«بۇگىن ءبىز ۇزدىك تۇلەكتەردى عانا ەمەس, تۋعان ولكەمىزدىڭ كوز قۋانىشى مەن ماقتانىشىن ۇلىقتاۋعا جينالىپ وتىرمىز. ون ءبىر جىل بويى تالماي ىزدەنىپ, ءبىلىم جولىندا ايانباي ەڭبەك ەتىپ, شاكىرتتىك كەزەڭنىڭ ەڭ بيىك بەلەسى – «التىن بەلگى» توسبەلگىسىن يەلەنگەن شاكىرتتەردى شىن جۇرەكتەن قۇتتىقتايمىن! بۇل ماراپات – سىزدەردىڭ عانا ەمەس, ساپالى ءبىلىم مەن سانالى تاربيە بەرگەن ۇستازدارىڭىزدىڭ, ءاردايىم قولداۋ كورسەتكەن اتا-انالارىڭىزدىڭ ورتاق جەڭىسى مەن ورتاق مەرەيى. مەملەكەت باسشىسى قاسىم-جومارت توقاەۆ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋىندا «جاستار «ەلدى ءسۇيۋ دەگەنىمىز – حالىققا پايداسى تيەتىن جاڭالىق اشۋ, جاڭا ءىس باستاۋ» دەپ تۇسىنەدى. ولار قازاقستاندى دامىعان, كوركەيگەن مەملەكەت رەتىندە كورگىسى كەلەدى. زاماناۋي تەحنولوگيالاردى مەڭگەرىپ, حالقىمىزدى وزىق ويلى ۇلتتاردىڭ قاتارىنا قوسۋعا تالپىنادى», دەپ جاستارعا ۇلكەن سەنىم مەن بيىك ءۇمىت ارتىپ وتىر. سىزدەر وسى ءۇمىتتىڭ ۇدەسىنەن شىعادى دەپ سەنەمىز. قاناتتارىڭىز تالماسىن, ارماندارىڭىز اسقاق بولسىن», دەدى بەرىك ءۋالي.
وتكەن وقۋ جىلىندا وبلىس كولەمىندە 362 وقۋشى «التىن بەلگى» يەگەرى اتانسا, بيىل بۇل كورسەتكىش 432-گە جەتتى. وسى جىلى وڭىردە 6 065 تۇلەك مەكتەپ ءبىتىرىپ وتىر. ال ولاردىڭ ساپالى ءبىلىم الىپ, سانالى ازامات بولىپ قالىپتاسۋىنا 12 مىڭنان استام مۇعالىم ۇلەس قوستى. جالپى 2025–2026 وقۋ جىلىندا سەمەي قالاسىنداعى 53 مەملەكەتتىك, 8 جەكەمەنشىك, 2 مامانداندىرىلعان مەكتەپتى جالپى سانى 51 276 وقۋشى اياقتادى. 11-سىنىپتى بىتىرگەن 22 854 تۇلەكتىڭ 160-سى «التىن بەلگى» يەگەرى اتانسا, 231 تۇلەك مەكتەپتى ۇزدىك اتتەستاتپەن اياقتادى.
وبلىستا دارىندى وقۋشىلارعا قولداۋ كورسەتىلىپ كەلەدى. بيىل جوعارى وقۋ ورنىنا تۇسۋگە وبلىستىق بيۋدجەتتەن قارجى قاراستىرىلىپ, ءوڭىردىڭ 200 تۇلەگىنە وبلىس اكىمىنىڭ گرانتى ءبولىندى. وسىنداي گرانت بىلتىر دا بەرىلگەن.
سونداي-اق جيىندا وبلىستىڭ ءبىلىم سالاسىنا ەلەۋلى ۇلەس قوسقان مۇعالىمدەرگە دە قۇرمەت كورسەتىلدى. اتاپ ايتقاندا, سەمەي قالاسىنىڭ №8 جالپى ورتا ءبىلىم بەرەتىن مەكتەبىنىڭ ورىس ءتىلى مەن ادەبيەتى ءپانىنىڭ مۇعالىمى رايحان ابىشەۆا, جارما اۋدانىنىڭ اقتايلاق بي اتىنداعى جالپى ورتا ءبىلىم بەرەتىن مەكتەبىنىڭ ورىس ءتىلى مەن ادەبيەتى ءپانىنىڭ مۇعالىمى مايرا ءجاندىلدينوۆا, بەسقاراعاي اۋدانىنىڭ دولون نەگىزگى ءبىلىم بەرەتىن مەكتەبىنىڭ تاريح ءپانىنىڭ مۇعالىمى جانار ءومارالينا, سەمەي قالاسىنىڭ №49 جالپى ورتا ءبىلىم بەرەتىن مەكتەبىنىڭ ماتەماتيكا ءپانىنىڭ مۇعالىمى گۇلفاريزا توقتىباەۆا «قۇرمەت» وردەنىمەن ماراپاتتالدى. سونداي-اق سەمەي قالاسىنىڭ باۋىرجان مومىش ۇلى اتىنداعى № 34 جالپى ورتا ءبىلىم بەرەتىن مەكتەبىنىڭ قازاق ءتىلى مەن ادەبيەتى ءپانىنىڭ مۇعالىمى نۇرلان جولبارىسوۆ پەن اباي اۋدانىنىڭ بەكبوسىنوۆ اتىنداعى جالپى ورتا ءبىلىم بەرەتىن مەكتەبىنىڭ ماتەماتيكا ءپانىنىڭ مۇعالىمى باقىت تىلەۋبايعا «ەرەن ەڭبەگى ءۇشىن» مەدالى
تابىستالدى.
اباي وبلىسى
