارلىق كومەك ءۇشىن العىسىن جەتكىزدى.
سەرگەي دياچەنكونىڭ اتاپ وتكەنىندەي, ماجىلىسمەندەر ۋكرايندىق ارىپتەستەرىمەن ءوزارا ءىس-قيمىل قارقىنىن ارتتىرۋعا قاشاندا دايىن. ال پارلامەنتارالىق ۇنقاتىسۋدى ودان ءارى نىعايتۋ ماسەلەلەرى ىنتىماقتاستىق جونىندەگى توپ وكىلدەرىنىڭ بەيىندى كوميتەتتەر توراعالارىمەن كەزدەسۋىندە ودان ءارى جالعاستى.
