ورتالىق باسشىسىمەن ورايلى اڭگىمە

كەشە ۇكىمەت ۇيىندە قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆ بۇۇ-نىڭ جاقىندا تاعايىندالعان ارنايى وكىلى – بۇۇ-نىڭ ورتالىق ازيا ءۇشىن پرەۆەنتيۆتى ديپلوماتياسى جونىندەگى وڭىرلىك ورتالىعىنىڭ (UNRCCA) باسشىسى پەتكو دراگانوۆپەن كەلىسسوز جۇرگىزدى, دەپ حابارلادى پرەمەر-ءمينيستردىڭ ءباسپاسوز قىزمەتى. كەزدەسۋ بارىسىندا باقىتجان ساعىنتاەۆ قازاقستاننىڭ بۇۇ-نىڭ حالىقارالىق قاۋىپ­سىزدىك پەن دامۋ پروبلەمالارى سالاسىنداعى اسا وتكىر قا­تەرلەردى شەشۋدە ونىڭ دالالىق ميس­سيالارىنىڭ, قورلارى مەن باع­دارلامالارىنىڭ جەتەكشى ءرولىن مويىندايتىنىن اتاپ ءوتتى. «قا­زاقستاننىڭ ۇزاق مەرزىمدى الەۋمەتتىك-ەكونوميكالىق جانە ساياسي دامۋى ايتارلىقتاي دەڭ­گەيدە وڭتايلى سىرتقى ورتانىڭ, ءبىرىنشى كەزەكتە, ورتالىق ازيادا بولۋىنا تاۋەلدى. وسىمەن بايلانىستى قازاقستان ورتالىق ازيا­نىڭ ساياسي تۇراقتى, ەكونوميكالىق ورنىقتى جانە قاۋىپسىز دامۋىنا مۇددەلى», – دەپ اتاپ كورسەتتى پرەمەر-ءمينيستردىڭ ءبىرىنشى ورىنباسارى. وڭىردەگى مەملەكەتارالىق قارىم-قاتىناستا  شەتىن ماسە­لەلەردىڭ ءبىرى سۋ-ەنەرگەتيكالىق رەسۋرستار بولىپ تابىلادى. ونى ءبولۋدىڭ تەڭگەرىمسىزدىگى ور­تا­لىق ازيا ەلدەرىندەگى اۋىل شارۋا­شىلىعىنىڭ دامۋىنا تەرىس ىقپال ەتىپ وتىر جانە وڭىردەگى ەكو­­لوگيالىق-مەليوراتيۆتىك احۋال­دىڭ ناشارلاۋىنا الىپ كە­لۋدە. بۇۇ مەن ونىڭ قۇرى­لىم­دارى­نىڭ, ونىڭ ىشىندە UNRCCا-نىڭ ورتالىق ازيا ەلدەرىنىڭ ىشىندە ترانسشەكارالىق سۋلاردى بىرلەسىپ پايدالانۋ مەن ساقتاۋ سالاسىندا حالىقارالىق قۇقىق قاعيداتتارى نەگىزىندەگى ۇنقاتىسۋدى ساقتاۋى ماڭىزدى ءرول اتقارادى. «قا­زاق­ستان ورتالىقتىڭ ارال تەڭىزى باسسەينىنىڭ سۋ رەسۋرستارىن ترانس­شەكارالىق باسقارۋ ءۇشىن نور­ماتيۆتىك-قۇقىقتىق بازانى جاڭعىرتۋ بويىنشا كۇش-جىگە­رىن, سونداي-اق, ورتاق سۋ رە­سۋرستارىنىڭ بەدەلدى حالىق­ارالىق ساراپشىلاردى تارتا وتىرىپ ادىلەتتى جانە سىندارلى تەپە-تەڭدىگىنە قول جەتكىزۋ مەن قولداۋ جونىندەگى كۇش-جىگەردى جوعارى باعالايدى», – دەدى با­قىت­جان ساعىنتاەۆ. پرەمەر-ءمينيستردىڭ ءبىرىنشى ورىنباسارى پەتكو دراگانوۆتى UNRCCA-نىڭ باسشىسى لاۋا­زىمىنا تاعايىندالۋىمەن قۇت­تىقتاپ, ونىڭ باي كاسىبي ءتاجىري­بەسى ورتالىقتىڭ الدىندا تۇرعان مىندەتتەردى تابىستى ورىنداۋعا مۇمكىندىك بەرەتىنىنە سەنىم ءبىل­دىردى.