ساياسي بەدەلى دە, ەكونوميكالىق الەۋەتى دە جەتەدى

شاعىن سۇحبات ەقىۇ-عا مۇشە مەملەكەتتەر سىرتقى ىستەر مينيسترلەرىنىڭ بەيرەسمي كەزدەسۋى اياسىندا ۇيىمنىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ ماكەدونيا سىرتقى ىستەر ءمينيسترى انتونيو ميلوشوسكيمەن دە كەز­دەس­كەن-ءتىن. كەزدەسۋدەن سوڭ ءبىز ما­كەدونيا سىرتقى ساياسات ۆەدوم­ستۆوسىنىڭ باسشىسىنا بىرنەشە سۇراق قويعان ەدىك. – ماكەدونيا بۇگىندە ەۋروپا كەڭەسىنە توراعالىق ەتەدى, – دەدى ماكەدونيا سىرتقى ىستەر ءمينيسترى انتونيو ميلوشوسكي. – قازاقستان ءوز كەزەگىندە ەقىۇ-عا توراعالىق ەتۋدە. وسى ەكى ۇيىمنىڭ ءوزارا ىن­تى­ماقتاستىعى بۇگىندە دە, بولا­شاق­تا دا ەرەكشە ماڭىزدى. – ۇيىمنىڭ ءىس باسىنداعى ءتور­اعاسىمەن كەزدەسۋدە قانداي ماسە­لە­لەر اڭگىمە بولدى؟ – كەزدەسۋدە قازاقستان مەن ماكەدونيا اراسىنداعى ىنتىماق­تاستىقتى نىعايتۋ ماسەلەلەرى قوز­عالدى. دالىرەك ايتقاندا, ءوزارا باي­لانىستاردى جانداندىرۋ, قاۋىپسىز­دىكتى قامتاماسىز ەتۋ, ادام قۇقىعىن قورعاۋ ماسەلەلەرىنە باسا نازار اۋدارىلدى. سونىمەن قاتار, قازاق­ستان رەسپۋبليكاسى مەن ماكەدونيا اراسىنداعى ديپلوماتيالىق ءتول­قۇجات يەلەرىن ۆيزالىق تالاپتاردان بوساتۋ تۋرالى كەلىسىمگە قول قويىلدى. – بيىل قازاقستاندا ەقىۇ ءسامميتىن وتكىزۋ باستاماسى جونىندە نە ايتاسىز؟ – ەقىۇ ءسامميتى وتپەگەلى 11 جىل­دان استى. تالقىلاۋدى قاجەت ەتەتىن, شەشىمىن كۇتكەن پروب­لە­ما­لار جەتكىلىكتى. ەندى ۇيىمعا مۇشە 56 مەملەكەتتىڭ باسشىلارى باس قوسىپ, قوردالانعان سول پروبلە­ما­لاردى جان-جاقتى تالقىلاپ, ولار­دى شەشۋدىڭ مەزگىلى جەتتى دەپ ويلايمىن. – قازاقستاننىڭ ەقىۇ-عا توراعالىق ەتكەنىنە جارتى جىلدان استى. پىكىرىڭىز قانداي؟ قازاقستان ۇيىمعا ويداعىداي باسشىلىق جاساپ كەلەدى. اۋقىمدى باعدارلامالار دايىنداپ, ونى ءجۇ­زەگە اسىرۋ ءۇشىن ۇيىمعا قاتىسۋشى ەلدەردى جۇمىلدىرۋ ۇستىندە. بۇگىندە ۇيىم الدىندا تۇرعان وزەكتى ماسە­لەنىڭ ءبىرى – قىرعىزستاندى ساياسي جاعىنان تۇراقتان­دىرۋ بولىپ وتىر. ءبىرىنشى كەزەكتە بۇل ۇيىم توراعاسى قازاقستانعا, سونداي-اق ۇيىمعا مۇشە بارلىق مەملەكەتتەرگە ۇلكەن جاۋاپكەرشىلىك جۇكتەيدى. ال قازاق­ستاننىڭ بۇل جاۋاپكەرشىلىكتى ويدا­عىداي ورىنداۋعا ساياسي بەدەلى دە, ەكونوميكالىق الەۋەتى دە جەتەدى.