«تايقازان» اۋليەاتا جەرىنە جول تارتتى

الماتى قالاسىنان «قازاقستان حالقى اسسامبلەياسى – 20 يگى ءىس» پاتريوتتىق اكتسياسىنىڭ سيمۆولى بولعان كيەلى تايقازان سالتاناتتى تۇردە جامبىل وبلىسىنا جول تارتتى. ەلىمىزدى مەكەن ەتكەن بىرنەشە ۇلت پەن ۇلىس وكىلدەرىنىڭ تاتۋلىعى مەن تۇراق­تىلىعىنىڭ سيمۆولى, قازاق حالقى­نىڭ الەمدەگى بەيبىت تە بەرەكەلى ومىرگە قوسقان ۇلەسىنىڭ تۇمارى ىسپەتتى قاسيەتتى تايقازاننىڭ كىشىرەيتىلگەن نۇسقاسى قازاقستاننىڭ ءىرى قالالارى مەن وبلىس ورتالىقتارىنا ايالداپ, يگىلىكتى ىستەردى ناسيحاتتاپ ءجۇر. سول يگى اكتسيانىڭ اياسىندا «قازاقستان حالقى اسسامبلەياسى – 20 يگى ءىس» اتتى رەسپۋبليكالىق پاتريوتتىق شەرۋ الماتى قالاسىنان قاسيەتتى اۋليەاتا جەرىنە جول تارتتى. الماتىداعى دوستىق ۇيىندە ءوت­كەن شاراعا قالاداعى ءتۇرلى ەتنو­ما­دەني بىرلەستىكتەردىڭ وكىلدەرى, ۇلى وتان سوعىسىنىڭ ارداگەرلەرى, مەم­لەكەتتىك ەمەس قوعامدىق ۇيىم­داردىڭ بەلسەندىلەرى مەن جوعارى وقۋ ورىندارىنىڭ جاستارى جي­نالدى. تاتۋلىق پەن دوستىقتىڭ كيەلى شاڭىراعىنا اينالعان دوستىق ءۇيىن­دە قازاقستاندى مەكەن ەتكەن ءار ۇلت وكىل­دەرىنىڭ مادەني-شىعارماشىلىق كورمە­لەرى قويىلىپ, ۇلتتار دوستىعىن ناسي­حاتتايتىن تەاترلاندىرىلعان شارالار ۇيىمداستىرىلدى. – اقپان ايىنىڭ سوڭىندا ءبىز ءوزى­مىزدىڭ شىعىسقازاقستاندىق ارىپتەس­تەرىمىزدەن تايقازاندى سالتاناتتى تۇردە قابىلداپ العان بولاتىنبىز. جانە وسى قازاقستان حالقى اسسام­بلەيا­سى قۇرىلعان كۇن – 1 ناۋرىزدا, اسسامبلەيانىڭ العاشقى سەسسياسى وتكەن قالا – الماتىنىڭ اتقارعان يگى ىستەرىن جامبىل وبلىسىنا تابىستاپ وتىرمىز, – دەدى الماتى قالالىق قازاقستان حالقى اسسامبلەياسى توراعاسىنىڭ ورىنباسارى مايرا ابداليەۆا. شارادا قالادا ورنالاسقان 34 ەتنومادەني بىرلەستىكتىڭ ونەرپازدارى دايىنداعان كونتسەرتتىك كەش پەن ۇلى وتان سوعىسى ارداگەرلەرىنە ارنايى جاسالعان تارتۋ-تارالعىلار, الەۋمەتتىك از قامتىلعان وتباسى مۇشەلەرىنە جاسالعان جاردەم مەن جاستار ۇيىمىنىڭ قازاقستان حالقى اسسامبلەياسى تاراپىنان حالىققا كورسەتىلىپ وتىرعان قىزمەتىن باياندايتىن ساحنالىق كورىنىستەر, ۇلتتىق ءان-بي مەن قولونەر شەبەرلەرىنىڭ بۇيىمدارى ۇسىنىلدى. قانات ەسكەندىر, «ەگەمەن قازاقستان». الماتى. سۋرەتتى تۇسىرگەن سارسەنبەك قىزايبەك ۇلى.