مەركەل قازاقستاندى تاڭدادى

استانا. 2 ناۋرىز. قازاقستان فۋتبول قۇراماسىنا تاعى ءبىر نەمىس فۋتبولشىسى قوسىلدى. ول – الەكساندر مەركەل. بۇل تۋرالى kff.kz حابارلادى. الەكساندر مەركەل 1992 جىلى 22 اقپاندا الماتى قالاسىندا دۇنيەگە كەلگەن. التى جاسىندا وتباسىمەن بىرگە گەرمانياعا كوشىپ بارىپ, جەرگىلىكتى «ۆەستارۆالد» كومانداسى ساپىندا سپورتتىڭ قىر-سىرىن ۇيرەندى. كەيىن «شتۋتگارت» فۋتبول اكادەمياسىندا ءتالىم الدى. 16 جاسىندا يتاليانىڭ «ميلان» كومانداسىنا اۋىسىپ, ءۇش جىل سول جەردە ونەر كورسەتتى. ءتىپتى كوماندانىڭ نەگىزگى قۇرامىندا ويناۋعا مۇمكىندىك الدى. ارتىنان «ا» سەرياسىندا وينايتىن «دجەنوا» جانە «ۋدينەزە» كوماندالارىنىڭ ساپىندا دوپ تەپتى. وتكەن جىلى از ۋاقىت انگليانىڭ «ۋوتفورد» كومانداسىنىڭ نامىسىن قورعادى. ال بۇگىندە شۆەيتساريانىڭ «گراسسحوپپەر» كومانداسىندا وينايدى. ايتا كەتەيىك, وسىعان دەيىن تاعى ەكى نەمىس فۋتبولشىسى قازاقستان ۇلتتىق قۇراماسىن تاڭداعان بولاتىن. ياعني, قازاقستاندا دۇنيەگە كەلىپ, كەيىن تاريحي وتاندارىنا كوشىپ كەتكەن گەينريح شميتدگال مەن كونستانتين ەنگەل دە فۋتبول الىپپەسىن گەرمانيادا ۇيرەنگەن ويىنشىلار. ەلامان قوڭىر. دەرەك: kff.kz. سۋرەت: eurosport.ru.