جاس سۋرەتشىلەر وداعى قۇرىلدى

استانا قالاسىنىڭ سۋرەتشىلەر وداعى ەسىل اۋدانى اكىمدىگىنىڭ قولداۋىمەن  ساۋران كوشەسىندە ورنالاسقان ەكس­پوزيتسيا زالىندا كورمە وتكىزدى. كورمەگە ەلوردامىزدىڭ بەلسەندى ونەر قاي­رات­كەرلەرى اتسالىسىپ, ۇزدىك تۋىن­دى­لا­رىن كورەرمەندەر نازارىنا ۇسىندى. مىسالى, ك. مۋللاشەۆ, ە.ايتۋاروۆ, ا. دي­نيكەەۆ, ق. احمەتجان جانە ت.ب. سۋرەتشىلەردىڭ شىعارمالارى قويىلدى. ك.مۋللاشەۆتىڭ ء“بيشى ەلميرا”, “اقىن سارا”, “قىپشاق قىزى”, “ماحاببات اۋراسى” اتتى تۋىندىلارىندا قازاقتىڭ حاس سۇلۋلارى كوركەمدىگىمەن تاڭقالدىردى. كوم­پوزيتسيالىق قۇرىلىمى كاسىبي دەڭگەيدە ورىندالعان جانە تۇستەرى ءبىر-بىرىمەن جاقسى ۇيلەسىمدىلىك تاپقان سۋرەتشى ا. دينيكەەۆتىڭ “دالا اڭشىسى”, “اڭشى”, “قىز الىپ قاشۋ” سياقتى تۋىن­دىلارىنان ۇساق ويۋ-ورنەكتەر ءىزىن انىق بايقاۋعا بولادى. شىعارمالارىندا كەڭىستىك كوكجيەگى بەلگىلەنبەگەن,  كىلەم تارىزدەس, وتە دەكوراتيۆتى كەسكىندەمە بولىپ كەلەتىنى سۇيسىنتەدى. ق. احمەتجان ءالى دە شىعارماشىلىق ىزدەنىستە, ونىڭ “ورمان اۋەندەرى” تۋىندىسىنىڭ ورىندالۋى حح عاسىرداعى اتاقتى فرانتسۋز سۋرەتشىسى سەرانىڭ پۋانتيليزم تاسىلىنە ۇقسايدى. دەگەنمەن, وزگەشەلىگىن اڭعارۋعا بولادى. مىسالى سەرادا ءاربىر كەنەپكە سالىنعان ءتۇستىڭ نۇكتەلەرى ءبىر-بىرىمەن كەلىسىپ, ءبىرتۇتاس بولىپ كورىنسە, ق.احمەتجاننىڭ تۋىندىسىندا تۇستىك جاعىمدارى ىرىرەك جانە ولاردىڭ قويۋ قوڭىر ءتۇستى جان-جاعىندا كونتۋرلارى بار. كەسكىندەمەشى ك.حايبۋللين “سامال جەل” شىعار­ماسىندا قالانىڭ سىرتىندا جاسىل شالعىندا پرەزيدەنتىمىز ن.ءا. نازارباەۆتىڭ دەمالىپ وتىرعان شاعىن بەينەلەگەن. قازاقتىڭ كەڭ دالاسىندا ەلباسى تۋعان جەرى ءۇشىن ماقتانىش سەزىمىندە وتىرعانى جايدارى جۇزىنەن كورىنەر ەدى. سۋرەتشى مۇندا تۇلعا بەينەسىن سامال جەلدىڭ اۋەنىمەن ۇيلەستىرە جەتكىزۋگە تىرىسقان. تاعى ءبىر ايتا كەتەتىن ۇلكەن جاڭالىق – استانا  قالاسىنىڭ سۋرەت­شىلەر وداعى جانىنان “جاس سۋرەتشىلەر وداعى” قۇرىلدى. ونى سۋرەتشى گۇلميرا تەلعازيەۆا باسقارادى. قازاقستاننىڭ تۇكپىر-تۇكپىرىنەن كەلگەن تالانتتى جاستار شىعارماشىلىق  جۇمىستارىمەن جاقىندا وزدەرىنىڭ العاشقى كورمەسىن اشتى. بەينەلەۋ ونەرىنىڭ شەبەرلەرى ك.مۋللاشەۆ, ا. نازارقۇلوۆ, ا. ايتۋاروۆ, ق. نۇرباتىروۆ پەن سۋرەت­شىلەر وداعىنىڭ توراعاسى قوڭىر ابدۋللا ۇلى ىرىكتەۋ كونكۋرسىن جۇرگىزىپ, 19 سۋرەتشىنىڭ اراسىنان 17 تالاپكەردى مۇشەلىككە قابىلدادى. قازىرگى كەزدە دارىندى جاستار كوشەدەگى ەسكى ۇيلەردى مونۋمەنتالدى كەسكىن­دەمەمەن بەزەن­دىرۋدى ويلاستىرىپ جاتىر. وسى جوبا بويىنشا قىزۋ جۇمىس جۇرۋدە. سونىمەن قاتار, “سارىارقا” ساۋدا ورتالىعىنىڭ كورمە زالىندا جاستاردىڭ شىعار­ماشىلىعى ءاردايىم جۇرت­شىلىققا ۇسىنىلىپ وتىراتىن بولادى. جاس سۋرەتشىلەردى وداققا قابىلداۋ ءراسىمى, ولارعا كۋالىك تاپسىرۋ شاراسى ۇلتتىق كىتاپحانانىڭ كورمە زالىندا سالتاناتتى تۇردە  وتپەك. ايگەرىم ماجيتحانقىزى, ونەرتانۋشى.