مەملەكەتتىك حاتشى ءبىلىم سالاسىنىڭ قىزمەتكەرلەرىمەن كەزدەستى

استانا. 19 تامىز. مەملەكەتتىك حاتشى گۇلشارا ابدىقالىقوۆا ەلدىڭ ءبىلىم بەرۋ جۇيەسىنىڭ قىزمەتكەرلەرىمەن كەزدەستى. بۇل تۋرالى akorda.kz حابارلادى. كەزدەسۋگە ءبىلىم جانە عىلىم ءمينيسترى ا.ءسارىنجىپوۆ, سونداي-اق  اۋىل مۇعالىمدەرى, جاڭاشىل پەداگوگتار, پەداگوگيكالىق جانە عىلىمي مەكەمەلەردىڭ باسشىلارى قاتىستى. شارا بارىسىندا گۇلشارا ابدىقالىقوۆا قاتىسۋشىلاردىڭ نازارىن نۇرسۇلتان نازارباەۆتىڭ «باسەكەگە قابىلەتتى دامىعان مەملەكەت بولۋ ءۇشىن ءبىز ساۋاتتىلىعى جوعارى ەلگە اينالۋىمىز كەرەك» دەگەن سوزىنە اۋداردى. سونىمەن قاتار, ول ادامي كاپيتالدىڭ ساپاسىن ەكونوميكالىق ىنتىماقتاستىق جانە دامۋ ۇيىمى ەلدەرىنىڭ ستاندارتتارى نەگىزىندە ارتتىرۋ ءبىلىم بەرۋ جۇيەسىن جاڭعىرتۋدىڭ «100 ناقتى قادام» – ۇلت جوسپارى اياسىنداعى وسى كەزەڭىنىڭ باستى ەرەكشەلىگى ەكەنىنە توقتالدى. بيىل ءبىلىم بەرۋدىڭ 2011-2020 جىلدارعا ارنالعان مەملەكەتتىك باعدارلاماسىنىڭ ءبىرىنشى كەزەڭىن ىسكە اسىرۋ اياقتالادى. وسى ۋاقىت ىشىندە باستاۋىش ءبىلىم بەرۋدىڭ جالپىعا مىندەتتى مەملەكەتتىك ستاندارتى قابىلداندى, مەكتەپكە دەيىنگى, جالپى ورتا ءبىلىم بەرۋ ستاندارتتارىنىڭ جوبالارى ازىرلەندى, پەداگوگيكالىق كادرلاردىڭ بىلىكتىلىگىن ارتتىرۋدىڭ تۇبەگەيلى جاڭا جۇيەسى قۇرىلدى. مەكتەپكە دەيىنگى ءبىلىم بەرۋ جۇيەسى تابىستى دامىپ كەلەدى. قازىرگى ۋاقىتتا ەلىمىزدە 8780 مەكتەپكە دەيىنگى مەكەمە جۇمىس ىستەيدى, ال 3-6 جاس ارالىعىنداعى بالالاردىڭ قامتىلۋى 78,6 پايىزعا دەيىن جەتتى. ەلىمىزدىڭ بارلىق وڭىرلەرىندە بالالاردى وقىتۋدىڭ جانە تاربيە بەرۋدىڭ جاڭاشىل يننوۆاتسيالىق تاسىلدەرىن تابىستى ەنگىزىپ كەلە جاتقان 19 نازارباەۆ زياتكەرلىك مەكتەبى قۇرىلىپ, جۇمىس ىستەۋدە. جالپى جانە كاسىبي تەحنيكالىق ءبىلىم بەرۋ جۇيەسىندە دۋالدىق وقىتۋدىڭ جاڭا تەحنولوگيالارى ەنگىزىلۋدە. «100 ناقتى قادامدى» ىسكە اسىرۋ اياسىندا ەكونوميكانىڭ نەگىزگى 6 سالاسى ءۇشىن بىلىكتى كادرلار دايارلاۋ ماقساتىندا 10 كوللەدج بەلگىلەندى. رەسپۋبليكامىزدا 125 جوعارى وقۋ ورنى جۇمىس ىستەيدى, سونىڭ 29 -ى جوعارى جانە جوعارى وقۋ ورنىنان كەيىنگى ءبىلىم بەرۋدىڭ 252 ماماندىعى بويىنشا حالىقارالىق مامانداندىرىلعان اككرەديتاتسيادان ءوتتى. كەزدەسۋ كەزىندە مەملەكەت باسشىسى ۇسىنعان بەس ينستيتۋتسيونالدىق رەفورمانىڭ اياسىنداعى, سونداي-اق پەداگوگتاردىڭ مارتەبەسىن كوتەرۋگە, اۋىل مەكتەپتەرىنىڭ, تەحنيكالىق ءبىلىم بەرۋ مەكەمەلەرىنىڭ, عىلىمي جانە پەداگوگيكالىق ۇيىمداردىڭ جۇمىستارىنا بايلانىستى وزەكتى ماسەلەلەر تالقىلاندى. تالقىلاۋ ناتيجەسى بويىنشا مەملەكەتتىك حاتشى قۇزىرلى مەملەكەتتىك ورگاندارعا بىرقاتار ناقتى تاپسىرما بەردى. كەزدەسۋ سوڭىندا, گ.ابدىقالىقوۆا ەلدەگى بارشا پەداگوگتاردى جاڭا وقۋ جىلىمەن قۇتتىقتاپ, ولارعا زور دەنساۋلىق, شىعارماشىلىق تابىس, باقىت جانە يگىلىك تىلەدى. ايدار ورىسباەۆ. دەرەك: akorda.kz. سۋرەت: egemen.kz.