سولتۇستىك قازاقستاندا قىسقى سپورت ويىندارى ءوتتى

پەتروپاۆل. 3 ناۋرىز. «سولتۇستىك-2015» قىسقى سپورت ويىندارىنىڭ اقتىق باسەكەسىنە 13 اۋداننان 500-گە جۋىق سپورتشى قاتىسىپ, فۋتزال, شورت-ترەك, حوككەي جانە شاڭعىدان سىنعا ءتۇستى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى حابارلادى. ءۋاليحانوۆ اۋدانى ا.قازىمبەتوۆ اتىنداعى ستاديوندا ۇيىمداستىرىلعان سپورتتىق شارانىڭ اشىلۋ سالتاناتىندا سويلەگەن وبلىس اكىمىنىڭ ورىنباسارى ۆلاديمير بۋبەنكو سپورتشىلارعا ساتتىلىك تىلەدى. ۆلاديمير سميرنوۆ, سەرىك ساپيەۆ, دميتري بابەنكو سىقىلدى اتاقتى سپورتشىلاردىڭ بەينەقۇتتىقتاۋلارى تىڭدالعاننان كەيىن مەرەكەلىك جالاۋدى كوتەرۋ قۇرمەتىنە سپورت ارداگەرلەرى گەننادي سابيتوۆ پەن سانسىزباي قاليەۆ يە بولدى. تايىنشا اۋدانىنىڭ وكىلى ۆالەنتينا شۋلتس شورت-ترەكتەن 1500 مەترگە جۇگىرۋدە الدىنا جان سالمادى. فۋتزالدان اسا تارتىستى وتكەن باسەكەدە الاڭ يەلەرى ايىرتاۋلىقتاردى 7:5 ەسەبىمەن ۇتتى. حوككەيدە دە الاڭ يەلەرىنىڭ مەرەيى ۇستەم بولدى. قىسقى سپارتاكياداعا 8 سپورت تۇرلەرى كىرەدى. مۇنىڭ الدىندا پرەزيدەنتتىك كوپسايىس, كونكي جارىسى, بياتلون, دوپتى حوككەي تۇرلەرىنەن اقتىق سايىس مارەگە جەتكەن بولاتىن, دەيدى دەنە شىنىقتىرۋ جانە سپورت باسقارماسىنىڭ باسشىسى رۋسلان ەسەنالين. ءۇش كۇنگە سوزىلعان «سولتۇستىك-2015» قىسقى ويىندارىنىڭ قورىتىندىسى بويىنشا جالپىكوماندالىق ەسەپتە م. جۇماباەۆ اۋدانىنىڭ سپورتشىلارى 140 ۇپاي جيناپ, جەڭىمپاز اتاندى. ەكىنشى, ءۇشىنشى ورىنداردى قىزىلجار مەن ع.مۇسىرەپوۆ اۋداندارى ءبولىستى. ولارعا اقشالاي سىيلىقتار تابىس ەتىلدى. سپارتاكيادانى ءوز دارەجەسىندە ۇيىمداستىرا بىلگەن الاڭ يەلەرى-ۋاليحانوۆتارعا وبلىس اكىمى اتىنان «گازەل» كولىگى تارتۋ ەتىلدى. ءومىر ەسقالي. دەرەك, سۋرەت: سولتۇستىك قازاقستان وبلىستىق دەنە شىنىقتىرۋ جانە سپورت باسقارماسى.